AN MGA shell nabulig ha molusko nga mabuhi ha makuri nga kahimtang ngan makailob han duro nga presyur ha ilarom han dagat. Ito nga abilidad ha paghatag han pinakamaopay nga proteksyon nag-aghat ha mga inhinyero nga adman an porma ngan pagkahimo han mga shell basi makadisenyo hin bilding ngan sarakyan nga makakagprotektar han nagamit hito.

Tagda ini: Gin-estudyohan han mga inhinyero an duha nga porma han shell—an bivalve (nagtatakopay nga shell) ngan an spiral (sugad-tornilyo nga shell).

Ha nagtatakopay nga shell, an garatudgatod nga gawas hito nabulig basi maidistrebwer an presyur ngadto ha gindudugtongan han shell ngan ha mga ligid hito. Ha kabaliktaran, an nagkukurbakurba nga gawas han sugad-tornilyo nga shell nabulig basi maidistrebwer an presyur ngadto ha sentro ngan hilapad nga igbaw nga bahin han shell. Hinin duha nga klase hin shell, an porma an nabulig basi mahingadto an presyur ha pinakamarig-on nga bahin, salit kon mameligro an molusko diri ito basta madadaot.

An mga syentista naghimo liwat hin eksperimento basi hibaroan an kapasidad han tinuod nga mga shell ngan han artipisyal nga bivalve ngan spiral nga shell nga hinimo ha 3-D printer. Iginpapakita han resulta hini nga tungod han pagkagaratudgatod ngan ha pagka-spiral han tinuod nga shell haros madoble an abilidad hito ha pag-ilob hin presyur kay ha simple la nga mga porma.

May kalabotan ha pag-aplikar han resulta hini nga pagsaliksik, an Scientific American nagsiring: “Kon umabot an panahon nga makagdrayb ka hin awto nga pariho han porma han shell, moderno an pagkadisenyo hito ngan ginhimo basi maprotektaran an sakay hito.”

Ano ha imo panhunahuna: An porma ba han shell produkto han ebolusyon, o may nagdisenyo hito?