Hi propeta Moises nagsiring nga kon susugton naton an Dios, bibendisyonan kita niya. (Deuteronomio 10:13; 11:27) Ginsusugot ta an Dios diri tungod kay nahahadlok kita nga sirotan niya. Lugod, napapagios kita nga sugton hiya tungod han iya mag-opay nga kalidad, han aton gugma ha iya, ngan han aton hingyap nga diri hiya mapasubo. “Ini an kahulogan han gugma ha Dios, nga tumanon naton an iya mga sugo.”​—1 Juan 5:3.

Pero paonan-o magigin bendisyon an pagsugot ha Dios? Tagda an masunod:

“Ako, hi Jehova, an imo Dios, an nagtututdo ha imo basi magpahimulos ka, an naggigiya ha imo ha dalan nga sadang mo laktan.”​—ISAIAS 48:17.

Hi Jehova nga Dios, nga aton Maglalarang, nakilala ha aton ngan naghahatag han giya nga aton ginkikinahanglan. Basi mabuligan kita ha paghimo hin maaramon nga desisyon, kinahanglan naton adman an Baraan nga Kasuratan basi hibaroan an mga sugo han Dios ngan buhaton ito.

“Malipayon an mga namamati ha pulong han Dios ngan nagtutuman hito!”​—LUCAS 11:28.

Yana, minilyon nga nagsusugot han Pulong han Dios an tinuod nga malipayon. Pananglitan, tagda an usa nga lalaki nga taga-Espanya nga madali masina ngan maraot an pagtratar ha iba, pati na ha iya asawa. Usa ka adlaw, nabasa niya ha mga sinurat ni propeta Moises an mahitungod han buotan nga hi Jose, nga anak ni Jacob. Hi Jose iginbaligya sugad nga uripon ngan ginpriso bisan waray sala; bisan pa hito, buotan la gihap hiya, mamurayawon, ngan mapinasayloon. (Genesis, kapitulo 37-45) An lalaki nga taga-Espanya nagsiring: “An paghunahuna han ehemplo ni Jose nagpagios ha akon nga magin malumo, buotan, ngan magpugong ha kalugaringon. Tungod hito, malipayon gud ako yana.”

Mababasa ha Baraan nga Kasuratan an damu pa nga giya kon paonan-o naton angay trataron an iba. Hisgotan naton ini ha sunod nga artikulo.