Oo. Ini an pipira nga maaramon nga sagdon nga basado ha Biblia nga nakabulig ha minilyon nga kalalakin-an ngan kababayin-an nga magkaada malipayon nga pamilya:

1.   Himoa nga legal an iyo pag-asawa. An bug-os kinabuhi nga saad tungod han legal nga pag-asawa amo an pundasyon ha usa nga malipayon nga pamilya.—Mateo 19:4-6.

2.   Pagpakita hin gugma ngan respeto. Nag-uupod ini han pagtratar ha imo padis ha paagi nga karuyag mo nga trataron ka.—Mateo 7:12; Efeso 5:25, 33.

3.   Ayaw pagyakan hin nakakasakit nga mga pulong. Magyakan ha buotan nga paagi, bisan kon an imo padis may naiyayakan o nabubuhat nga nakakasakit. (Efeso 4:31, 32) Sugad han ginsisiring han Biblia ha Proberbios 15:1: “An malumo nga baton nakakapawara hin kapungot, pero an mapintas nga pulong nakakaaghat hin kasina.”

4.   Magin maunungon ha usa kag usa. Ipakita an imo romantiko ngan seksuwal nga atensyon ha imo la padis. (Mateo 5:28) An Biblia nasiring: “Pasidunggan han ngatanan an pag-asawa, ngan diri paghugawan an higdaan han mag-asawa.”—Hebreo 13:4.

5.   Mahigugmaon nga bansaya an iyo mga anak. Likyi an pagin konsintidor ngan pagin mapintas.—Proberbios 29:15; Colosas 3:21.