SIDNGON naton nga nagkikita ka hin salida mahitungod hin usa nga sikat nga tawo, sugad han imo paborito nga pianista. Iginpakita hito an iya pagkabata, pag-aram hin instrumento, ngan pagprinaktis. Sunod, iginpakita hito an iya mga konsert, pagbiyahe ha iba-iba nga nasud, ngan an iya pagin kilala ha bug-os nga kalibotan. Katapos, iginpakita an iya kalagas. Ngan ha urhi, an iya kamatayon.

Ini nga salida diri kay hinimo-himo la kondi tinuod ini nga istorya han usa nga tawo nga patay na yana. Anoman an propesyon hito nga tawo, musikero man hiya, syentista, atleta, o iba pa, usa la an iya dadangatan. Bangin damu na an iya nabuhat, pero nahunahuna mo ba kon ano pa unta kadamu an iya mahihimo kon waray hiya malagas ngan mamatay?

Makasurubo man pero ini an naghuhulat ha aton ngatanan. (Eclesiastes 9:5) Bisan ano nga paningkamot, diri naton nalilikyan an mga epekto han kalagas ngan kamatayon. Labot la hito, bangin tigda nga mamatay an usa tungod hin aksidente o grabe nga sakit. Sugad han ginsisiring han Biblia, pariho kita hin alisngaw ha aga “nga nakikita hin madaliay ngan katapos nawawara.”​—Santiago 4:14.

Para ha iba, an kinabuhi waray kasigurohan ngan waray katuyoan salit ginsusunod nira ini nga panhunahuna: “Pangaon ngan panginom kita, kay buwas mapatay kita.” (1 Corinto 15:32) Pero diri ba an pagkinabuhi hin sugad hito nagpapakita la nga ginkakarawat nira nga waray hira ginlalaoman nga maopay kabubuwason? Kon naatubang ka hin problema, bangin makagpakiana ka, ‘Sugad na la ba hini an kinabuhi?’ Diin mo mabibilngan an baton hito?

Yana damu an naglalaom ha syensya. May mga nadiskobrehan an mga syentista ngan mga doktor nga nakapahilawig han kinabuhi. Ngan an pipira nga syentista naniningkamot nga mas mapahilawig pa ito. Anoman an resulta han ira mga ginbuhat, bangin maipakiana la gihapon naton: Kay ano nga nalalagas kita ngan namamatay? Mapipirde pa ba an aton kaaway nga kamatayon? Uusisahon han masunod nga mga artikulo ini nga mga topiko ngan babatunon an pakiana, Sugad na la ba hini an kinabuhi?