BISAN kon an pagkadiri-masinugtanon han aton siyahan nga mga kag-anak nga hira Adan ngan Eva nagresulta hin sala ngan kamatayon ha tanan nga tawo, waray hito mabag-o an katuyoan han Dios para ha katawohan. Ha iya sinurat nga Pulong, an Biblia, pauroutro nga ginpasarig kita han Dios nga waray magbag-o an iya katuyoan.

• “An magtadong magtatag-iya han tuna, ngan maukoy hira dida ha waray kataposan.”​—Salmo 37:29.

• “Iya lalamuyon an kamatayon ha kadayonan, ngan papahiron ni Jehova nga Soberano nga Ginoo an mga luha ha ngatanan nga nawong.”​—Isaias 25:8.

• “An kataposan nga kaaway, an kamatayon, pagwawad-on.”​—1 Corinto 15:26.

• “Mawawara na an kamatayon, pati an kabidoan, pagtangis, ngan kasakit.”​—Pahayag 21:4.

Paonan-o “lalamuyon” o wawad-on han Dios an kamatayon? Sugad han gin-unabi na, an Biblia matin-aw nga nasiring nga ‘an magtadong . . . maukoy ha waray kataposan.’ Pero nasiring liwat ito nga “waray matadong nga tawo ha tuna nga pirme nagbubuhat hin maopay.” (Eclesiastes 7:20) Basi mapirde an kamatayon, igbabalewaray ba han Dios an iya kalugaringon nga suruklan? Imposible ito! Diri gud niya ito bubuhaton kay an “Dios . . . diri makakagbuwa.” (Tito 1:2) Kon sugad, ano an bubuhaton han Dios basi matuman an iya mahigugmaon nga katuyoan ha iya paglarang ha mga tawo?

Hi Jehova nga Dios naghimo hin kahikayan basi matubos an mga tawo tikang ha kamatayon​—pinaagi ha pagbayad hin lukat. An lukat amo an katugbang nga kantidad nga iginhahatag basi mabaydan an nadaot nga butang o maihatag an ginkikinahanglan han hustisya. Tungod kay makasasala an tanan nga tawo ngan nasentensyahan hin kamatayon, an Biblia prangka nga nasiring: “Waray gud ha ira makakatubos hin bugto o makakahatag ha Dios hin lukat para ha iya, (an presyo han lukat para ha ira kinabuhi mahal hinduro nga bisan san-o diri nira ito maaakos).”—Salmo 49:7, 8.

Kon mamatay an diri perpekto nga tawo, an iya la sala an iya mababaydan; diri hiya makakatubos ha iya kalugaringon o makakabayad para ha sala han iba. (Roma 6:7) Kinahanglan naton hin perpekto ngan waray sala nga tawo nga maghahatag han iya kinabuhi, diri para ha iya mga sala, kondi para ha aton mga sala.​—Hebreo 10:1-4.

Salit ano an ginhimo han Dios? Iginpadara niya an iya Anak, hi Jesus, tikang ha langit basi ig-anak ha tuna sugad nga perpekto ngan waray sala nga tawo. (1 Pedro 2:22) Nagsiring hi Jesus nga kumanhi hiya basi “maghatag han iya kinabuhi sugad nga lukat para ha damu.” (Marcos 10:45) Namatay hiya basi pirdihon an kamatayon ngan mabuhi kita.​—Juan 3:16.

Yana, sugad nga katumanan han tagna han Biblia, nagkikinabuhi kita ha “peligroso nga mga panahon nga makuri pakiangayan.” Nagpapamatuod ini nga nagkikinabuhi na kita ha “kataposan nga mga adlaw” hinin maraot nga kalibotan. (2 Timoteo  3:1) An kataposan nga mga adlaw matatapos “ha adlaw han paghukom ngan han kabungkagan han diri diosnon nga katawohan.” (2 Pedro 3:3, 7) Pero adton nahigugma ha Dios makakatalwas hito ngan bibendisyonan hin “kinabuhi nga waray kataposan.”​—Mateo 25:46.

Minilyon nga iba pa an magkakaada higayon nga mabuhi ha waray kataposan kon banhawon na hira. Hi Jesus may ginbanhaw han binisita hiya ha syudad han Nain. Namatay an nag-uusahan nga anak han usa nga balo, ngan tungod ha ‘kalooy,’ ginbuhi hiya utro ni Jesus. (Lucas 7:11-15) Hi apostol Pablo liwat nagsiring: “Naglalaom ako ha Dios . . . nga magkakaada pagkabanhaw han mga magtadong ngan han mga diri magtadong.” Inin marig-on nga paglaom usa nga daku nga kapahayagan han gugma han Dios ha katawohan.​—Buhat 24:15.

Binilyon an may paglaom nga mabuhi ha waray kataposan. An Biblia nasiring: “An magtadong magtatag-iya han tuna, ngan maukoy hira dida ha waray kataposan.” (Salmo 37:29) Hito nga panahon, personal nga maieksperyensyahan nira an makapabantad ngan nakakaliaw nga mga pulong nga iginsurat ni apostol Pablo mga 2,000 ka tuig na an naglabay: “Kamatayon, hain an imo kadaogan? Kamatayon, hain an imo sugod?” (1 Corinto 15:55) An makaharadlok nga kaaway han katawohan pirde na!