Yesuus Kiristtoosi Tumuppe Oonee?
Yesuus Kiristtoosi Tumuppe Oonee?
“Yesuusi Yerusalaame katamaa gelido wode, kataman de7iya asai ubbai, ‘Hagee oonee?’ yaagidi shabbirettiis. Asai, ‘Hagee Galiilan de7iya Naazireeta giyo katamaappe yiida hananabaa yootiya Yesuusa’ yaagiis.” —MAA. 21:10, 11.
YESUUS KIRISTTOOSI * 33 M.L. ofinttan Yerusalaame yiidoogan asay hegaa keena shabbirettidoy aybissee? He kataman deˈiya daroti Yesuusabaanne i oottido maalaalissiyaabaa siyidosona. Eti abaa haratuyyo yootidosona. (Yoh. 12:17-19) SHin a deˈuwaara gayttidabay ha wodiyaa gakkanaashin alame yuushuwan darobaa laammiyo uri bantta giddon deˈiyoogaa eti eribookkona!
Yesuusa deˈuwaara gayttidabay asaa naatu taarikiyaa keehippe bochidoogaa bessiya amarida leemisota qoppite.
▪ Alamiyan daro heeran deˈiya wodiyaa qooday baasettidoy Yesuusi yelettiis giidi qoppiyo layttaana.
▪ Alamiyaa asaappe naaˈˈu biiloone gidiyaagee, giishin heezzu asaappe issoy bana Kiristtaane gees.
▪ Alame yuushuwan deˈiya issi biilooneppe dariya Isilaamati, Yesuusi “Abrahaamappe, Noheppenne Muuseppe aadhiya, hananabaa yootiyaagaa” gidiyoogaa tamaarissoosona.
▪ Aadhida eratettan Yesuusi yootidobatuppe darobay, issi issi heeran asay galla galla haasayan giyoobaa. Kaallidi deˈiyaageeti hegeetuppe amaridaageeta:
“Haddirssa bagga qinxxalliyaakka a bessa.”—MAA. 5:39.
“Aara naa77u saate ogiyaa ba.”—MAA. 5:41.
“Naa77u godatuyyo haarettanau danddayiyai ooninne baawa.”—MAA. 6:24.
“Inqquwaa giyo intte al77o shuchchaa gudunttatu sintti oloppite.”—MAA. 7:6.
“Hara asi intteyyo oottanau koyiyo ubbabaa inttekka asau oottite.”—MAA. 7:12.
‘Woqqu miishshay koshshiyaakko kasetada qoppa.’—LUK. 14:28.
Yesuusa deˈoy asaa naatu taarikiyaa keehippe bochidoogee qoncce. SHin a xeelliyaagan asaa naatu qofaynne ammanoy dumma dumma. Yaatiyo gishshau, intte ‘Yesuus Kiristtoosi tumuppe oonee?’ giidi oychana danddayeeta. Yesuusi awuppe yiidaakko, i ayba ogiyan deˈidaakko, qassi i aybissi hayqqidaakko yootiyay Geeshsha Maxaafaa xalla. A xeelliyaagan ha tumaa eriyoogee, haˈˈi gidin sinttanaukka inttena keehippe goˈˈana danddayees.
[Tohossa qofaa]
^ MENT. 3 Naazireete katamaappe yiida hananabaa yootiyaagaa sunttaa, “Yesuusa” giyaagaa birshshettay “Yihooway Ashshiyaagaa” giyoogaa. “Kiristtoosa” giya boncho sunttay “Tiyettidaagaa” giyoogaa; hegee Xoossay issi dumma oosuwau Yesuusa tiyidoogaa woykko sunttidoogaa bessees.