SHEMPPUWAA 37

Taani Xammaqettana Koshshii?

Kaallidi deˈiya qofa qashota tuma woy worddo ga:

Xinqqatee Kiristtaanetuppe koyettiyaaba.

□ Tuma

□ Worddo

Xammaqettiyo waanna gaasoy nagaraa oottennaadan nena maaddanaadaana.

□ Tuma

□ Worddo

Xammaqettiyoogee atotettaa demissees.

□ Tuma

□ Worddo

Neeni xammaqettana xayikko, ne oottiyoobawu Xoossaa sinttan oyshettakka.

□ Tuma

□ Worddo

Ne laggeti xammaqettiyoogee, neenikka xammaqettana danddayiyoogaa bessees.

□ Tuma

□ Worddo

NEENI Xoossay kessido maaraa kaalliyaaba, aara dabbotidabanne haratuyyo ne ammanuwaabaa yootiyaaba gidikko, neeni xammaqettanawu qoppanaagee qoncce. SHin neeni hegawu giigidaakkonne waata erana danddayay? Hegaa zaaruwaa eranawu, tuma woy worddo giidi zaariyo, qommoora deˈiya qofa qashota beˈoos.

● Xinqqatee Kiristtaanetuppe koyettiyaaba.

Tuma. Yesuusi ba erissiyo ashkkarati xammaqettanaadan azaziis. (Maatiyoosa 28:19, 20) Ubba, Yesuusikka ba dosan xammaqettiis. Neeni Kiristtoosa kaallanawu, hegaa kuuyana danddayiyoonne yaatanawu wozanappe koyiyo wodiyan xammaqettana bessees.

● Xammaqettiyo waanna gaasoy nagaraa oottennaadan nena maaddanaadaana.

Worddo. Xammaqettiyo wode, ne huuphiyaa Yihoowawu sheedhdhidoogaa asaa bessaasa. He caaqoy, neeni dosiyaaba gidikkonne oottana danddayennabaa oottennaadan maacettido maachcha mala gidenna. Ne huuphiyaa Yihoowawu sheedhdhiyoy A maaraadan deˈanawu koyiyo gishshataassa.

● Xammaqettiyoogee atotettaa demissees.

Tuma. Xammaqettiyoogee atotettawu keehi koshshiyaaba gidiyoogaa Geeshsha Maxaafay yootees. (1 PHeexiroosa 3:21) Hegaa giyoogee, xammaqettiyoogee nena sohuwaara ashsheesinne naagees giyoogaa gidenna. Neeni Yihoowa siiqiyoonne merinawu ayyo oottanawu koyiyo gishshawu xammaqettaasa.—Marqqoosa 12:29, 30.

● Neeni xammaqettana xayikko, ne oottiyoobawu Xoossaa sinttan oyshettakka.

Worddo. Yaaqooba 4:17y “lo77obaa oottanau eriiddi oottenna urau hegee nagara” gidiyoogaa yootees; xammaqettin xammaqettana xayin hegee tuma. Yaatiyo gishshawu, neeni likke gididabaa eriyaanne ne deˈuwan ay oottanaakko eriya gastta gidikko, nena yelidaageetuura woy ayyaanaaban mino ishaara woy michcheera haasayiyoogee loˈˈo. Yaatiyoogee neeni xammaqettanawu oottana koshshiyaabaa akeekanawu maaddees.

● Ne laggeti xammaqettiyoogee, neenikka xammaqettana danddayiyoogaa bessees.

Worddo. Xammaqettanawu kuuyiyoogee neeni wozanappe koyada oottana bessiyaaba. (Mazamure 110:3) Hegaa gishshawu, neeni xammaqettana koshshiyoy xammaqettidi Yihoowa Markka gidiya urappe koyettiyaabaa akeekiyoonne he aawatettaa ekkana danddayiyoogaa ammanettiyo wodiyaana.—Eranchchaa 5:4, 5.

Xammaqettiyoogee Ne Deˈuwaa Laammees

Xammaqettiyoogee ne deˈuwaa laammiyaabanne daro anjjuwaa demissiyaaba. SHin neeni Yihoowawu gelido qaalaa naagiyoogeekka gita aawatetta.

Yaatin, ne huuphiyaa sheedhdhanawu giigettadii? Yaatikko, hegee keehi ufayssiyaaba. Yaatikko, neeni Yihoowawu oottiyoonne ne deˈuwan A siiqiyoogaa bessiyo gishshawu keehi ufayttana.—Maatiyoosa 22:36, 37.

KAALLIYA SHEMPPUWAN Ne deˈuwan loˈˈobaa oottanawu waata halchchana danddayiyaakko akeeka.

WAANNA XIQISIYAA

“Intte asatettaa Xoossaa ufaissiya de7onne geeshsha yarshsho oottidi, Xoossau [shiishshite], . . . Xoossau intte goinnanau bessiya tumu ogee hegaa.”—Roome 12:1.

ZORIYAA

Neeni Yihoowaara dabbotaa minttanaadan maaddiya ura demmanaadan nena yelidaageeti maaddana danddayoosona.—Oosuwaa 16:1-3.

HAGAA ERAY . . .

Xinqqatee Armmageedoona olaappe attanawu keehi koshshiyaaba.—Hizqqeela 9:4-6.

OOTTANABAA!

Taani xammaqettanawu giiga uttanawu, hagaappe kaallidi deˈiya Geeshsha Maxaafaa timirtteta eranawu koyays:․․․․․

Ha qofaa xeelliyaagan tana yelidaageeta oychchanawu koyiyoobaa․․․․․

NE QOFAY AYBEE?

● Xinqqatee kuuyana bessiya gitaba gididoy aybissee?

● Issi issi yelagati eesuwan xammaqettiyoy aybissee?

● Issi issi yelagati xammaqettanawu koyennay aybissee?

[Qonccissuwaa]

Taani xammaqettidoogaa eriyoogee loˈˈobaa kuuyanaadaaninne iitabaa kaalettiyaabaa oottennaadan maaddiis.’’—Holi

[Saaxiniyaa/Misiliyaa]

xinqqatiyaabaa oychchiyo oyshata

Xammaqettiyoogee ay bessii? Neeni haattan muukettada kiyiyoogee ne sheniyan deˈido deˈuwawu hayqqada Yihoowa sheniyaa oottanawu deˈiyoogaa doommidoogaa bessiyaaba.

Ne huuphiyaa Yihoowawu sheedhdhiyoogaa giyoogee woygiyoogee? Hegee neeni ne deˈuwaa Yihoowawu sheedhdhanawunne ayyo oottanawu qaalaa gelaasa giyoogaa. (Maatiyoosa 16:24) Yaatiyo gishshawu, neeni xammaqettanaappe kasetada ne huuphiyaa ayyo sheedhdhidoogaa woosan Yihoowawu odana bessees.

Neeni xammaqettanaappe kasetada waatana koshshii? Xoossaa Qaalaara maayettiya ogiyan deˈananne ne ammanuwaabaa haratuyyo yootana bessees. Qassi woossiyoogaaninne Xoossaa Qaalaa xannaˈiyoogan aara ne dabbotaa minttana bessees. Harati iisettido gishshawu gidennan, wozanappe koyada Yihoowawu oottana bessees.

Layttay woqqaa gidiyo wode xammaqettana bessii? Keehi koshshiyaabay layttaa gidenna, shin ne huuphiyaa Yihoowawu sheedhdhiyoogee woygiyoogaakko loytta akeekana koshshees.

Neeni xammaqettanawu koyinkka nena yelidaageeti ne deˈashshanaadan yootikko shin? Eti hegaadan giyoy neeni Yihoowawu haggaaziyoogaa loytta meezetanaadan koyidi gidana danddayees. Eti yootiyoobaa siyada he wodiyan Yihoowaara dabbotaa mintta.—1 Sameela 2:26.

[Saaxiniyaa]

Neeni halchidobaa xaafa

Neeni xammaqettanawu qoppaydda deˈay?

Hagaappe kaallidi deˈiya oyshatanne qofata wotta denttada qoppiyoogan ne dichchaa yigga. Ne zaaruwaa xaafanaappe kase xiqiseta kessada nabbaba.

Yihoowan ammanettiyoogaa ayba ogetun bessaydda deˈay?—Mazamure 71:5. ․․․․․

Iitaa kehaa shaakka eriyoogaa waata bessadii?—Ibraawe 5:14. ․․․․․

Issi gallassan aapputoo woossay? ․․․․․

Aybaa xeelliyaagan woossay, qassi ne woosay neeni Yihoowa siiqiyoogaa waati qonccissii?—Mazamure 17:6. ․․․․․

Loytta woossanawu neeni oottana koyiyoobaa hagaappe garssaara xaafa. ․․․․․

Geeshsha Maxaafaa ay keena wodiyan wodiyan xannaˈay?—Yaasa 1:8. ․․․․․

Buzo xinaatiyan ay ay xannaˈay? ․․․․․

Geeshsha Maxaafaa loytta xannaˈanawu neeni oottanawu koyiyoobata hagaappe kaallada xaafa. ․․․․․

Ne haggaazoy ufayssiyaagee? (Leemisuwawu: Geeshsha Maxaafaa baaso timirtteta asawu qonccissana danddayay? Siyanawu koyiya asata zaarettada oychchay? Geeshsha Maxaafaa xannaˈanawu koyiya asa demmada xannaˈissanawu halchchay?)

□ Ee □ CHii

Intte soo asay haggaazennaba gidikkokka haggaazay?—Oosuwaa 5:42.

□ Ee □ CHii

Haggaazuwaara gayttidaagan halchchiyoobaa hagaappe kaallada xaafa.—2 Ximootiyoosa 2:15. ․․․․․

Gubaaˈe shiiquwaa aggennan shiiqayiyye issi issitoo shiiqay?—Ibraawe 10:25. ․․․․․

Neeppe koyettiyaabaa shiiquwan ayba ogetun oottay? ․․․․․

Intte so asay baana danddayenna wodekka gidin shiiquwaa bay (so asay nena diggennaba gidikko)?

□ Ee □ CHii

Xoossaa sheniyaa oottiyoogaa keehi dosay?—Mazamure 40:8.

□ Ee □ CHii

Neeni laggetuppe gakkiya paaciyaa eqettido ginata xaafana danddayay?—Roome 12:2. ․․․․․

Yihoowa wozanappe siiqaydda deˈanawu ay oottuutee?—Yihudaa 20, 21.․․․․․

Intte soo asaynne ne laggeti aggikkokka, neeni Yihoowawu haggaazuutee?—Maatiyoosa 10:36, 37.

□ Ee □ CHii

[Misiliyaa]

Xammaqettiyoogee nuuni akeekan qoppidi kuuyana bessiyaaba