ANAMATHELANA
3: Ottittimihana
ELE ENTAPHULELA AYA
Anamathelana anittittimihana annithokoreryana saana, hata okathi anivaanyihana aya. Eliivuru emosa Ten Lessons to Transform Your Marriage (Itthu Muloko Sinrukunuxa Ekasamento) enihimya so: “Anamathelana awo khaniixoona okhala ootthuneyaxa vahineemererya aya olevelelana. Ohiya-vo, awo annilavula voohimya sa mixankiho saya. Anniwiriyana muupuwelo wa ole othelanne aya ni anniphavelasa inamuna sa ophuka muxankiho aya ni murettele”.
ELE BIIBILIYA ONIHIMYA AWE: “Ole omphenta . . . khamphavela murerelo awe”.—1 aKorinto 13:4, 5.
“Kinninvaha efaita mwaaraka ni ohipaka etthu yaarowa omuriipiha murima nnakhala ohonona ekasamento ahu”.—Micah.
XEENI VANIREERELA AYA?
Anamathelana yaahittittimihaneke pooti opaceryaka oveehana, oruwanana ni othanyana. Asomi anihimya wira eyo ethoonyeryo yoowi ekasamento eyo kherina mahiku.
“Omuramusa, omunyoholela wala omuulihiha muru mwaarinyu onoomwiiriha okhulumuwa, ohiivaha efaita ni ohoororomelani. Nave-tho eyo enoohonona ekasamento anyu”.—Brian.
ETTHU YOOPAKA
MWIIKOHEKE SO:
Muhina mwa esumana emosa, nvareryeke moolumo anyu ni sowiira sanyu. Nuumala-vo mwiikoheke so:
-
‘Ikwaha kavi kinveehale aka mwaaraka ni ikwaha kavi kimuttottopenle aka?’
-
‘Exeeni epanke aka wala olavula yoonihenrye wira kinnimuttittimiha mwaaraka?’
MUTHOKORERYE MAKOHO ALA NI OLE OTHELANNE ANYU
-
Etthu xeeni wala moolumo xeeni akhanle oomwiiriha ole othelanne aka woona wira kinnimuttittimiha?
-
Etthu xeeni wala moolumo xeeni akhanle oomwiiriha ole othelanne aka woona wira nkimmuttittimiha?
MIRUKU
-
Mulepe inamuna tthaaru mwaaphavela anyu wooniheriwa nttittimiho. Munvekele ole othelanne anyu wira opake etthu emosaru. Nuumala-vo, muturukane ilista ni khula mutthu iimananiheke wooniherya nttittimiho ntoko silempwale aya mulistani.
-
Mpake elista ya mikhalelo sinoosivelani orina awe mwaarinyu wala iyanyu. Nuumala-vo mmuleeleke wira munnisiveliwa vanceene ni mikhalelo sawe.
“Omuttittimiha iyaka ontaphulela wira sowiira saka sinnooniherya wira kinninvaha efaita ni kiniphavela wira ohakalaleke. Miteko iyo pooti ohikhala suulupale, maana ikwaha sikina miteko saamukhaani soowaatta pooti wooniherya nttittimiho nuulupale”.—Megan.
Etthu yuulupale khahiyo hiyo wiixoona okhala mutthu oottittimiha, masi nihaana oweha akhala wira ole othelanne ahu onnoona wira onnittittimihiwa.
ELE BIIBILIYA ONIHIMYA AWE: “Mukuxe murima w’othunku, murima worera, wowiyeviha, womàla ni wovilela”—aKolosi 3:12.
