AMIRAVO
12: Okhalana Soolukama
ELE ENTAPHULELA AYA
Okhalana soolukama khonlikana ni oloha. Soolukama sekeekhai sinihela muhina ompaka palano, wiixaakuviha, ni ovara muteko ni nthiti.
Soolukama pooti okhala sa okathi vakhaani (seiye siniviriha mahiku wala isumana wira siiraneye), soolukama sa okathi munceene (siniviriha myeeri), ni soolukama sa okathi munceenexa (sinimala mwaakha wala myaakha sinceene). Soolukama sa okathi munceenexa, pooti wiiraneya nuumala okhumelela soolukama sinceene sa okathi vakhaani.
XEENI VANIREERELA AYA?
Okhalana soolukama onoowiirihani wiiroromela, olipiha opatthani ni woohakalalihani.
Wiiroromela: Okathi munikhalana anyu ni omaleliha soolukama sanyu saamukhaani, eyo ennoororomelihani wira munoowerya omaleliha soolukama sanyu suulupale. Nave-tho, munniiroromela okathi munikhalana anyu mixankiho sa khula nihiku, ntoko okhanyereriwa opaka itthu soonanara ni amiravo akhwiinyu.
Apatthani: Atthu anceene waasivela okhalana mpatthani orina soolukama, onisuwela eniphavela awe ni oniimananiha wira omalelihe soolukama sawe. Tivonto, ovara muteko ni mutthu murina anyu soolukama simosaru onnilipiha opatthani.
Ohakalala: Vaavo munikhalana anyu ni omaleliha soolukama sanyu, munnihakalala.
“Okisivela okhalana soolukama. Eyo ennikikhaliherya okhalana etthu yoovara wira kimalelihe yoolukama aka. Nave okathi munimaleliha anyu yoolukama, munnihakalala munahimya so: ‘Moone, koowerya opaka ela! Koohakalala okhala wira koowerya’”.—Christopher.
ELE BIIBILIYA ONIHIMYA AWE: “Ole onlipelela okathi worerexa n’ipheyo yorerexa wira àle ipyó sawe, onnimalela ohàla etthu, nnákhala ohepha”.—Musuweli 11:4.
ETTHU YOOPAKA
Iponto sinittharelana sinimookhaliheryani opaka ni omaleliha soolukama sanyu.
Mphaveleke osuwela. Mpakeke elista ya soolukama sanyu, mwiimananiheke opacerya omaleliha soolukama sootepa otthuneya, nuumala-vo muroweleke sa nenli, sa neeraru, mpakha omaleliha sotheene.
Mumpakeke palano. Wa khula yoolukama anyu, mpake itthu sinittharelana:
-
Musuweleke okathi onrowa ovira.
-
Itthu sikina sinihela muhina.
-
Itthu sikhanle owooceelihani, ni moota mukhanle anyu oosyaka.
Nvareke. Muhilipeleleke osuwela itthu sotheene, wira mpacerye ovara muteko. Mwiikoheke so: ‘Etthu xeeni enireerela opacerya ovara wira kimalelihe yoolukama aka?’ Nuumala-vo, nvareke yeeyo. Mmaleliheke khula etthu moovarihana ni okathi aya.
ELE BIIBILIYA ONIHIMYA AWE: “Ovara muteko n’utthokelela, onnisarya nikuphi”.—Miruku 21:5.
