ESUNGA LIECI VAMUE VA KUETELE ATATAHÃI: Omanu valua va sima okuti Suku wa tenda lika omanu ndolondingakandu, va vĩha kuenda ka va sesamẽla oku va kapako. Ukãi umue o tukuiwa hati, Kendra, okuti wa siata oku liyaka locitangi cenyumalo, wa enda oku livetela evelo omo ka tẽlele vali oku pokola ciwa kolonumbi via Suku. Omo liaco, wa popia hati, “Nda liwekapo oku likutilila.”

CECI ONDAKA YA SUKU YI LONGISA: Yehova ka vanji kekambo liove lioku lipua kuenda wa kũlĩha ciwa ekalo liove. Embimbiliya li popia hati: “Momo wa kũlĩha ovatimba etu, ivaluka okuti tuneketela.” Handi vali ka lingile letu “ndeci ca soka lovakandu etu,” pole eci tu likekembela akandu etu, o tu ecela eci lohenda.—Osamo 103:10, 14.

Kũlĩhĩsa ulandu wa soma Daviti wo ko Isareli una wa tukuiwa kocipama catete corevista eyi. Vohutililo yaye ku Suku wa popia ndoco: “Ovaso ove a ndete eci ovimatamata vietimba liange ka via lulikiwile handi. Velivulu liove ... Ñulĩhise, a Suku. Kũlĩha utima wange.” (Osamo 139:16, 23) Daviti wa kũlĩhile okuti ndaño wa linga ekandu olonjanja vialua—Yehova o pondola oku limbuka oku likekembela—kuaye lutima wosi.

Yehova eye lika wa kũlĩhile ciwa ekalo liove okuti omunu ci sule. Embimbiliya li popia hati: “Omunu o vanja okumõleha kuokilu, Yehova puãi o vanja vutima.” (1 Samuele 16:7) Suku wa kũlĩha esunga lieci o kuetele ovituwa evi. Handi vali—wa kuihavo ndomo ovituwa wa piñala kolonjali viove, ekalo wa kula lalio, ocitumãlo wa kulila, lovituwa viove vi pondola oku pongolola omuenyo wove. Eye oku lete kuenda wa kapako elikolisilo o kasi oku linga lioku kuata ovituwa viwa ndaño olonjanja vimue wa siata oku lueya.

Suku o kuama ndati ukũlĩhĩso a kuete wa tiamẽla kokuove oco a ku lembeleke?