E tiaturi anei oe i te Atua?
EAHA to huru ia rave te hoê hoa piri roa i te tahi mea ta oe e ore e taa? Ia parau mai vetahi e e taata ino oia, e farii anei oe aore ra e tiai i ta to hoa e faatia ˈtu? Mai te peu e aita o ˈna i reira, e tiai iho â oe i ta ˈna e faataa ˈtu no te ite i te tupuraa mau.
Hou a pahono ai, ia ite iho â oe i tei tupu. E uiui paha ïa oe, ‘Ua matau mau anei au ia ˈna? No te aha oia i riro ai ei hoa piri no ˈu?’ A feruri na râ: E tano atoa anei ia uiui mai tera no te ite mea ino anei te Atua?
Mea fifi paha ia maramarama i te tahi mau haaraa a te Atua aore ra e mea huru ê ia ite e te vaiiho nei oia i te ati ia tupu. E rave rahi atoa hoi tei parau atu e mea ino te Atua. E tiai anei oe i ta te Atua e parau mai? Hou a farii ai i to vetahi ê manaˈo, e titauhia ia ite atu â oe. A ui na, ‘Eaha ta te Atua i ho mai?’
E ere anaˈe te oraraa i te mea oaoa, e manaˈo paha ïa oe e ere te Atua i te hoa maitai. A feruri na râ maa taime. E ere o ˈna te tumu o te mau fifi o te oraraa, o te mau oaoaraa râ. Mai tei parauhia ˈtu na, o Satani “te arii o teie nei ao” e ere o Iehova. (Ioane 12:31) O Satani ïa te faatupu nei i te mauiui e te ino. O tatou atoa paha aore ra te mau tupuraa manaˈo-ore-hia te tumu o te mau fifi.
E ere o ˈna te tumu o te mau fifi o te oraraa, o te mau oaoaraa râ
Eaha râ ta te Atua i horoa mai? A hiˈo na i ta te Bibilia e parau ra, o te Atua “te hamani i te mau raˈi e te fenua nei,” oia atoa to tatou tino, tei ‘taa ê hoi te hamaniraahia.’ Hau atu â, tei roto i te rima o te Atua ra Iehova to aho. (Salamo 124:8; 139:14; Daniela 5:23) Eaha ïa te auraa?
No ˈna ïa to tatou ora e aho i te mea e o ˈna te Atua Poiete. (Ohipa 17:28) Mai te ora, te nehenehe o te mau mea e haaati ra ia tatou, te mau maitai o te here e auhoaraa e tae roa ˈtu i te oaoa ia amu i te maa, ia tauahi i tei herehia e tatou, ia faaroo i te pehe e ia hauˈa i te noˈanoˈa o te tiare, e ô anaˈe ïa no ǒ mai i te Atua. (Iakobo 1:17) E ere anei ïa oia i te Hoa maitai roa e te tia ia tiaturihia?
Mea fifi râ paha no oe ia na reira. Peneiaˈe no te mea aita oe i matau maitai atu. Aita i faaite-pauroa-hia ˈtu te mau tumu e manaˈo ai te taata e mea ino te Atua. No te aha e ore ai e tutava i te ite atu â no nia ia ˈna? * Ma te na reira, e ite oe i te parau mau a matau roa ˈtu ai. E taa ïa ia oe e e ere oia i te mea ino e “e aroha hoi te Atua.”—Ioane 1, 4:8.
^ No te ite atu â no te aha te Atua e vaiiho noa ˈi ia tupu te ino, a hiˈo i te pene 11 o te buka Eaha ta te Bibilia e haapii mau ra? piahia e te mau Ite no Iehova.
