Ei haerea mauruuru noa to tatou
Ravea 3
Ei haerea mauruuru noa to tatou
EAHA TA TE BIBILIA E HAAPII RA? “E haamaitai i te Atua i te mau mea atoa ra.”—Tesalonia 1, 5:18.
EAHA TE FIFI? E mea teoteo e te mauruuru ore te rahiraa o te taata. Oioi paha ïa tatou i te pee ia ratou. (Timoteo 2, 3:1, 2) E manaˈo paha tatou e e mea tia ia faaô i te tahi atu â ohipa i roto i to tatou oraraa huehue. No te mau fifi iti rahi aore ra no te haapao-noa-raa tatou ia tatou, aita paha e taime no te mauruuru i ta tatou e fanaˈo nei aore ra no te haamauruuru i ta vetahi ê e rave ra no tatou.
EAHA TE RAVE? A faataa i te taime no te feruriruri i te mau mea maitai ta oe e fanaˈo nei. Ua teimaha paha ïa oe i te mau fifi. A hiˈo na râ i te arii Davida. I te tahi mau taime, ua ahoaho roa oia e ua taiâ to ˈna aau i te mau tamataraa. Ua pure râ oia i te Atua: “Te imi nei au i te mau ravea hanahana na oe ra; te feruri noa nei au i te mau ohipa a to rima.” (Salamo 143:3-5) Noa ˈtu te mau tamataraa, e haerea mauruuru noa to ˈna.
A feruri i ta vetahi ê i rave no te tauturu ia oe, e a haamauruuru ia ratou. E hiˈoraa faahiahia Iesu. I to to ˈna hoa o Maria niniiraa i te monoˈi moni rahi i nia i to ˈna upoo e avae, ua ui vetahi: “Eaha i haamâuˈahia ˈi teie nei monoˈi?” * No te feia faahapa, ia hoohia ïa te monoˈi e ia horoahia te moni no te feia veve. Ua pahono Iesu: “Vaiiho noa ˈtu ia ˈna, eaha outou i haapeapea ˈtu ai ia ˈna? . . . Ua rave hoi oia i te vahi i tia ia ˈna.” (Mareko 14:3-8; Ioane 12:3) Ua faaite Iesu i te mauruuru no ta Maria i rave, eiaha no ta ˈna i ore i rave.
Te haafaufaa nei vetahi i te utuafare, hoa, e i ta ratou e fanaˈo nei ua ere anaˈe ratou i te reira. A feruriruri ïa i teie nei i ta oe e fanaˈo nei! E nehenehe oe e feruri aore ra e papai i te mau mea ta oe e mauruuru ra.
I te mea e no ǒ mai “te mau mea maitai i ho-mai-hia mai” i te Atua ra, e haamauruuru anaˈe ïa ia ˈna na roto i te pure. (Iakobo 1:17) Ia na reira noa tatou, ei feruriraa mauruuru ïa to tatou e e faahotu tatou i te mauruuru.—Philipi 4:6, 7.
[Nota i raro i te api]
^ I te senekele matamua, e niniihia te monoˈi i nia i te upoo o te hoê manihini ei tapao no te farii maitai e i nia i te avae ei haerea haehaa.
[Hohoˈa i te api 6]
Te faaite ra anei oe i te mauruuru no ta vetahi ê e rave ra no oe?
