UMO TIKUKHALIRA sono ndimo Chiuta wakakhumbiranga yayi. Chiuta wakakhumbanga kuti charu chose chapasi chizure na ŵanthu awo ŵakumuchindika, ŵakulondezga malango ghake, kweniso ŵakulongora chitemwa nga ndiyo. Wakakhumbangaso kuti ŵanthu ŵaŵe ŵakukolerana mu banja, ŵasambirenge vinthu viphya, kweniso ŵazgore charu chose kuŵa paradiso.

• “Wakulekeska nkhondo pa charu chose chapasi.”—Salimo 46:9.

• “Nyengo yakutemeka yikiza yakuti . . . muparanye awo ŵakunanga charu chapasi.”—Chivumbuzi 11:18.

• “Pazamuŵavya munthu wakukhala mu charu uyo wazamuti: ‘Nalwara.’”—Yesaya 33:24.

• “Ŵakusoleka ŵane ŵazamusangwa fikepo na mulimo wa mawoko ghawo.”—Yesaya 65:22.

Kasi mauchimi agha ghazamufiskika wuli? Chiuta wali kusankha Mwana wake Yesu, kuti waŵe Fumu ya boma ilo lizamulamulira pa charu chapasi kufuma kuchanya. Baibolo likuti boma ili likuchemeka Ufumu wa Chiuta. (Daniyeli 2:44) Pakuyowoya za Yesu, Baibolo likuti: “Chiuta wazamumupa chitengo. . . . Wazamuwusa nga ni Themba.”—Luka 1: 32, 33.

Apo Yesu wakaŵa pa charu chapasi, wakachita minthondwe yinandi kulongora kuti apo wazamulamulira mu Ufumu wa Chiuta, ŵanthu ŵazamukhala makora chomene kuluska umo ŵakukhalira pasono.

• Wakachizganga mtundu uliwose wa nthenda, kulongora umo wazamumazgira matenda.—Mateyu 9:35.

• Wakalekeska chimphepo pa nyanja, kulongora umo wazamuvikilira ŵanthu ku masoka gha chilengiwa.—Mariko 4:36-39.

• Wakalyeska ŵanthu masauzandi ghanandi, kulongora kuti wazamuŵapa ŵanthu ivyo vikukhumbikwa pa umoyo.—Mariko 6:41-44.

• Wakazgora maji kuŵa vinyo pa ukwati, kulongora kuti wazamovwira ŵanthu kuti ŵakondwenge na umoyo.—Yohane 2:7-11.

Kasi mungachita wuli kuti muzakasange umoyo uwo Yehova walayizga ŵanthu awo ŵakumutemwa? Pali “nthowa” iyo mukwenera kwendamo. Baibolo likuti nthowa iyi ni “nthowa yichoko iyo yikuya ku umoyo, ndipo mbachoko awo ŵakuyisanga.”—Mateyu 7:14.

Kasi nthowa yakuya ku umoyo ni vichi? Chiuta wakuti: “Ine Yehova, ndine Chiuta winu, Uyo wakumusambizgani kuti musange chandulo, Uyo wakumulongozgani mu nthowa iyo mukwenera kwendamo.” (Yesaya 48:17) Usange mukwenda munthowa iyo Chiuta wakumulongozgani, muzamusanga umoyo uwemi.

Yesu wakayowoya kuti: “Ine ndine nthowa, unenesko, na umoyo.” (Yohane 14:6) Kuti tiŵe paubwezi na Chiuta kweniso kuti tizakasange umoyo uwemi, tikwenera kugomezga unenesko uwo Yesu wakasambizganga na kulondezga chiyelezgero chake.

 Kasi mungayisanga wuli nthowa yakuya ku umoyo? Pa charu pali visopa vinandi, kweni Yesu wakachenjezga kuti: “Ni waliyose yayi uyo wakuyowoya kwa ine kuti, ‘Fumu, Fumu,’ wazamunjira mu Ufumu wa kuchanya, kweni yekha uyo wakuchita khumbo la Adada awo ŵali kuchanya.” (Mateyu 7:21) Iyo wakayowoyaso kuti: “Muŵamanyenge na vipambi vyawo.” (Mateyu 7:16) Baibolo lingamovwirani kuti mumanye chisopa chaunenesko na chautesi.—Yohane 17:17.

Kasi mungachita wuli kuti mwende pa nthowa yakuya ku umoyo? Mukwenera kumumanya uyo wakatipa umoyo. Kasi iyo ni njani? Kasi zina lake ni njani? Kasi tingamulongosora wuli? Kasi wakutichitira vichi? Kasi wakukhumba ise tichitenge vichi? *

Yehova wakukhumba kuti ŵanthu ŵachitenge chinthu chinyake padera pa kugwira waka ntchito, kurya, kuseŵera, na kupwelelera banja. Wakukhumba kuti timumanye na kuŵa nayo paubwezi. Tingalongora kuti tikumutemwa Chiuta para tikuchita khumbo lake. Yesu wakati: “Kuti ŵaŵe na umoyo wamuyirayira, ŵakwenera kumumanyani imwe Chiuta waunenesko yekha.”—Yohane 17:3.

Kuti mukondweske Chiuta waunenesko yekha, mukwenera kusintha vinthu vinyake. Nangauli ntchakusuzga kuchita nthena, kweni umoyo winu uzamuŵa uwemi para mwamba kwenda pa nthowa yakuya ku umoyo. Kuti ŵamovwirani kusanga mazgoro gha mafumbo ghakukhwaskana na Chiuta, Ŵakaboni ŵa Yehova ŵakusambizga ŵanthu Baibolo kwaulere panyengo na malo agho imwe mungatemwa. Kuti mumanye vinandi vya ise lutani pa webusayiti yithu ya www.isa4310.com.