Chiuta wakaphalira Adamu kuti, “pa zuŵa ilo uzamulyera [vya mu khuni ili] uzamufwa nadi.” (Genizesi 2:17) Viŵenge kuti Chiuta wakalenga Adamu kuti wachekurenge na kufwa, mphanyi dango ili likaŵa lambura kupulikikwa. Adamu wakamanya kuti para waleka kurya vya mu khuni ilo wakakanizgika wafwenge yayi.

Pakaŵavya chifukwa chakuti Adamu na Eva ŵalyere vipambi vya mu khuni ilo ŵakakanizgika chifukwa mu munda mukaŵa vipambi vinandi viwemi. (Genizesi 2:9) Ŵalekenge kurya chipambi cha mu khuni lakukanizgika mphanyi ŵakalongora kuti ŵakuchindika uyo wakaŵapa umoyo. Mphanyi ŵakalongoraso kuti ŵakumanya kuti Yehova ndiyo ngwakwenelera kuŵaphalira pakati pa chiwemi na chiheni.

Kuti tipulikiske chifukwa icho Adamu na Eva ŵakafwira, tiyeni tiwone nkhani iyo yikukhwaska waliyose wa ise. Satana wakagwiliskira ntchito njoka kuti yiyowoye utesi uheni chomene. Baibolo likuti: “Njoka yikaŵa yakuchenjera chomene kuluska vinyama vyose vyamuthengere ivyo Yehova Chiuta wakapanga. Ntheura yikati ku mwanakazi: ‘Kasi mbunenesko kuti Chiuta wati mungaryanga yayi vipambi vya makuni ghose gha mu munda?’”—Genizesi 3:1.

Eva wakazgora kuti: “Vipambi vya makuni gha mu munda wati tiryenge. Kweni vipambi vya khuni la pakatikati pa munda, Chiuta wati: ‘Mungaryanga yayi, nesi kulikhwaska, chifukwa mungafwa.’” Ndipo njoka yikati ku mwanakazi: “Kufwa mufwenge yayi. Chiuta wakumanya kuti pa zuŵa ilo muzamulyera vya mu khuni ili, maso ghinu ghazamujulika ndipo muzamuŵa nga ni Chiuta, kumanya uwemi na uheni.” Apa Satana wakanenanga Yehova kuti ni mutesi ndipo wakaŵanoranga vinthu viwemi ŵapapi ŵithu ŵakwamba.—Genizesi 3:2-5.

Eva wakagomezga ivyo Satana wakamuphalira. Wakamba kulilaŵisiska khuni lira. Wakawona kuti likaŵa lakukondweska na lakudokeka. Wakatora chipambi chake na kwamba kurya. Ndipo Baibolo likuti: “Pamanyuma, wakapako mfumu wake apo ŵakaŵa lumoza, ndipo nayo wakarya.”—Genizesi 3:6.

Chitima chikamukora chomene Chiuta kuwona ŵana ŵake ŵakutemweka ŵalekera dala kumupulikira. Kasi wakachita wuli? Kwa Adamu, Yehova wakati: ‘Uwelerenge ku dongo, chifukwa ndiko ukatoleka. Ndiwe fuvu ndipo uzamuwelera ku fuvu.’ (Genizesi 3:17-19) Chifukwa cha ivyo Adamu wakachita, “mazuŵa ghose gha umoyo wa Adamu ghakaŵa vyaka 930, ndipo wakafwa.” (Genizesi 5:5) Adamu wakaluta kuchanya yayi panji ku malo gha mizimu. Adamu wakaŵa ku malo ghalighose yayi pambere Yehova wandamulenge kufuma ku fuvu. Ndipo wakati  wafwa, kuŵavya. Wakazgokaso fuvu. Ichi ntchachitima chomene.

Chifukwa chakuti Adamu na Eva ŵakatondeka kupulikira Chiuta, ŵakaŵaso ŵarunji yayi kweniso ŵakataya mwaŵi wakukhala na umoyo wamuyirayira ndipo ŵakamba kuchekura. Kwananga kwawo kukakhwaska iwo pera yayi chifukwa ŵana awo ŵakababa ŵakatolerako kwananga kwawo. Lemba la Ŵaroma 5:12 likuti: “Kwananga kukanjira mu charu na munthu yumoza [Adamu] ndipo nyifwa yikiza chifukwa cha kwananga. Ntheura nyifwa yikathandazgikira ku ŵanthu wose chifukwa wose ŵakananga.”

Baibolo likulongosora kuti kwananga na nyifwa ni “chibenekelero icho chabenekelera ŵanthu wose na chidiko icho chatandazgika pa mitundu yose.” (Yesaya 25:7) Chibenekelero ichi chabenekelera ŵanthu wose nga ni nyakhuŵinda wa poyizoni uyo palije munthu uyo wangagwentha. Nadi, “mwa Adamu wose ŵakufwa.” (1 Ŵakorinte 15:22) Nase tingajifumba nga ni mpositole Paulosi kuti: “Ni njani wanithaskenge ku thupi ilo likunitolera ku nyifwa iyi?” Kasi walipo uyo wangatithaska?—Ŵaroma 7:24.