Varhoma 4:1-25
4 Loko swi ri tano, xana Abrahama kokwa wa hina u vuyeriwe hi yini?
2 Loko Abrahama a vuriwe loyi a lulameke hikwalaho ka mitirho yakwe, a a ta va ni xivangelo xo tibuma, kambe ku nga ri eka Xikwembu.
3 Xana tsalwa ri ri yini? “Abrahama u ve ni ripfumelo eka Yehovha* kutani a vuriwa lowo lulama hikwalaho ka sweswo.”+
4 Eka loyi a tirhaka, muholo wakwe i hakelo ya ntirho wakwe, a hi nyiko.*
5 Kasi loyi a nga tirhiki kambe a ri ni ripfumelo eka Xikwembu lexi ku nga xona, xi nga vulaka leswaku munhu la nga lulamangiki u lulamile, u ta tekiwa a ri la lulameke hikwalaho ka ripfumelo rakwe.+
6 Davhida na yena u vulavula hi ntsako wa munhu loyi Xikwembu xi n’wi vulaka lowo lulama hambiloko a nga swi tirhelanga, u ri:
7 “Va tsaka lava rivaleriweke swihoxo swa vona ni lava swidyoho swa vona swi funengetiweke;
8 wa tsaka munhu loyi Yehovha* a nga ta ka a nga xi tsundzuki xidyoho xakwe.”+
9 Xana ntsako lowu wu kumiwa hi vanhu lava yimbeke ntsena kumbe wu kumiwa ni hi vanhu lava nga yimbangiki ke?+ Hikuva hi ri: “Ripfumelo ra Abrahama ri endle leswaku a vuriwa lowo lulama.”+
10 Ri endle leswaku a vuriwa lowo lulama ehansi ka swiyimo swihi? Xana hi loko a yimbile kumbe a nga si yimba? A a nga si yimba.
11 U kume mfungho+ ku nga ku yimba, leswi a swi tiyisekisa mhaka ya leswaku u vuriwe lowo lulama hikwalaho ka ripfumelo leri a veke na rona a nga si yimba. Leswi swi ve tano leswaku a ta va tata wa hinkwavo lava nga ni ripfumelo+ va nga yimbanga, leswaku va ta vuriwa lavo lulama;
12 nileswaku a ta va tata wa vana lava yimbeke, ku nga ri wa lava yimbeke ntsena kambe ni wa lava landzelaka mikondzo ya ripfumelo ra tata wa hina Abrahama+ loko a nga si yimba.
13 Hikuva Abrahama kumbe vana* va yena a va kumanga xitshembiso xa leswaku va ta va vadyandzhaka va misava hikwalaho ka nawu,+ kambe va xi kume hikwalaho ka ku lulama ni ripfumelo.+
14 Loko lava landzelaka nawu va ri vadyandzhaka, ripfumelo a ri nga ta pfuna nchumu naswona xitshembiso a xi nga ha ta vula nchumu.
15 Nawu wu tisa vukarhi bya Xikwembu+ kambe laha ku nga riki na nawu ni xidyoho a xi kona.+
16 Abrahama u kume xitshembiso hikwalaho ka ripfumelo naswona sweswo swi koteke hikwalaho ka musa lowukulu wa Xikwembu+ leswaku xitshembiso xi ta hetiseka eka vana*+ vakwe hinkwavo, ku nga ri eka lava yingisaka Nawu ntsena kambe ni le ka lava nga ni ripfumelo ro fana ni ra Abrahama, loyi a nga tata wa hina hinkwerhu.+
17 (Leswi swi hilaha swi tsariweke hakona: “Ndzi ku hlawurile leswaku u va tata wa matiko yo tala.”)+ Leswi swi endliwe emahlweni ka Xikwembu lexi a a ri ni ripfumelo eka xona, lexi pfuxaka lava feke ni ku vitana swilo leswi nga riki kona onge hiloko swi ri kona.
18 Abrahama a a nga ha tshembi leswaku a a ta va ni vana kambe hikwalaho ka ripfumelo a a ri ni ntshembo wa leswaku a a ta va tata wa matiko yo tala, hilaha a byeriweke hakona: “Vana* va wena va ta va tano.”+
19 Hambileswi ripfumelo rakwe ri nga tsanangiki, a a teka miri wa yena wu fana ni loko wu file, (tanihi leswi a a ri ni malembe ya kwalomu ka 100)+ nakambe a a swi tiva leswaku Sara a a nga kumi vana.+
20 Kambe hikwalaho ka xitshembiso xa Xikwembu, a nga kanakananga kumbe a heleriwa hi ripfumelo; kambe a a ri ni matimba hi ripfumelo rakwe, a vangamisa Xikwembu
21 ni ku tshemba leswaku leswi xi swi tshembiseke xi ta swi endla.+
22 Hikwalaho, “u vuriwe lowo lulama hikwalaho ka sweswo.”+
23 Hambiswiritano, marito lama nge “u vuriwe lowo lulama” a ma nga tsaleriwanga yena ntsena,+
24 kambe ma tsaleriwe na hina lava hi nga ta vuriwa lava lulameke, hikuva hi pfumela eka Loyi a pfuxeke Yesu Hosi ya hina eka lava feke.+
25 U nyiketiwile leswaku a dlayiwa hikwalaho ka milandzu ya hina+ naswona u pfuxiwile leswaku hi ta vuriwa lava lulameke.+
Tinhlamuselo ta le hansi
^ Vona Xiengetelo A5.
^ Kumbe “musa lowukulu.”
^ Vona Xiengetelo A5.
^ Hi Xigriki, “mbewu.”
^ Hi Xigriki, “mbewu.”
^ Hi Xigriki, “mbewu.”
