Varhoma 3:1-31
3 Xana Muyuda u va tlula hi yini van’wana, kumbe ku yimba swi pfuna yini?
2 Swi pfuna ngopfu hi tindlela hinkwato. Yo sungula, hileswi a va nyikiwe marito yo kwetsima ya Xikwembu.+
3 Xana leswi swi vula yini? Loko van’wana va nga kombisi ripfumelo, xana sweswo swi vula leswaku vanhu a va nge he xi tshembi Xikwembu?
4 Nikatsongo! Hambiloko vanhu hinkwavo vo va vahembi,+ Xikwembu xi ta tshama xi ri ni ntiyiso+ hilaha swi tsariweke hakona: “Leswaku u ta tikombisa u lulamile loko u vulavula naswona u ta hlula loko u avanyisiwa.”+
5 Hambiswiritano, hi ta ku yini loko vubihi bya hina byi kombisa ku lulama ka Xikwembu? Hikwalaho, xana sweswo swi vula leswaku Xikwembu a xi lulamanga loko xi hi xupula? (Ndzi tirhisa marito lama vanhu va ma toloveleke.)
6 Nikatsongo! Loko swi nga ri tano, xana Xikwembu xi ta yi avanyisa njhani misava?+
7 Kambe loko mavunwa ya mina ma swi veka erivaleni leswaku Xikwembu xi ni ntiyiso naswona ma endla leswaku xi vangamisiwa, hikwalaho ka yini ndzi avanyisiwa tanihi mudyohi?
8 Naswona hikwalaho ka yini hi nga vuli hilaha vanhu van’wana va hi lumbetaka leswaku hi vula tano hi ku, “A hi endleni swilo swo biha leswaku ku ta ta swilo leswinene”? Ndlela leyi vanhu volavo va avanyisiwaka ha yona ya va fanela.+
9 Xana swi vula leswaku hina ha antswa? Nikatsongo! Hilaha hi vuleke hakona, Vayuda ni Magriki va le hansi ka xidyoho hinkwavo;+
10 hilaha swi tsariweke hakona: “A ku na munhu loyi a lulameke, ku kala ni un’we;+
11 a nga kona loyi a nga ni ku twisisa ko karhi; a nga kona loyi a lavisisaka Xikwembu.
12 Vanhu hinkwavo va hambukile, hinkwavo a va ha pfuni nchumu; a nga kona munhu loyi a kombisaka musa hambi ku ri un’we.”+
13 “Nkolo wa vona i sirha leri ahlameke; va tirhise ririmi ra vona ku kanganyisa vanhu.”+ “Milomu ya vona yi ni vuxungu bya timhirhi.”*+
14 “Naswona nomu wa vona wu tele nhlambha ni marito yo tlhava.”+
15 “Milenge ya vona yi hatlisela ku halata ngati.”+
16 “Va endla swo biha ni ku twisa van’wana ku vava
17 naswona a va yi tivi ndlela yo kondletela ku rhula.”+
18 “A va xi chavi Xikwembu.”+
19 Kutani ha swi tiva leswaku swilo hinkwaswo leswi Nawu wu swi vulaka swi tirha eka lava nga ehansi ka Nawu, leswaku vanhu hinkwavo va pfariwa nomu ni leswaku misava hinkwayo yi kumeka yi ri ni nandzu emahlweni ka Xikwembu leswaku yi xupuriwa.+
20 Hikwalaho, a nga kona loyi a nga ta vuriwa loyi a lulameke emahlweni ka xona hikwalaho ka ku landzela nawu,+ hikuva nawu wu endla leswaku hi xi tiva kahle xidyoho.+
21 Kambe sweswi handle ko landzela nawu Xikwembu xi kombise ku lulama ka xona,+ hilaha Nawu ni Vaprofeta va vulaka hakona.+
22 Loyi a nga ni ripfumelo eka Yesu Kreste, a nga va la lulameke eka Xikwembu. Hikuva a xi hlawuli munhu.+
23 Hikuva hinkwavo va dyohile naswona va kayivela ku vangama ka Xikwembu,+
24 kutani swi fana ni nyiko ya mahala+ leswi va vuriwaka lava lulameke hi musa wa xona lowukulu,+ hi ku tshunxiwa hi nkutsulo lowu hakeriweke hi Kreste Yesu.+
25 Xikwembu xi n’wi nyikerile a va gandzelo ra ku rivaleriwa swidyoho+ hi ku va ni ripfumelo engatini yakwe.+ Leswi Xikwembu xi swi endlele ku kombisa ku lulama ka xona, hikuva hi ku lehisa mbilu ka xona xi rivalele swidyoho leswi endliweke enkarhini lowu hundzeke.
26 Sweswo a xi swi endlela ku kombisa ku lulama ka xona+ enkarhini wa sweswi, leswaku xi kumeka xi lulamile hambiloko xi vula leswaku munhu loyi a nga ni ripfumelo eka Yesu u lulamile.+
27 Xana hi ni xivangelo xo tibuma? Nikatsongo. Hi nawu wihi? Xana hi lowa mitirho?+ E-e, kambe hi nawu wa ripfumelo.
28 Hikuva ha swi tiva leswaku munhu u vuriwa la lulameke hi ripfumelo ku nga ri hi mitirho leyi fambisanaka ni nawu.+
29 Xana Xikwembu i xa Vayuda ntsena?+ Xana vanhu va matiko a hi Xikwembu xa vona?+ Na vona i Xikwembu xa vona.+
30 Leswi Xikwembu xi nga xin’we,+ xi ta vula vanhu lava yimbeke ni lava nga yimbangiki leswaku va lulamile+ hikwalaho ka ripfumelo ra vona.+
31 Kutani, xana hi herisa nawu hikwalaho ka ripfumelo ra hina? Nikatsongo! Ku ri na sweswo, hi seketela nawu.+
Tinhlamuselo ta le hansi
^ Ku nga muxaka wo karhi wa tinyoka.
