Insait long 30 yia i go pinis, planti manmeri i pilim olsem ol kantri long graun i pas gut wantaim na sindaun bilong ol manmeri i wok long kamap gutpela. Tasol ol hevi i kamap i no longtaim i go pinis i soim olsem dispela tingting i no tru.

•   “Ol manmeri i wari na tingting planti olsem woa i kamap long Gasa bai putim hevi long ol kantri i stap klostu sapos Israel na Hezbollah i pait long boda bilong Lebanon.”​—Reuters, Janueri 6, 2024.

•   “Ol grup we Iran i sapotim, ol i pait long narapela narapela eria, na kwiktaim Iran i kirap gen long wokim ol nuklia bom. Na tu, nau Iran i stap olsem pren bilong Rasia na Saina. Olgeta dispela samting i mekim na ol kantri long Yurop na Amerika i pret.”​—The New York Times, Janueri 7, 2024.

•   “Rasia i wok yet long pait long Yukren na kamapim ol bikpela bagarap.”​—UN News, Janueri 11, 2024.

•   “Ekonomi na ami bilong Saina i wok long kamap strong, Taiwan i laik tru long stap olsem kantri bilong em yet, na pasin resis namel long Saina na Amerika inap kirapim pait.”​—The Japan Times, Janueri 9, 2024.

 Yu ting Baibel i mekim sampela tok long ol hevi yumi lukim i wok long kamap long olgeta hap bilong graun long nau? Yu ting dispela bai kirapim wol woa?

 Baibel i no kolim stret wanpela woa em yumi lukim long nau. Tasol em i tok profet long ol woa i kamap long olgeta hap we i “tekewe bel isi long graun.”​—Revelesen 6:4.

 Buk Daniel i tok profet olsem “long taim bilong pinis,” ol strongpela gavman bilong graun bai “subim narapela narapela,” o strong long bosim ol narapela. Dispela i makim olsem ol bai soim strong bilong ami bilong ol na tromoi planti “gutpela gutpela samting,” o mani bilong ol.​—Daniel 11:40, 42, 43.

 Baibel i tok profet olsem ol hevi long graun bai i go nogut moa paslain long ol samting i kamap gutpela. Jisas i tok profet olsem “bai i gat traipela hevi tru. Kirap long taim God i wokim graun na i kam inap long nau, kain hevi olsem i no bin kamap.” (Matyu 24:21) Long pinis bilong “traipela hevi tru” wanpela woa bai kamap na Baibel i kolim olsem Armagedon, em pait bilong “dispela bikpela de bilong God i Gat Olgeta Strong.”​—Revelesen 16:14, 16.

 Tasol Armagedon em pait bilong seivim ol manmeri, na i no bilong bagarapim ol. Long rot bilong dispela woa, God bai pinisim wok bilong ol man long bosim graun bikos wok bos bilong ol i kamapim ol woa we i kamapim planti bagarap. Bilong kisim save long hau bai Armagedon i kamapim bel isi inap oltaim oltaim, ritim ol dispela atikol:

•   “What Is the Battle of Armageddon?”

•   “Armagedon Em Samting Bilong Amamas Long En!”