Ol manmeri long olgeta hap bilong graun i karim hevi bilong weda i hot moa winim olgeta taim bipo na ol narapela disasta em hot weda i kamapim. Skelim ol dispela ripot:

•   “Ol i rekodim tempresa bilong mun Jun long dispela yia na ol i tok em i hot moa winim long festaim ol i stat long rekodim ol tempresa long graun olgeta, em olsem inap 174 yia i go pinis.”​—National Oceanic and Atmospheric Administration, U.S. Department of Commerce, Julai 13, 2023.

•   “Itali, Spen, Frans, Jemani, na Polan i gat hevi bilong weda i hot moa winim long bipo, na ol saveman i tok tempresa long ol dispela kantri bai i go antap moa olsem 48 digri Selsias long ailan Sicily na ailan Sardinia. Ating dispela tempresa em i go antap moa winim olgeta narapela taim bipo em ol i bin rekodim ol tempresa bilong weda long Yurop.”​—European Space Agency, Julai 13, 2023.

•   “Taim weda long olgeta hap bilong graun i go hot moa winim long bipo, yumi ekspektim planti ren long pundaun klostu klostu, na dispela bai kamapim ol bikpela tait wara we inap kamapim bikpela bagarap.”​—Stefan Uhlenbrook, dairekta bilong hydrology, wara na cryosphere long World Meteorological Organization, Julai 17, 2023.

 Olsem wanem? Yu wari olsem i gat planti moa ripot i stori long weda i hot moa winim long bipo? Skelim tok Baibel i mekim long dispela samting.

 Yes. Weda i hot moa, planti ren i pundaun, na i gat ol bikpela tait wara. Ol dispela samting i kamap ol i truim tok profet Baibel i mekim long taim bilong yumi. Olsem, Jisas i tok profet olsem yumi bai lukim “ol samting i mekim [yumi] i pret,” o “ol samting i narakain tru na i mekim yumi pret nogut tru.” (Luk 21:11; Good News Translation) Tempresa i go antap moa na dispela i mekim na planti manmeri i pret olsem ol man bai mekim ol samting bilong bagarapim graun.

 Nogat. God i wokim dispela graun bilong yumi ken stap oltaim oltaim long en; em bai i no inap larim ol man i bagarapim dispela graun. (Buk Song 115:16; Eklisiastis 1:4) Em i tok promis long “bagarapim ol man i wok long bagarapim graun.”​—Revelesen 11:18.

 Baibel i soim olsem God bai lukautim graun na ol disasta i no inap bagarapim graun.

•   “[God] i mekim traipela win i pinis; na ol weiv i stap isi na solwara i no kirap moa.” (Buk Song 107:29) God i gat strong long kontrolim ol win na ren samting. Em inap long stretim ol hevi bilong envaironmen we i mekim na ol manmeri long nau i karim hevi bilong tempresa i go antap na ples i hot nogut tru.

•   “Yu save lukautim gut graun, na mekim em i gat planti gris na planti kaikai i kamap.” (Buk Song 65:9) God bai blesim graun bambai em i kamap ples Paradais.

 Bilong kisim sampela save moa long tok promis Baibel i mekim long envaironmen bai kamap gutpela gen, lukim atikol “Who Will Save the Earth?”