Jisas i tokim ol disaipel bilong em olsem: “Yupela bai stap witnes bilong mi . . . i go inap long olgeta hap bilong graun.” (Aposel 1:8) Long nau, Ol Witnes Bilong Jehova i givim bel tru long inapim dispela wok Jisas i tok long en. Tasol long sampela hap bilong graun, na ol hap we i gat planti manmeri tru long en, wok autim tok i no karamapim gut ol dispela hap. Na sampela kantri i gat liklik namba bilong Ol Witnes. (Matyu 9:37, 38) Yumi mekim wanem samting bilong autim tok long planti manmeri moa?

 Bilong mekim dispela wok Jisas i tok long en, Sevis Komiti bilong lain Gavening Bodi bilong Ol Witnes Bilong Jehova i salim ol misineri i go long ol hap i nidim helpim. Long nau yet, i gat 3,090 misineri i stap long graun olgeta. a Planti bilong ol i bin kisim trening long wanpela Baibel skul, olsem Skul Bilong Ol Kingdom Evanselis. Ol misineri i redi long lusim kantri bilong ol na muv i go long narapela kantri. Ol i gat strongpela bilip, ol i kisim trening, na ol i gat ekspiriens, olsem na ol dispela gutpela misineri i helpim wok bilong autim gutnius na ol i stap gutpela eksampel long ol nupela disaipel.

 Long olgeta wan wan brens ofis, Field Minister’s Desk bilong Sevis Dipatmen i wok wantaim Brens Komiti long lukautim ol misineri long ol samting ol i nidim, olsem long sait bilong haus, helt-ke, na liklik alauens bilong baim ol samting ol i nidim. Long sevis yia bilong 2020, Ol Witnes Bilong Jehova i tromoi 27 milion US dola long lukautim ol misineri. Long dispela rot, ol misineri i ken putim tingting na bikpela taim olgeta long mekim wok autim tok, na tu, long strongim kongrigesen ol i stap long en.

 Olsem wanem ol misineri i helpim wok autim tok? Frank Madsen i stap long Malawi Brens Komiti, na em i tok: “Ol misineri i gat strongpela bel na ekspiriens, na ol i helpim ol kongrigesen long autim tok long ol teritori i hatwok long autim tok long en, kain olsem ol komiuniti we ol i gat ol strongpela banis na ol ples we ol man bilong narapela tokples i stap long en. Na tu, ol i wok hat long lainim tokples na kalsa bilong ol asples lain na ol i stap gutpela eksampel long ol narapela, na ol i helpim ol yangpela long putim mak long insait long fultaim sevis. Mipela i tenkim Jehova long ol misineri.”

 Wanpela Brens Komiti memba bilong narapela kantri i tok: “Ol misineri i pruvim olsem ol manmeri bilong Jehova long olgeta hap bilong graun i stap wanbel. Ol lain em ol i no Witnes, ol tu i luksave olsem ol kalsa i no brukim lain namel long yumi, tasol ol tok bilong Baibel i helpim yumi long stap wanbel wantaim.”

 Hau na ol misineri i save helpim ol pablisa long kongrigesen bilong ol? Paulo bilong Timo-Leste i amamas tru olsem i gat 2-pela marit i mekim wok misineri i stap long kongrigesen bilong em. Em i tok: “Ples bilong mipela i hot nogut tru. Maski i olsem, ol misineri em kantri bilong ol i kol, ol i no larim weda i pasim ol long autim tok. Oltaim ol i save stap long bung bilong autim tok long moning. Planti taim mi save lukim ol i mekim ol gobek long belo samting taim san i hot nogut tru, na tu, long ol apinun. Ol i helpim planti manmeri long lainim tok i tru; ol i bin helpim mi tu. Ol i givim bel tru na amamas long yusim laip olgeta bilong ol long mekim wok bilong Jehova, na dispela i strongim kongrigesen olgeta long givim bel tru long lotuim Jehova.”

 Ketti em wanpela painia oltaim long Malawi, na em i stori long hau 2-pela misineri em ol i marit i helpim famili bilong em. Em i tok: “Taim 2-pela marit em ol i misineri i kam long kongrigesen bilong mipela, mi wanpela tasol long famili bilong mi i Witnes. Tasol dispela 2-pela marit i sapotim mi gut, na ol i pas gut tru wantaim famili bilong mipela. Gutpela eksampel bilong ol i helpim ol pikinini bilong mi long luksave olsem ol inap amamas tru taim ol i mekim wok bilong Jehova. Ol i stap gutpela piksa na dispela i kirapim 3-pela pikinini meri bilong mi long mekim wok painia oltaim, na man bilong mi i stat long kam nau long ol miting.”

 Olsem wanem mipela i save lukautim ol misineri long sait bilong mani? Long rot bilong donesen em ol manmeri long olgeta hap i givim, planti i givim donesen long rot bilong donate.isa4310.com. Mipela i amamas tru na tenkim yupela long ol donesen yupela i givim.