FRAN PES STORI | YU TING SATAN I STAP TRU?
Yu Ting Satan Em Man i Stap Tru?
Wanpela stetiu long Madrid, Spen, i soim olsem Satan i wanpela ensel nogut
“Mi go bikpela long El Salvado. Taim mi bikhet, mama bilong mi i save tok,‘Satan bai kam kisim yu!’ Tasol mi save tok, ‘Larim em i kam.’ Mi bilip long God, mi no bilip long Satan.”—ROGELIO.
Yu wanbel long tok bilong Rogelio? Yu ting wanem tok i stap daunbilo i stret?
-
Satan i no man tru, em i makim ol laik nogut.
-
Satan i stap, tasol em i no inap helpim o bagarapim ol man.
-
Satan em wanpela strongpela spirit na em i gat strong long kontrolim ol man.
Ating planti milion man i gat ol dispela kain tingting. Tasol yu ting em bikpela samting long save long wanem tok long Satan i tru? Sapos Satan i no man tru, orait ol man husat i gat kain tingting olsem i bin popaia. Na sapos Satan em man tru, na em i no save mekim wanpela samting long nogutim ol man, orait i nogat as long pret long em. Na tu, sapos Satan em man bilong giamanim ol man, orait em i man nogut tru, tasol planti man i no luksave long ol pasin hait bilong em.
Yumi laik skelim tok bilong Baibel long painim bekim bilong ol dispela askim: Satan i husat? Em man i stap tru o em i makim ol laik nogut? Sapos Satan i stap tru, yu ting em inap mekim sampela samting bilong nogutim yu? Na olsem wanem yu inap sakim Satan?
