TASOL ol man i sapotim pasin bilong ol lotu long bung wantaim i gat narapela tingting long dispela. Eboo Patel, em man i bin kamapim oganaisesen Interfaith Youth Core, em i tok: “Olgeta lotu i tingim olsem em i bikpela samting long soim pasin sori . . . , lukautim envairomen . . . , na mekim gut long ol narapela na helpim ol.”

Tru tumas, lotu Buda, Katolik, Protestan, Hindu, Muslim, na planti arapela lotu ol i wok bung wantaim bilong helpim ol rabisman, kempein long raits bilong ol man, stopim wok bilong ol man long planim ol bom long graun, o kirapim ol man long lukautim envairomen samting. Planti lotu i wok bung wantaim bilong traim long save gut long tingting bilong narapela narapela na strongim narapela. Ol i save mekim ol bung we ol i laitim ol kandel, mekim ol bikpela bung bilong lotu, singsing na beten wantaim na mekim olkain samting olsem bilong selebretim ol kain kain lotu ol i kam long en.

Yu ting pasin bilong ol lotu long bung wantaim inap kamapim pasin wanbel namel long ol? Yu ting em rot God i makim bilong ol manmeri i ken gat gutpela sindaun?

Wanpela bikpela oganaisesen i sapotim pasin bilong ol lotu long bung wantaim i tok ol memba bilong ol i bilong winim 200 narapela narapela lotu na ol i mekim wok insait long 76 kantri. Nambawan wok bilong ol em long “strongim pasin bilong ol lotu long wok bung wantaim.” Tasol i hatwok long mekim olsem. Olsem, ol man i go pas long dispela oganaisesen i tok ol i mas was gut long ol tok ol i raitim long lo pepa na bai ol i no bagarapim bel bilong ol lotu em ol i sainim kontrak. Wai? Wanpela as em olsem, sampela lotu i tok pait olsem ol i no ken raitim wanpela tok i stori long God insait long lo pepa. Olsem na ol i no bin raitim wanpela tok long God.

Sapos ol man i no tingim God, i olsem ol i no gat bilip. Na tu, pasin bilong ol lotu long bung wantaim i wankain olsem ol bikpela oganaisesen em ol i save givim mani o helpim ol man i sot long ol samting. Em as na dispela oganaisesen yumi stori pinis long en ol i no tingim ol yet olsem wanpela lotu, ol i kolim ol yet olsem “wanpela oganaisesen bilong strongim ol man long mekim pasin pren na wok bung wantaim.”

Dalai Lama em wanpela bikman bilong lotu na em i sapotim na insait tru long pasin bilong ol lotu long bung wantaim, em i tok: “Planti bikpela lotu i autim wankain tok tasol: em pasin laikim, pasin sori, na pasin bilong fogivim narapela.” Em i tok moa: “Bikpela samting em yumi mas mekim ol dispela pasin olgeta de long laip bilong yumi.”

Tru tumas, em i bikpela samting long mekim ol gutpela pasin olsem pasin laikim, pasin sori, na pasin bilong fogivim narapela. Planti man i save kolim  tok Jisas i bin mekim olsem Gutpela Lo Tru, Jisas i tok: “Olgeta samting yupela i laik bai ol man i mekim long yupela, yupela i mas mekim long ol.” (Matyu 7:12) Tasol yu ting pasin bilong bilip i makim olsem man i mas mekim ol gutpela pasin tasol?

Aposel Pol i tok long ol man i stap long taim bilong em husat i tok ol i mekim wok bilong God, olsem: “Mi tokaut olsem ol i save givim bel tru long mekim wok bilong God, tasol ol i no gat stretpela save na ol i mekim olsem.” Ol i gat wanem hevi? Pol i tok: “Ol i no save long stretpela pasin bilong em [God], nogat. Long strong bilong ol yet ol i laik kamapim klia olsem ol i stretpela man.” (Rom 10:2, 3) Ol i no gat stretpela save long samting God i laik ol i mas mekim, olsem na pasin bilong ol long givim bel tru na bilip i olsem samting nating.—Matyu 7:21-23.

Jisas i tok: “Ol man bilong mekim i dai kros, ol i ken amamas.” (Matyu 5:9) Jisas i bihainim ol tok em i skulim ol man long en, em i strongim ol man long lusim pasin bilong kros pait na em i autim tok long pasin wanbel long ol man bilong ol narapela narapela lotu. (Matyu 26:52) Ol man husat i harim tok bilong Jisas ol i wanbel wantaim long pasin bilong laikim tru ol narapela. (Kolosi 3:14) Em i klia tru olsem laik tru bilong Jisas em long ol man bilong ol narapela narapela sindaun ol i mas stap wanbel wantaim. Jisas i no bin bung wantaim ol narapela lotu.

Ol bikman bilong lotu bilong lain Farisi na Sadyusi ol i bin birua long Jisas na ol i traim long kilim em i dai. Jisas i mekim wanem? Em i tokim ol disaipel bilong em olsem: “Larim ol. Ol i aipas na ol i laik soim rot.” (Matyu 15:14) Jisas i no laik bung wantaim ol kain man olsem.

Bihain liklik, wanpela kongrigesen i kamap long Korin, long Grik—planti man i save long dispela taun bikos ol man bilong narapela narapela ples na lotu i stap long hap. Ol Kristen i stap long dispela ples ol i mas mekim wanem? Aposel Pol i tok: “Yupela i no ken pas wantaim ol man i no bilip.” Wai? Pol i tok: “Olsem wanem? Krais na Biliel [o Satan] i ken wanbel wantaim? O olsem wanem, wanpela bilipman i ken wok bung wantaim man i no bilip?” Bihain em i tok: “Yupela i mas lusim ol, na stap longwe long ol.”—2 Korin 6:14, 15, 17.

I klia tru olsem Baibel i no orait long pasin bilong ol lotu long bung wantaim. Tasol ating bai yu tok, ‘Hau bai ol manmeri i stap wanbel tru?’

I gat wanpela bikpela satelait (International Space Station) i stap antap tru long skai na i raunim graun bilong yumi, inap 15 kantri i wok bung wantaim long wokim dispela satelait. Wok bilong ol i kamap gut bikos olgeta dispela kantri i wanbel long yusim wanpela plen o menuel bilong pinisim wok.

Em wankain long pasin bilong ol lotu long bung wantaim long nau. Maski ol i wok bung wantaim na rispektim narapela narapela, ol i no gat menuel em ol i wanbel long en bilong strongim bilip bilong ol. Em as na ol pasin na bilip bilong ol i no wankain.

Ol lo bilong God i stap long Baibel na em i olsem menuel yumi ken bihainim. Baibel inap stiaim olgeta samting yumi mekim long laip bilong yumi. Ol man i bihainim tok bilong Baibel, ol i lusim pasin bilong birua long ol man bilong narapela kantri na lotu na ol i lain long wok gut wantaim na stap bel isi na wanbel. God i tok promis olsem: “Bai mi givim wanpela gutpela tokples long ol man, bambai olgeta i ken singaut long nem bilong Jehova, bai ol i ken wok gut wantaim na mekim wok bilong em.” Dispela “gutpela tokples,” em lo bilong God long pasin bilong mekim lotu, i bungim olgeta manmeri na ol i stap wanbel.—Sefanaia 3:9, NW; Aisaia 2:2-4.

Ol Witnes Bilong Jehova i laik singautim yu i kam bung wantaim ol long wanpela Haus Kingdom long hap bilong yu na bai yu ken lukim bel isi na pasin wanbel i stap namel long ol.—Song 133:1.