Estelle * i save go oltaim long lotu wantaim ol pikinini bilong em. Em i tok: “Mi tokim pasto olsem mi laik kisim save long Baibel.” Tasol pasto i no skulim em. Bihain Estelle i no go moa long lotu. Em i tok: “Ol bikman bilong lotu i raitim pas na tok sapos mi no inap go moa long lotu, orait mi mas salim mani i go long sios. Mi tingting, ‘Ol i no bisi sapos mi go lotu o nogat, ol i laikim mani bilong mi tasol.’”

Angelina em meri bilong tingim lotu, i tok: “Long sios bilong mi, long taim bilong lotu ol i save salim basket i go raun 3-pela taim na ol i laik mipela i mas putim mani long olgeta wan wan taim. Oltaim ol i save askim long mani. Mi tingting, ‘God i no stap wantaim ol dispela manmeri.’”

Ol lotu long hap bilong yu i putim presa long ol manmeri i mas givim mani? Yu ting dispela i stret wantaim tok bilong Baibel?

Jisas, man bilong kamapim lotu Kristen, i tok: “Yupela i kisim fri, olsem na yupela i mas givim fri.” (Matyu 10:8) Ol gutpela tok bilong Baibel i no samting bilong baim na ol man i laikim i mas kisim fri.

Olsem wanem ol Kristen bilong pastaim i bin baim ol samting bilong kongrigesen?

Olgeta wan wan man i givim mani em “ol i pasim tok long bel long givim. Ol i no ken bel hevi na givim na narapela i no ken fosim ol long givim, nogat. God i save laikim tumas man i amamas long givim samting.” (2 Korin 9:7) Aposel Pol i tok: “Mipela i bin autim gutnius . . . na mekim wok long san na long nait, bai mipela i no ken givim hevi long yupela long lukautim mipela.” (1 Tesalonaika 2:9) Pol i wokim ol haus sel bilong helpim em long mekim wok autim tok.—Aposel 18:2, 3.

Ol Witnes Bilong Jehova i save mekim miting long ol haus i no gat planti bilas em ol i kolim Haus Kingdom. Ol i save kisim mani we bilong baim ol samting? Ol i no save salim plet i go raun insait long Haus Kingdom o salim ol envelop bilong askim long mani, nogat. Ol manmeri husat i amamas long ol gutpela tok bilong Baibel ol i harim, long laik bilong ol yet ol inap putim mani olsem donesen long kontribiusen boks long Haus Kingdom.

Dispela nius em ol i mas tromoi mani bilong prinim na salim long sip. Maski i olsem, yu no inap lukim edvetaismen bilong dispela nius o ol man i singaut long mani. Bikpela samting em long skulim ol man long tok i tru bilong Baibel.

Yu ting wanem: Samting ol i mekim i stret wantaim tok bilong Jisas na pasin ol Kristen bilong pastaim i bin bihainim?