SIP I RON namel long solwara Atlantik na i go olsem long Yurop. George Young em wanpela pasindia bilong dispela sip, na em i wok long tingting long olsem wanem em i helpim wok bilong Kingdom long Brasil. * Tasol Brata Young i tingim nupela asainmen em bai mekim long kantri Spen na Potugal, em ol ples we tok bilong Kingdom i no go yet long en. Taim em i go kamap long Lisbon, em i tingting long stretim rot bambai Brata J. F. Rutherford i ken mekim ol tok bilong Baibel na tilim 3 handret tausen liklik nius!

Taim Brata Young i go kamap long Lisbon long 1925, em i luksave olsem em taim bilong bikpela hevi. Long 1910, wanpela lain ripablik i pait na pinisim wok bilong famili bilong king long bosim kantri, na tu, ol i mekim na planti man i lusim Misin Katolik. Ol manmeri i kisim fridom, tasol ol man i wok yet long pait long gavman.

Taim Brata Young i stretim rot long Brata Rutherford bai mekim tok, lain ami i kamapim wanpela lo bilong stopim ol lain em ol i traim long bikhet long gavman. Sekreteri bilong lain British and Foreign Bible Society i tokim Brata Young olsem planti man bai birua long em. Sampela man i tok long ol bai bomim ples em Brata Rutherford bai mekim tok long en. Tasol Brata Young i strongim bel na stretim yet ol samting. Em i askim ol long yusim wanpela bilding long Camões Secondary School, na ol i tok orait!

Ol i makim Me 13 olsem de em Brata Rutherford bai mekim tok. Ol manmeri i luk fowed long dispela de! Ol i putim ol sain bot long ol bilding na ol edvetaismen long niuspepa bilong tokaut long nem bilong dispela tok, “How to Live on the Earth Forever.” Ol lida bilong lotu i birua long ol Witnes, na kwiktaim ol i raitim wanpela atikol long niuspepa bilong tokim ol manmeri long no ken putim yau long tok bilong ol “giaman profet.” Ol birua i sanap klostu long dua bilong bilding em Brata Rutherford bai mekim tok long en, na ol i tilim planti tausen buklet i gat ol tok we i pait wantaim ol tok em Brata Rutherford i mekim.

Maski i olsem, planti manmeri i kam long dispela bung. Tasol i no gat spes, olsem na klostu 2 tausen manmeri i stap insait long bilding na harim tok, na ol i salim narapela 2 tausen manmeri i go. Sampela manmeri i hangamap long ol rop em ol i mekim i kamap olsem lata long sait sait bilong bilding; na ol narapela i sindaun long ol samting ol i save yusim long eksasais. Sampela i kam bilong harim tok bilong Brata Rutherford bikos ol i ting olsem em bai salim ol liklik botol i gat marasin em man inap dring bambai em i stap laip oltaim!

Tasol hevi i kamap. Ol birua i singaut na brukim ol sia. Tasol Brata Rutherford i stap isi, na bihain em i go sanap antap long wanpela tebol bambai ol manmeri i ken harim tok bilong em. Bihain long em i pinisim tok bilong em klostu long 12 klok long nait, winim 1 tausen 2 handret manmeri i givim  nem na atres bilong ol bambai ol i ken kisim ol litresa bilong Baibel. Long neks de, niuspepa O Século i raitim wanpela atikol i stori long tok bilong Brata Rutherford.

Long Septemba 1925, ol i prinim edisen bilong The Watch Tower long tokples Potugal. Ol i kirap pinis long prinim wanpela edisen long tokples Potugal long Brasil. Virgílio Ferguson em wanpela Sumatin Bilong Baibel long Brasil long dispela taim, na em i kirap long stretim ol samting bilong i go long Potugal na helpim wok bilong Kingdom. Pastaim em i wok wantaim Brata Young long wanpela liklik brens ofis bilong ol Sumatin Bilong Baibel long Brasil. I no longtaim, Virgílio na meri bilong em Lizzie i kalap long sip na ol i bung gen wantaim Brata Young. Brata Ferguson i kam long taim stret bikos Brata Young bai mekim ol narapela asainmen, em bai go tu long Soviet Yunion.

Taim lain ami i kamapim gavman dikteta long Potugal, dispela i kamapim bikpela hevi long kantri na ol man i birua long wok bilong yumi. Brata Ferguson i strongim bel na em i mekim ol samting bilong lukautim ol Sumatin Bilong Baibel na wok ol i mekim. Em i askim long kisim tok orait bilong yusim haus bilong em olsem ples bilong mekim miting. Long Oktoba 1927, ol i tok orait long mekim olsem.

Long fes yia bilong gavman dikteta long mekim wok bos, inap olsem 450 manmeri long Potugal i kisim sabskripsen bilong The Watch Tower. Long rot bilong ol liklik nius na buklet, tok i tru i go long olgeta hap em Potugal i lukautim—Angola, Asores, Kep Verd, Is Timor, Goa, Madera, na Mosambik.

Manuel da Silva Jordão em man bilong wok gaden na em i bilong Potugal. Long 1929, em i kam long Lisbon. Taim em i stap long Brasil, em i bin harim Brata Young i mekim wanpela pablik tok. Em i luksave long tok i tru, na em i laik tru long helpim Brata Ferguson long wok autim tok. Olsem na Manuel i kirap long mekim wok kolpota, long nau ol i kolim wok painia. Ol i oganaisim gut wok bilong prinim na tilim ol litresa bilong Baibel, na nupela kongrigesen long Lisbon i wok long kamap strong!

Long 1934, Brata na Sista Ferguson i go bek long Brasil. Maski i olsem, ol i bin planim sid bilong tok i tru. Pait Bilong Spen na Wol Woa 2 i kamap long Yurop, tasol ol bratasista long Potugal i stap gut long Jehova. Inap sampela haptaim wok bilong Kingdom i go daun, tasol long 1947 ol i kisim nupela strong gen taim namba 1 misineri, John Cooke, i kam. Em i bin skul long Gileat. Bihain long dispela, namba bilong ol pablisa bilong Kingdom i go bikpela. Long 1962, gavman i tambuim wok bilong ol Witnes Bilong Jehova long Potugal. Tasol namba bilong ol pablisa i wok long i go antap. Long Disemba 1974, gavman i tok orait long wok bilong ol Witnes Bilong Jehova. Long dispela taim, i gat winim 13 tausen pablisa long kantri.

Long nau, winim 50 tausen pablisa i autim gutnius bilong Kingdom Bilong God long Potugal na long sampela ailan em ol i mekim tokples Potugal, na tu, long Asores na Madera. Namel long ol dispela pablisa, sampela bilong ol em ol tumbuna bilong ol lain i go harim pablik tok em Brata Rutherford i mekim long 1925.

Yumi tenkyu tru long Jehova na yumi amamas long ol bratasista long bipo em ol i sanap strong long bilip na ol i go pas long wok bilong autim tok olsem ol “wokman bilong Krais Jisas bilong helpim ol manmeri.”—Rom 15:15, 16.—Histori bilong yumi long Potugal.