Long atikol i kamap paslain, yumi stori long olsem wanem pris bilong Delfi i giamanim Krisas na king bilong Persia i daunim em. Tasol Baibel i stori long wanpela narakain tok profet we i stori long king bilong Persia, na truim bilong en i kamap.

Klostu 200 yia paslain long king i no bon yet—profet Aisaia i kolim nem bilong Sairus na stori long olsem wanem em bai go pait na daunim strongpela taun bilong Babilon.

Aisaia 44:24, 27, 28: “Mi Bikpela . . . mi tok, ‘Solwara, yu drai,’ orait em i save drai. Na mi tok olsem, mi yet mi makim Sairus olsem king, bilong em i ken mekim olgeta wok mi laik bai em i mekim. Em bai i tok na ol bai i wokim Jerusalem gen. Na bai ol i stat long wokim haus bilong mi.”

Saveman bilong Grik, Herodotus i tok ami bilong Sairus i senisim ron bilong Wara Yufretis we i save ron namel long taun Babilon. Sairus i wokim plen na ol soldia bilong em inap wokabaut long ples wara i save ron long en na i go insait long taun. Bihain long ol i kisim taun, Sairus i larim lain Juda husat i stap kalabus long Babilon long i go fri na sanapim gen banis bilong Jerusalem, em taun i bin bagarap 70 yia i go pinis.

Aisaia 45:1: “Bikpela i tok olsem, ‘Mi bin makim Sairus bilong kamap king, na mi bin givim strong long em bilong daunim ol arapela kantri na pinisim strong bilong ol arapela king. Mi yet mi save opim ol dua bilong banis bilong ol taun, bai Sairus i ken i go insait na kisim ol taun.’”

Ami bilong Persia i go insait long taun taim lain Babilon i no bin pasim tupela traipela dua bilong taun. Sapos ol Babilon i bin save long plen bilong Sairus, ol bai pasim olgeta dua i stap klostu long wara. Tasol ol i no bin save, olsem na taun i bagarap.

Dispela tok profet em wanpela bilong ol planti tok profet bilong Baibel i bin kamap tru. a Em i no wankain long tok ol man i kamapim long ol samting bai kamap bihain, planti taim ol i kisim ol dispela tingting long ol giaman god bilong ol. Tasol ol tok profet bilong Baibel i kam long God, em yet i tok: “Taim wanpela samting i no kamap yet, mi save tokaut long dispela samting bai i kamap na bai i go pinis olsem wanem. Bipo yet mi bin tok long ol samting bai i kamap, na bihain ol dispela samting i kamap tru olsem mi bin tok.”—Aisaia 46:10.

Wanpela God tru tasol, nem bilong em Jehova, em inap mekim kain tok profet. Dispela nem i makim “Em i Mekim i Kamap.” Dispela i soim olsem em inap save na stiaim ol samting bai kamap bihain, na  i stret wantaim laik bilong em. Dispela i strongim bilip bilong yumi olsem em bai truim olgeta tok promis bilong em.

Yu laik save long ol tok profet bilong Baibel long haptaim yumi stap long en? Inap 2000 yia i go pinis, Baibel i tok profet olsem “long taim bilong las de, taim nogut bai kamap na dispela bai givim hatwok long ol man.” Las de bilong wanem samting? Las de bilong ol pasin nogut na bel hevi i givim hatwok long ol man inap planti tausen yia, na i no bilong dispela graun o ol man nogut, nogat. Yumi ken skelim sampela tok profet i kamapim klia olsem yumi stap long “taim bilong las de.”

2 Timoti 3:1-5: “Long taim bilong las de . . . ol man bai laikim ol yet tasol, ol bai laikim tumas mani, ol bai litimapim nem bilong ol yet, ol bai i gat pasin antap, ol bai tok nogut long ol arapela, ol bai sakim tok bilong papamama, ol bai i no tok tenkyu, ol bai i no stap gut long narapela, ol bai i no gat pasin bilong laikim ol wanfamili, ol bai i no laik kamap wanbel, ol bai i gat pasin bilong bagarapim gutnem bilong ol arapela, ol bai i no gat pasin bilong bosim bel, ol bai kamap wail olgeta, ol bai i no laikim ol gutpela pasin, ol bai birua long ol pren bilong ol, ol bai i gat strongpela het, ol bai pulap long pasin antap, ol bai i no laikim God, nogat, ol bai laikim kain kain amamas, bai i luk olsem ol i gat pasin bilong givim bel tru long God, tasol ol i no larim strong bilong dispela pasin i bosim wokabaut bilong ol.”

Olsem wanem? Yu wanbel olsem ol kain pasin nogut i wok long i go bikpela long nau? Yu luksave olsem yumi stap namel long ol manmeri i gat pasin bilong tingim ol yet, laikim mani, na pasin antap i stiaim ol? Yu luksave olsem ol man i strong tumas long ol narapela i mas bihainim tingting bilong ol na ol i no wanbel long tingting bilong ol narapela? Yu luksave olsem pasin bilong sakim tok bilong papamama i go bikpela na klostu olgeta man i laikim ol amamas winim pasin bilong laikim God. Long olgeta de, ol samting i wok long i go nogut moa.

Matyu 24:6, 7: “Yupela bai harim tok long ol woa i kamap klostu na ol woa i kamap longwe. . . . Wanpela kantri bai pait long narapela kantri na wanpela kingdom bai pait long narapela kingdom.”

Sampela wok painimaut i tok namba bilong ol man i dai long woa na ol pait i kamap kirap long 1914 i winim 100 milion, dispela namba i winim populesen bilong planti kantri. Tingim aiwara, krai sori, na bel hevi bilong ol man taim planti manmeri i dai long ol dispela rot. Yu ting ol kantri i luksave long pasin kranki bilong ol na ol i pinisim ol woa?

Matyu 24:7: “Bai i gat taim bilong ol bikpela hangre.”

Oganaisesen World Food Programme i tok: “Dispela graun i kamapim planti kaikai inap long olgeta man i ken kisim, 815 milion manmeri—wanpela long olgeta 9-pela manmeri—i slip wantaim hangre long olgeta nait. Na tu, wanpela long olgeta 3-pela man—i karim sampela kain hevi bilong i no kisim gut kaikai.” Wok painimaut i tok long olgeta wan wan yia, klostu 3 milion pikinini i dai long hangre.

Luk 21:11: “Bai i gat ol bikpela guria.”

Long olgeta yia, klostu 50,000 bikpela guria i kamap na ol man inap pilim. Klostu 100 bikpela guria i save bagarapim ol bilding, na wanpela bikpela guria tru i save kamap klostu olgeta yia. Wanpela wok painimaut i tok, namel long yia 1975 na 2000, ol guria i bin kilim i dai 471,000 manmeri.

Matyu 24:14: “Ol bai autim dispela gutnius bilong Kingdom long olgeta hap bilong graun na bai olgeta lain man i ken harim, na bihain long dispela, pinis bai kamap.”

Ol Witnes Bilong Jehova, em namba bilong ol i winim 8 milion, ol i autim gutnius bilong Kingdom Bilong God long olgeta hap bilong graun long klostu 240 kantri. Ol i autim gutnius long ol biktaun na ol ples i stap longwe, long bikbus, na long ol ples maunten. Tok profet i tokaut olsem taim dispela wok i kamap long mak em God i laikim, “pinis bai kamap.” Wanem mining bilong dispela tok? Em i makim olsem wok gavman bilong ol man bai pinis na nupela gavman bai kirap, em wok bos bilong Kingdom Bilong God. Taim Kingdom Bilong God i mekim wok bos, wanem ol tok promis bai kamap tru? Ritim ol atikol i kamap bihain bilong kisim sampela save moa.