Stori long bekgraun bilong yu.

Mi bon long 1959 long Fuzhou Siti, Jiangxi Provins, Saina. Taim mi gat 8 krismas, bikpela hevi i kamap long kantri—gavman i laik senisim pasin bilong ol manmeri. Papa bilong mi em ensinia bilong wokim rot, olsem na ol i tokim em long wokim rot bilong tren long wanpela hap i stap longwe tru, na em ples drai nating. Inap planti yia, em i save kam lukim mipela wanpela taim tasol long yia. Mi stap wantaim mama bilong mi; mama em tisa long elementri skul. Mipela i stap long skul we mama i wok long en. Long 1970, mipela i go stap long Liufang, em wanpela ples long Linchuan Distrik. Dispela ples i sot tru long kaikai, na ol rabisman i stap long dispela hap.

Famili bilong yu i gat wanem bilip?

Papa i no laikim lotu na wok politik. Mama i bilong lotu Budis. Ol tisa i skulim mi olsem laip i kamap long rot bilong evolusen, na mi bilipim ol.

Wai na yu laikim matematiks?

Mi laikim matematiks bikos em i kirapim man long skelim gut ol samting na kisim stretpela save. Mi go long yunivesiti bihain liklik long Mao Tse-tung i dai long 1976—dispela man i stap lida taim gavman i laik senisim pasin bilong ol manmeri. Taim mi stap long yunivesiti, mi stadi long matematiks. Bihain long mi kisim digri, fes wok bilong mi em long mekim wok painimaut bilong disainim ol samting bilong helpim ron bilong elektrisiti.

Wanem fes tingting bilong yu long Baibel?

Long 1987, mi kam long Amerika long mekim sampela moa stadi long A&M Yunivesiti long Texas. Mi save olsem planti  manmeri long Amerika i bilip long God na ol i save ritim Baibel. Na tu, mi harim olsem Baibel i kamapim planti gutpela tingting, olsem na mi pilim olsem mi mas ritim Baibel.

Mi skelim olsem ol tok bilong Baibel inap helpim mi. Tasol mi hatwok long kliagut long sampela tok bilong en, olsem na mi stop long ritim Baibel.

Wanem samting i kirapim gen laik bilong yu long ritim Baibel?

Long 1990, wanpela Witnes Bilong Jehova i kam long haus bilong mi na soim tok bilong Baibel olsem ol manmeri bai kisim gutpela sindaun long bihain. Em i stretim rot long tupela marit i ken helpim mi long kliagut long tok bilong Baibel. Nem bilong meri bilong mi em Liping. Bihain, em tu i kirap stadi long Baibel. Em i bin mekim wok tisa long haiskul long Saina na skulim ol sumatin long physics—wanpela lesen bilong saiens. Em tu i bilip olsem i no gat God. Mipela i kisim save long Baibel long laip i kamap olsem wanem. Em fes taim bilong mi long save olsem i gat Krieta, olsem na mi laik mekim wok painimaut.

Olsem wanem long wok painimaut bilong yu?

Mi saveman bilong matematiks na mi save long wei bilong skelim wanpela samting na luksave long hau em inap kamapim ol narapela samting. Mi save olsem protin i save kamapim laip. Olsem na mi laik painimaut long olsem wanem protin inap kamap long strong bilong em yet. Protin em wanpela molekiul we i hatwok long klia long ol wok em i mekim, na ol sel bilong ol samting i gat laip i gat planti tausen kain kain protin na ol i mekim narapela narapela wok. Mi luksave olsem protin i no inap kamap nating, i mas i gat man i wokim! Mi no bin ritim wanpela tok bilong evolusen i stori gut long olsem wanem ol protin i wokim ol yet—bikpela namba bilong ol protin i stap long ol samting i gat laip. Mi luksave olsem i gat Krieta.

Wai na yu bilip olsem God i kamapim ol tok bilong Baibel?

Taim mi stadi wantaim ol Witnes Bilong Jehova, mi kisim save olsem Baibel i stori long planti bikpela tok profet em ol i bin kamap tru. Na tu, mi bihainim ol stiatok bilong Baibel na mi luksave olsem dispela i helpim mi. Mi laik save, ‘Hau na ol man i stap inap planti tausen yia i go pinis inap raitim ol tok we i helpim yet ol man long nau?’ Mi luksave olsem Baibel em Tok Bilong God.

Wai na yu bilip olsem i gat Krieta?

Taim mi skelim planti samting long graun, mi bilip olsem i gat Krieta. Nau mi save wokim ol program bilong kompiuta, na mi kirap nogut olsem kru bilong yumi i winim tru ol kompiuta program. Kru inap luksave kwik long ol toktok. Planti bilong yumi inap luksave kwik long ol toktok maski sapos sentens i no pinis, man i lap, kus, katkatim ol tok em i kolim, krai bilong toktok, toktok bilong man i stap longwe, nois bilong ol samting yumi no lukim, o tok i no klia long telefon. Ol man bilong wokim ol program bilong kompiuta i pilim olsem ol dispela samting i narapela kain tru. Kru bilong man i winim tru olgeta kain program bilong kompiuta we inap luksave long ol toktok.

Kru bilong yumi inap luksave long man i pilim olsem wanem, krai bilong toktok, na wei bilong em long toktok. Ol saveman bilong kompiuta i laik painimaut long olsem wanem ol kompiuta inap mekim wankain wok olsem kru long luksave long toktok. Taim ol saveman i mekim dispela wok, i olsem ol i stadi long hanmak bilong God.