Jisas i bin stori olsem “liklik lain sipsip” tasol bai go insait long Kingdom bilong heven. (Luk 12:32) Tasol ol i no ken ting dispela blesing ol i kisim em i samting nating, nogat. Jisas i kamapim olsem em i bikpela samting long man i mas holim stretpela tingting sapos em i laik i go insait long Kingdom.

Olsem na Jisas i kirapim ol disaipel bilong em long oltaim ol i mas redi i stap long taim em i kam bek. Em i tok: “Yupela i mas stap redi na larim lam bilong yupela i lait. Na yupela i mas stap olsem ol man i wetim bosman bilong ol i kam bek bihain long bung bilong marit. Taim em i kamap na paitim dua, ol inap opim dua kwiktaim. Ol wokboi em bosman i lukim olsem ol i was i stap taim em i kam kamap, ol i ken amamas!”—Luk 12:35-37.

Taim Jisas i mekim dispela tok piksa, ol disaipel inap kliagut long tingting ol i mas holim. Ol wokboi long tok piksa bilong Jisas i redi na wet i stap long bosman bilong ol i kam bek. Jisas i tok: “Sapos [bosman] i kam long namba 2 haptaim bilong was [klostu long 9 klok nait i go long 12 klok biknait], o long namba 3 haptaim bilong was [12 klok long biknait i go 3 klok samting long bikmoning], na em i lukim ol i was i stap, ol i ken amamas!”—Luk 12:38.

Dispela tok piksa i no stori tasol long ol samting ol wokboi bilong haus i mas mekim bilong lukautim gut wok bilong ol, nogat. Ol i mas mekim sampela samting moa. Yumi save long dispela, long wanem, Jisas em Pikinini bilong man i stori long em yet long dispela tok piksa. Em i tokim ol disaipel: “Yupela tu, redi i stap, long wanem, Pikinini bilong man bai kam long taim yupela i no ting em bai kam.” (Luk 12:40) Bihain, Jisas bai kam na em i laik bai lain bilong em, moa yet dispela “liklik lain sipsip,” i mas redi i stap.

Pita i laik kliagut long mining bilong tok bilong Jisas, so em i askim em: “Bikpela, yu mekim dispela tok piksa long mipela o long olgeta man wantaim?” Jisas i no bekim stret askim bilong Pita, nogat. Em i mekim wanpela tok piksa i stret long dispela, olsem: “Husat tru em i gutpela bosboi i gat savetingting? Bosman bilong en bai makim em long lukautim lain wokboi bilong en na long wok oltaim long givim kaikai inap long ol long taim stret. Dispela wokboi i ken amamas tru taim Bosman bilong en i kam na lukim em i mekim dispela wok! Mi tok tru long yupela: Bosman bai makim em long lukautim olgeta samting bilong en.”—Luk 12:41-44.

Long tok piksa em i mekim pastaim, i klia tru olsem “bosman” i makim Jisas, em Pikinini bilong man. Olsem na yumi ken tok, “gutpela bosboi” em sampela man bilong “liklik lain sipsip” husat bai kisim Kingdom. (Luk 12:32) Long dispela tok piksa, Jisas i soim olsem sampela bilong dispela lain bai strongim “lain wokboi bilong en” long rot bilong givim “kaikai inap long ol long taim stret.” So Pita na ol arapela disaipel em Jisas i skulim ol na givim ol tok bilong strongim bilip bilong ol, ol i ken save olsem wanpela haptaim bai kamap bihain we Pikinini bilong man bai kam. Na insait long dispela haptaim, “gutpela wokboi” bai skulim ol “lain wokboi” bilong Bosman. Dispela i makim olsem ol bai skulim ol disaipel bilong Jisas long tok bilong God.

Na tu, Jisas i kamapim klia as na ol disaipel bilong em i mas was i stap na bosim gut tingting bilong ol. Em i save olsem ol man inap lusim pasin bilong was i stap, na dispela bai kirapim ol long birua long wanbilip bilong ol. Jisas i tok: “Tasol sapos long bel bilong en dispela wokboi i tok, ‘Bosman bilong mi i no kam hariap,’ na em i kirap long paitim ol wokboi na ol wokmeri, na em i kirap long kaikai na dring na spak, orait Bosman bilong dispela wokboi bai kam long wanpela de em wokboi i no ting na long wanpela aua em wokboi i no save long en. Na em bai givim bikpela strafe long wokboi na em bai makim em bilong stap wantaim ol man i no stap gut long God.”—Luk 12:45, 46.

Jisas i tok em i kam bilong “kirapim wanpela paia long graun.” Na tru tumas em i bin mekim olsem. Jisas  i kamapim ol tok we i mekim na ol man i tok pait, na dispela i olsem paia i kirap na i daunim ol bilip giaman na ol kastam bilong ol man. Na tu, ol tok Jisas i autim i brukim ol lain i save stap wanbel. Olsem, “papa bai birua long pikinini man na pikinini man bai birua long papa, mama bai birua long pikinini meri na pikinini meri bai birua long mama bilong en, tambu mama bai birua long meri bilong pikinini bilong en na dispela meri bai birua long tambu mama bilong en.”—Luk 12:49, 53.

Jisas i mekim dispela tok long ol disaipel bilong em. Bihain em i tanim i go long bikpela lain manmeri. Planti manmeri i no laik bilip long ol samting ol i lukim i makim olsem Jisas em i Mesaia, olsem na em i tokim ol: “Taim yupela i lukim wanpela klaut i kamap long hap bilong wes, wantu yupela i save tok, ‘Bikpela ren i laik kam,’ na samting i kamap olsem. Na taim yupela i lukim win bilong hap saut i kam, yupela i save tok, ‘Bai i gat hatpela san,’ na samting i kamap olsem. Yupela ol man bilong tupela maus, yupela i gat save long skelim lukluk bilong graun na skai, tasol olsem wanem na yupela i no gat save long skelim dispela taim?” (Luk 12:54-56) I klia tru olsem dispela lain i no redi.