1. Bilong wanem bel hevi na krai sori i pulap long Silo?

 SAMUEL inap pilim bel hevi bilong ol manmeri bilong Silo. I kain olsem aiwara i karamapim dispela taun. Long planti haus ol meri na ol pikinini i krai, long wanem, ol i harim tok olsem ol papa, ol man marit, ol pikinini man, na ol brata bilong ol i no inap kam bek long ples. Yumi save long 30,000 soldia i bin dai long han bilong ol Filistia, na i no long taim 4,000 moa i dai long narapela pait.​—1 Sml. 4:1, 2, 10.

2, 3. Wanem ol hevi i kamap na bringim sem long Silo na i no gat glori moa?

² Dispela em wanpela tasol bilong planti hevi i bin painim ol Israel. Tupela bikhet pikinini man bilong Hetpris Eli, em Hopni na Finias, i karim Bokis Kontrak wantaim ol na lusim Silo. Bokis Kontrak i save stap long Rum Tambu Tru long haus lotu sel—dispela gutpela bokis i makim olsem God i stap wantaim ol. Orait ol man i kisim Bokis Kontrak i go wantaim ol long pait, ol i gat tingting kranki olsem dispela bai helpim ol long winim pait. Tasol ol Filistia i kisim Bokis Kontrak, na kilim i dai Hopni na Finias.​—1 Sml. 4:3-11.

³ Bokis Kontrak i stap long haus lotu sel long Silo inap planti handret yia. Tasol nau em i no stap moa. Eli, husat i gat 98 krismas, i harim dispela tok, em i pundaun i go baksait taim em i sindaun long sia bilong em na dai. Na tambu meri bilong em, husat i kamap wido long dispela de, em tu i dai taim em i karim pikinini. Paslain long em i dai, em i tok: “Samting i givim glori long Israel, ol birua i karim i go pinis.” Tru tumas, Silo bai i no stap wankain olsem bipo.​—1 Sml. 4:12-22.

4. Yumi bai stori long wanem samting long dispela sapta?

⁴ Olsem wanem Samuel inap karim ol dispela bikpela bel hevi? Yu ting bilip bilong em i strong inap long helpim ol manmeri em Jehova i no lukautim na orait moa long ol? Long nau, sampela taim yumi olgeta i karim ol hevi na yumi bel hevi, na dispela i save traim bilip bilong yumi, olsem na yumi laik skelim wanem samting moa yumi inap lainim long eksampel bilong Samuel.

5, 6. Baibel i stori planti long wanem samting insait long 20 yia? Samuel i bin mekim wanem long dispela haptaim?

⁵ Kirap long dispela taim Baibel i no stori planti long Samuel, tasol i stori planti long Bokis Kontrak, na i kamapim hau ol Filistia i bin  kisim bagarap bikos ol i kisim Bokis Kontrak na nau ol i mas bringim i go bek. Inap 20 yia i go pinis, na nau Baibel i stori gen long Samuel. (1 Sml. 7:2) Em i bin mekim wanem samting long ol dispela yia? Baibel i stori long samting em i bin mekim.

⁶ Yumi kisim save olsem paslain long dispela haptaim i kirap, “Samuel i save givim tok long ol Israel.” (1 Sml. 4:1) Baibel i stori olsem bihain long dispela haptaim i pinis, Samuel i save go lukim 3-pela taun long Israel long olgeta yia, na em i save stretim hevi na bekim ol askim bilong ol. Bihain em i save go bek long asples bilong em long Rama. (1 Sml. 7:15-17) I klia tru olsem Samuel i bin bisi, na long dispela 20 yia, em i mekim planti wok tru.

7, 8. (a) Samuel i wok strong inap 20 yia na bihain em i givim wanem tok long ol manmeri? (b) Ol manmeri i mekim wanem long tok Samuel i mekim bilong strongim ol?

⁷ Ol pikinini man bilong Eli i bin mekim pasin pamuk na korapsen, na dispela i bagarapim bilip bilong ol manmeri. Olsem na planti manmeri i kirap lotuim ol giaman god. Tasol inap 20 yia Samuel i wok strong tru, em i mekim dispela tok long ol manmeri: “Sapos long bel olgeta yupela i laik kam bek long Jehova, orait yupela i mas rausim ol giaman god na ol imis bilong Astoret. Na yupela i mas givim bel olgeta long Jehova na lotu long em wanpela tasol, na em bai kisim bek yupela long han bilong ol Filistia.”​—1 Sml. 7:3.

⁸ “Han bilong ol Filistia” i putim bikpela hevi long ol manmeri. Ol Filistia i daunim ami bilong Israel na ol i ting ol inap mekim nogut long lain bilong God na ol i no inap kisim panismen long dispela. Tasol Samuel i strongim ol Israel olsem ol samting inap senis sapos ol i kam bek long Jehova. Yu ting ol i redi long mekim olsem? Samuel i amamas, ol i lusim ol giaman god bilong ol na ol i kirap “lotu long Jehova wanpela tasol.” Samuel i kamapim wanpela bung long Mispa, em wanpela taun i stap long ples maunten long hap not bilong Jerusalem. Ol manmeri i bung, tambu long kaikai, na ol i tanim bel tru long planti sin bilong ol long lotuim ol giaman god.​—Ritim 1 Samuel 7:4-6.

9. Ol Filistia i lukim olsem rot i op long mekim wanem? Lain bilong God i mekim wanem taim ol i harim ol birua i kam bilong pait long ol?

⁹ Tasol ol Filistia i kisim save long dispela bikpela bung na ol i ting olsem ol i gat rot bilong daunim ol Israel. Ol i salim ami bilong ol i go long Mispa bilong bagarapim ol dispela manmeri i lotuim Jehova. Ol Israel i harim tok long ol birua i kam bilong pait long ol. Ol i pret nogut tru na ol i askim Samuel long beten askim God long helpim  ol. Em i beten, na tu, em i ofaim wanpela sakrifais. Samuel i mekim ofa yet, na ami bilong ol Filistia i kam bilong mekim pait long Mispa. Orait nau Jehova i harim beten bilong Samuel. Jehova i kamapim strong belhat bilong em. “Long dispela de Jehova i mekim tanda i pairap strong” long ol Filistia.​—1 Sml. 7:7-10.

10, 11. (a) Wanem samting i mekim na dispela tanda Jehova i salim long ami bilong ol Filistia i narapela kain? (b) Wanem samting i kamap long pait i kirap long Mispa?

¹⁰ Bai yumi tingim ol dispela Filistia olsem ol liklik pikinini husat i pret na hariap long hait baksait long mama taim tanda i pairap strong? Nogat, ol i strongpela soldia na ol i save gut long pait. So dispela tanda i no wankain long ol tanda ol i save harim. Yu ting em bikpela nois bilong tanda i “pairap strong”? Yu ting dispela nois i kam long blu skai, o em narakain nois i kam long sait bilong ol maunten? Yumi no save wanem samting stret i kamap, tasol ol Filistia i pret nogut tru. Ol i paul nabaut, ol i no stap moa olsem ol strongpela soldia, ol i ranawe. Ol man bilong Israel i pait long ol long Mispa na ranim ol i go inap planti kilomita, i go long saut-wes bilong Jerusalem.​—1 Sml. 7:11.

¹¹ Dispela pait i kamapim bikpela senis long lain bilong God. Ol Filistia i no kam moa na pait long lain Israel taim Samuel i stap yet olsem jas. Lain bilong God i kisim bek planti taun em bipo ol Filistia i bin bosim.​—1 Sml. 7:13, 14.

12. Samuel i “bihainim stretpela pasin” na dispela i kamap wanem samting? Wanem ol pasin i helpim em long bihainim yet stretpela pasin?

¹² Planti handret yia bihain, aposel Pol i kolim nem bilong Samuel wantaim ol gutpela jas na profet husat i save “bihainim stretpela pasin.” (Hib. 11:32, 33) Tru tumas, Samuel i mekim gutpela na stretpela pasin long ai bilong God, na dispela i kirapim ol narapela tu long mekim olsem. Em i bihainim stretpela pasin bikos em i wetim Jehova na i no les kwik, em i stap gut long wok maski em i bel hevi. Na tu, em i soim pasin bilong tenkyu. Bihain long ol i winim pait long Mispa, Samuel i sanapim wanpela bikpela ston bilong tingim samting Jehova i mekim bilong helpim lain bilong Em.​—1 Sml. 7:12.

13. (a) Yumi mas kisim wanem ol pasin na bai yumi bihainim eksampel bilong Samuel? (b) Yu ting wanem taim i gutpela long kisim ol pasin olsem bilong Samuel?

¹³ Olsem wanem? Yu laik “bihainim stretpela pasin”? Sapos olsem, orait i gutpela yu kisim skul long pasin bilong Samuel long i no les kwik, pasin daun, na pasin bilong tenkyu. (Ritim 1 Pita 5:6.) Yumi olgeta i mas i gat ol dispela pasin, a? I gutpela olsem Samuel i bin kisim  na kamapim ol dispela pasin long taim em i yangpela yet, long wanem, bihain i gat planti samting i bin givim bikpela bel hevi long em.

14, 15. (a) Bihain long Samuel “i kamap lapun” pinis, em i kisim wanem bikpela bel hevi? (b) Yu ting Samuel i no gutpela papa wankain olsem Eli? Stori long dispela.

¹⁴ Yumi ritim gen stori bilong Samuel long taim em “i kamap lapun” pinis. Long dispela taim Samuel i gat tupela bikpela pikinini man, em Joel na Abiya, na em i givim wok long ol bilong helpim em long harim kot na stretim hevi bilong ol manmeri. Tasol sori tru, ol i no mekim gut wok. Samuel i save onest na bihainim stretpela pasin, tasol tupela pikinini man bilong em i yusim namba bilong ol long helpim ol yet, ol i save paulim kot na kisim grismani.​—1 Sml. 8:1-3.

¹⁵ Wanpela taim, ol lida bilong Israel i go lukim lapun profet na komplein. Ol i tok: “Tupela pikinini man bilong yu i no save bihainim pasin bilong yu.” (1 Sml. 8:4, 5) Yu ting Samuel i save long dispela hevi? Baibel i no stori long dispela. Tasol yumi save Samuel i gutpela papa, na em i no olsem Eli. Jehova i krosim Eli na givim panismen long em, long wanem, Eli i no stretim ol pikinini man bilong em long pasin nogut bilong ol, nogat, em i onarim tupela winim God. (1 Sml. 2:27-29) Jehova i no lukim dispela kain popaia long Samuel.

16. Ol papamama i pilim olsem wanem taim ol pikinini i bikhet? Hau bai ol papamama i kisim bel isi na tok bilong stiaim ol long eksampel bilong Samuel?

 ¹⁶ Baibel i no stori long bikpela sem, wari, na bel hevi bilong Samuel taim em i kisim save long pasin nogut bilong tupela pikinini man bilong em. Tasol ating planti papamama inap pilim bel hevi bilong em. Nau long dispela taim nogut, planti pikinini i bikhet long wok bos bilong papamama na sakim tok bilong stretim ol. (Ritim 2 Timoti 3:1-5.) Ol papamama i karim dispela kain hevi inap kisim bel isi na tok bilong stiaim ol long eksampel bilong Samuel. Samuel i no larim pasin nogut bilong tupela pikinini man bilong em i mekim na em i lusim bilip. Tingim, maski ol pikinini i no bihainim tok papamama i givim bilong stretim ol, gutpela eksampel bilong papamama inap helpim ol. Na oltaim ol papamama i gat rot long amamasim Papa bilong ol, Jehova God—olsem Samuel i bin mekim.

17. Ol lida bilong Israel i askim Samuel long wanem samting? Samuel i mekim wanem?

¹⁷ Ol pikinini man bilong Samuel i no tingim ol hevi inap kamap long pasin bilong ol long gridi na tingim ol yet. Ol lida bilong Israel i tokim Samuel: “Mipela i laik bai yu makim wanpela man long kamap king na bosim mipela wankain olsem ol arapela kantri.” Yu ting dispela askim i makim olsem ol i sakim Samuel? Tingim, Jehova i bin makim Samuel long mekim wok jas long ol manmeri bilong em inap planti yia. Tasol nau ol i no laikim wanpela profet nating olsem Samuel, ol i laik bai wanpela king i stap jas bilong ol. Ol kantri i stap klostu i gat ol king, na lain Israel tu i laikim wanpela king! Samuel i mekim wanem? Baibel i tok: “Dispela i no amamasim Samuel.”​—1 Sml. 8:5, 6.

18. Olsem wanem Jehova i givim bel isi long Samuel na long wankain taim kamapim olsem lain Israel i mekim bikpela sin?

¹⁸ Lukim tok Jehova i mekim taim Samuel i kamapim dispela long beten: “Harim tok bilong ol manmeri long olgeta samting ol i tokim yu long en; yu no ken ting ol i les long yu na ol i laik rausim yu. Nogat. Ol i no laik mi stap king bilong ol na ol i rausim mi.” Dispela tok i mekim gut bel bilong Samuel, tasol ol manmeri i kamapim tok bilas nogut long God i Gat Olgeta Strong! Jehova i tokim profet bilong em long givim tok lukaut long lain Israel long ol hevi bai painim ol taim ol i gat wanpela king bilong graun. Taim Samuel i tokim ol long dispela samting, ol i strong na tok: “Maski, mipela i laik bai yu makim wanpela man long kamap king na bosim mipela.” Samuel i bihainim tok bilong God, em i anointim wanpela king em Jehova yet i makim.​—1 Sml. 8:7-19.

19, 20. (a) Olsem wanem Samuel i bihainim daireksen bilong Jehova long anointim Sol olsem king bilong Israel? (b) Hau Samuel i wok yet long helpim lain bilong God?

 ¹⁹ Samuel i bihainim dispela tok olsem wanem? Yu ting em i bel nogut na mekim nating tasol? Em i larim bel hevi i daunim em olgeta? Planti man bai pilim olsem taim kain samting i painim ol, tasol Samuel, nogat. Em i anointim Sol na tokaut olsem Jehova yet i makim dispela man. Samuel i givim kis long Sol bilong makim olsem em i amamas long dispela nupela king na em bai daun long em. Na em i tokim ol manmeri: “Lukim dispela man em Jehova i bin makim, i no gat narapela i olsem em namel long olgeta manmeri.”​—1 Sml. 10:1, 24.

²⁰ Samuel i no tingim ol popaia bilong dispela man Jehova i bin makim, em i tingim ol gutpela pasin bilong em. Samuel i tingim pasin bilong em yet long stap gut long God, na em i no ting olsem ol dispela man bilong senisim nabaut tingting i mas orait long em. (1 Sml. 12:1-4) Na tu, em i stap gut long asainmen bilong em, em i tokim ol manmeri bilong God long was gut long ol samting we inap bagarapim bilip bilong ol, na em i strongim ol long stap gut yet long Jehova. Ol manmeri i pilim tru tok bilong Samuel, na ol i askim Samuel long beten bilong helpim ol. Em i mekim dispela gutpela tok long ol: “Wok bilong mi em bilong beten long God i helpim yupela, na mi no inap lusim dispela pasin, long wanem, mi no laik mekim sin long Jehova. Na mi bai wok yet long skulim yupela long ol gutpela na stretpela pasin em yupela i mas bihainim.”​—1 Sml. 12:21-24.

21. Hau eksampel bilong Samuel i ken helpim yu sapos yu bel hevi taim wanpela i kisim wok i gat namba?

²¹ Olsem wanem? I gat wanpela taim yu bin bel hevi bikos ol i makim narapela long mekim wok i gat namba? Eksampel bilong Samuel i helpim yumi long tingim olsem yumi no ken holim strong long bel pasin bilong jeles o kros. (Ritim Provep 14:30.) God i givim planti gutpela wok long olgeta wan wan wokman bilong em.

22. Long pastaim, wai na i stret Samuel i tingim ol gutpela pasin bilong Sol?

²² I stret Samuel i tingim ol gutpela pasin bilong Sol; em wanpela gutpela man. Sol i longpela na lukluk bilong em i naispela tru, em i gat strongpela bel na i save mekim gut ol wok, na pastaim em i gat pasin daun na pasin isi. (1 Sml. 10:22, 23, 27) Na tu, em i gat wanpela  gutpela presen—em i stap fri, em inap makim samting em i laik mekim long laip bilong em na wokim ol disisen bilong em yet. (Lo 30:19) Olsem wanem? Em i yusim gut dispela presen bilong em?

23. Wanem fes pasin em Sol i lusim? Olsem wanem em i soim olsem pasin antap bilong em i go bikpela?

²³ Sori tru, taim man i kisim wanpela nupela wok i gat namba, planti taim fes pasin man i lusim em pasin daun. I no longtaim na Sol i kisim pasin antap. Long laik bilong em yet em i sakim tok bilong Jehova we Samuel i givim long em. Wanpela taim, Sol i les long wet na em i mekim sakrifais em Samuel i laik ofaim. Olsem na Samuel i mas givim strongpela tok bilong stretim em na tokim em olsem famili bilong Sol bai i no inap holim moa wok king. Sol i no mekim pasin daun na kisim dispela tok bilong stretim em, nogat, em i mekim pasin nogut tru bilong sakim tok.​—1 Sml. 13:8, 9, 13, 14.

24. (a) Olsem wanem Sol i sakim tok bilong Jehova long pait em i mekim long ol Amalek? (b) Sol i mekim wanem taim em i kisim tok bilong stretim em? Jehova i mekim wanem disisen?

²⁴ Long rot bilong Samuel, Jehova i tokim Sol long pait long ol Amalek. Jehova i tok tu long ol i mas kilim i dai king nogut bilong ol, em Agak. Tasol Sol i no kilim i dai Agak, na tu, ol gutpela bulmakau na sipsip samting we God i tok ol i mas bagarapim. Taim Samuel i kam bilong stretim em, Sol i kamapim klia olsem pasin bilong em i senis. Em i no daunim em yet na kisim tok bilong stretim em, nogat, em i givim eskius na tok samting em i mekim i stret, na em i sutim tok long ol manmeri. Sol i laik daunim dispela tok bilong stretim em, na tok sampela bilong ol dispela animal i bilong mekim sakrifais long Jehova, na Samuel i tok: “Harim! Pasin bilong bihainim tok i winim pasin bilong mekim sakrifais.” Samuel i strongim bel na krosim Sol, em i kamapim disisen bilong Jehova na tok: Jehova bai rausim wok king long Sol na givim long narapela man—wanpela gutpela man. a—1 Sml. 15:1-33.

25, 26. (a) Wai na Samuel i krai sori long Sol? Long pasin isi, olsem wanem Jehova i stretim profet bilong Em? (b) Samuel i kisim wanem skul taim em i go long haus bilong Jesi?

²⁵ Samuel i bel hevi tru long ol pasin kranki bilong Sol. Long nait olgeta em i beten long Jehova long dispela samting. Na tu, em i krai  sori long Sol. Samuel i lukim olsem Sol inap mekim planti gutpela wok, tasol ol samting i no kamap olsem em i tingim. Dispela man em Samuel i bin save long em i senis—em i lusim olgeta gutpela pasin na em i givim baksait long Jehova. Samuel i no laik lukim Sol gen. Tasol bihain, long pasin isi Jehova i stretim Samuel, em i tok: “Mi givim baksait pinis long Sol na em i no ken i stap king bilong ol Israel moa. Olsem na wanem taim bai bel hevi bilong yu long Sol i pinis? Kisim wanpela kom bilong animal na pulimapim oil long en, na yu mas karim i go lukim Jesi, em wanpela man bilong Betlehem, long wanem, mi makim wanpela pikinini man bilong em long kamap king.”​—1 Sml. 15:34, 35; 16:1.

²⁶ Samting Jehova i tingting pinis long mekim, em bai mekim tasol, maski ol man i no stap gut long em. Sapos wanpela man i no stap gut moa long Jehova, em bai painim narapela man long mekim laik bilong Em. Olsem na lapun Samuel i no bel hevi moa long Sol. Samuel i bihainim tok bilong Jehova, na em i go long haus bilong Jesi long Betlehem, em i bungim sampela pikinini man bilong Jesi em ol i luk nais tru. Maski i olsem, kirap long namba 1 pikinini, Jehova i tokim Samuel long no ken skelim lukluk bilong ol. (Ritim 1 Samuel 16:7.) Orait nau, Samuel i bungim laspela pikinini man bilong Jesi, em man Jehova i makim—Devit!

27 (a) Wanem samting i helpim bilip bilong Samuel long kamap strong moa? (b) Yu pilim olsem wanem long eksampel bilong Samuel?

²⁷ Taim Samuel i lapun pinis, em i kliagut long risen na i stret Jehova i mekim disisen long makim Devit olsem senis bilong Sol. Sol i kisim pasin bilong jeles na em i laik kilim i dai Devit, na tu, em i kamap apostet. Tasol Devit i kamapim ol gutpela pasin—em i gat strongpela bel, bilip, na stap gut long God. Klostu long taim Samuel i laik dai, bilip bilong em i kamap strong moa. Em i luksave olsem maski i gat bikpela bel hevi, Jehova inap oraitim, stretim, o mekim dispela bel hevi i kamap olsem wanpela blesing. Bihain Samuel i dai, tasol insait long 100 yia long laip bilong Samuel, em i bin mekim planti bikpela wok na stori bilong ol i stap yet. Olsem na yumi no kirap nogut olsem lain Israel olgeta i krai sori taim dispela gutpela man i dai! I kam inap long nau, i gutpela ol wokboi bilong Jehova i askim ol yet, ‘Bai mi bihainim bilip bilong Samuel?’