Ndakakomenena mudolopo lya Rmaysh, afwaafwi amunyinza wa Israel a Lebanon, ciindi nokwakali nkondo yatubunga twabantu bamucisi. Ndiciyeeyede kabotu-kabotu kujatikizya tudandamiti twakali kubboloka akukosola maanza alimwi amaulu aabantu batakwe milandu. Buumi bwakali kukatazya, alimwi bugwebenga alimwi ankondo zyakalidumide kapati.

Mukwasyi wesu wakali kuzulilwa kucikombelo citegwa Maronite, cimwi cazikombelo ziitwa kuti Eastern Catholic Churches. Bataata bakajisi bubi lyoonse kujanina banamukwasyi ibali 12 ziyandika zyakumubili, pele bamaama bakali kusinizya kuti toonse twaunka kucikombelo. Mukuya kwaciindi, ndakatalika kulimvwa kuti cikombelo caalilwa kugwasya bantu bapengede mbubonya mbubacita bantu bamwi.

Kandicili mukubusi ndakatalika kukkomanina kulwana kwiitwa kuti kung fu. Ndakabikkila maano kwiiya alimwi akuba syaazibwene mukulwana kwiinda mukubelesya maanza amaulu alimwi akulwana kakunyina kubelesya cilwanyo cili coonse. Ndakatalika kulyaambauzya kanditi: ‘Tandikonzyi kulesya nkondo, pele inga ndasolekesya kubalesya basinkondo.’ Kufwumbwa buyo ndabona bantu bobilo kabalwana, ndakali kunjilila. Kuzwa kubwana ndakali kufwaambana kunyema, alimwi tiicakali kutola ciindi kuti ndinyeme. Bantu boonse bamucooko caku southern Lebanon bakali kundiyoowa nondakali kulwana kutalulama abugwebenga munguzu zyangu.

Mu 1980, ndakanjila mukabunga kaitwa kuti kung fu mudolopo lya Beirut. Mabbomba alimwi andeke zyamabbomba zyakali kuloka abuzuba, pele ndakazumanana kuunka kuyakwiiya. Buumi bwangu bwakali buyo bwakulya, koona alimwi akupona mbuli mbwaakabede Bruce Lee, sizisobano wa Chinese-American alimwi syaazibwene mucisobano ca kung fu. Ndakamwiiya mbwaakali kugela masusu, mbwaakali kweenda alimwi ambwaakali kwaambaula ciindi naakali kusobana kung fu. Tiindakali kuseka-seka.

Mbaakani yangu yakali yakuba syaazibwene wa kung fu uuyinda mucisi ca China. Buzuba bumwi mangolezya nondakali kwiiya kung fu  kutegwa ndilibambile lweendo lwangu lwakuya ku China, ndakamvwa muntu uukonkomona amulyango. Mweenzuma wakaboola antoomwe abakamboni ba Jehova bobilo. Kandisamide cisani cisiya ncondakali kubelesya mucisobano alimwi nkasaalo kayeenda mubili woonse, ndakabaambila kuti, “Taakwe ncondizyi kujatikizya Bbaibbele.” Tiindakazyi kuti kuzwa aciindi eeci, buumi bwangu bwakali kuyoocinca.

Bakamboni bakanditondezya mu Bbaibbele ikaambo bantu ncobatakonzyi kuzwidilila mukugwisya bugwebenga ankondo. Bakapandulula kuti Saatani Diabolosi ngosikutalisya mapenzi aali boobo. (Ciyubunuzyo 12:12) Ndakakkomana akaambo kaluumuno alimwi abusicamba mbobakatondezya Bakamboni. Alimwi ndakakkomana kapati ciindi nobakandiyiisya kuti Leza ulijisi zina. (Intembauzyo 83:18) Alimwi bakanditondezya lugwalo lwa 1 Timoteyo 4:8 ilwaamba kuti: “Kunyanyaasya mubili kugwasya buyo asyoonto; pele kubelekela Leza cakulyaaba kulagwasya muzyintu zyoonse, nkaambo kujisi cisyomezyo cabuumi bwalino aboobo bulangilwa kumbele.” Majwi aaya akandigwasya kapati mubuumi bwangu.

Cuusisya ncakuti, tiitwakabonana alimwi a Bakamboni, mbokunga bamukwasyi wangu bakabaambila kuti batakabooli alimwi. Nokuba boobo, ndakacinca muzeezo akucileka kwiiya kung fu mpoonya ndakatalika kwiiya Bbaibbele. Bana bakwesu tiibakaukkomanina muzeezo ooyu, pele ndakali kuyandisisya kubajana alimwi Bakamboni ba Jehova kutegwa ndiiye Bbaibbele ambabo.

Ndakazumanana kubayandaula Bakamboni pele tiindakabajana pe. Aciindi eeco, ndakausa kapati akaambo kalufwu lwabataata ilwatakali kuyeeyelwa kubikkilizya amapenzi aamwi aamumukwasyi. Ndakali kubeleka mukkampani yamayake, mpoonya buzuba bumwi, mubelesima wazina lya Adel wakaboola akundibuzya ikaambo ncondakali kulibonya kuusa kapati. Wakatalika kwaamba kujatikizya bulangizi bwabubuke bujanika mu Bbaibbele. Mumyezi iili fwuka yakatobela, Kamboni ooyu siluyando alimwi silweetelelo wakandiyiisya Bbaibbele cakukkazyika moyo.

Notwakali kuyaambele kwiiya, ndakatalika kubona mbocakali kuyandika kupanga kucinca kupati kujatikizya bukkale bwangu. Tiicakali cuuba-uba pe. Ndakali kufwambaana kukalala alimwi akufwambaana kunyema. Kwiinda mukwiiya Bbaibbele, ndakaiya mbondeelede kulyeendelezya akutacita kufwumbwa caboola kumoyo. Mucikozyanyo, mulugwalo lwa Matayo 5:44 muli lulayo ndwaakapa Jesu lwakuti: “Amuzumanane kuyanda basinkondonyoko akubapailila aabo bamupenzya.” Alimwi alugwalo lwa Baloma 12:19 lulacenjezya kuti: “Mutapilusizyi muntu cibi, . . . nkaambo kulembedwe kuti: ‘“Cisubulo ncicangu; ndime nendiyoopilusya cibi”, mbwaamba Jehova.’” Magwalo aayo alimwi aambi akandigwasya asyoonto-syoonto kuti ndibe aluumuno.

Nokuba kuti kumatalikilo bamukwasyi wangu bakaukazya muzeezo wangu wakuti kandiiya a Bakamboni ba Jehova, lino balabalemeka Bakamboni. Mubwini, umwi wabana bakwesu wakandisangana mukukomba Jehova, alimwi kusikila nobakafwa, bamaama bakali kwaambila bantu kujatikizya lusyomo lwesu.

Kuyungizya waawo ndalelekwa kapati kuba a Anita imukaintu mubotu alimwi uusyomeka, alimwi ngomweenzuma ngondibeleka limwi mumulimo waciindi coonse. Kuzwa mumwaka wa 2000, mebo alimwi a Anita tukkala mudolopo lya Eskilstuna mucisi ca Sweden oomo motugwasyilizya kuyiisya Bbaibbele kubantu baambaula mwaambo waci Arabic.

Ndicilimvwa bubi ndabona bantu ibapenga akaambo kankondo. Pele kuzyiba kaambo ncozicitikila alimwi akuzyiba kuti ino-ino Leza uyakwiimanizya nkondo, kundipa kuba aluumuno alimwi alukkomano lwini-lwini.—Intembauzyo 37:29.