Amweezeezye usyi mwana kabandika amwanaakwe uujisi myaka iili ciloba. Waambila mwanaakwe kuti, “Kaindi, Leza wakalenga nyika azintu zyoonse zili mumo, alimwi wakalenga zuba, mwezi alimwi anyenyezi.” Mwanaakwe musankwa wayeeya kujatikizya makani aaya mpoonya akubuzya kuti, “Bataata, ino nguni wakamulenga Leza?”

Bausyi baingula ategwa: “Taakwe wakamulenga Leza. Walikupona lyoonse.” Bwiinguzi oobu butakatazyi bwamusika amoyo mwana calino. Pele nayaabukomena, wazumanana kuyeeya kujatikizya mubuzyo ooyu. Camukatazya kumvwisya ikaambo muntu umwi mbwatakonzyi kuba amatalikilo. Nkaambo buya abwalo bubumbo bulijisi matalikilo. Aboobo walibuzya kuti, ‘Ino Leza wakazwa kuli?’

Ino Bbaibbele liingula buti? Lilaamba mbubwenya buyo mbuli muzyali wamucikozyanyo mbwaacita. Musa wakalemba kuti: “O Mwami, . . . zilundu kazitana kwaanzwa, kotana kubumba nyika aluwa, kuzwa kuciindi eco akusikila kuziindi zyoonse nduwe Leza.” (Intembauzyo 90:1, 2) Awalo musinsimi Isaya wakaamba cakukankama kuti: “Sa tona kuziba? Sa tona kumvwa? Leza uuteeli, Jehova, wakalenga magolelo oonse aanyika”! (Isaya 40:28) Mbubwenya buyo, alwalo lugwalo lwa Juda lwaamba kuti Leza walikupona “kuzwa lili alili asunu.”—Juda 25.

Magwalo aaya atutondezya kuti Leza “Mwami walyoonse alyoonse,” kweelana ambwaakaamba mwaapostolo Paulo. (1 Timoteyo 1:17) Eeci caamba kuti Leza lyoonse walikupona, nokuba kuti twalanga bulamfwu bwaciindi kuya musyule. Alimwi unoopona lyoonse. (Ciyubunuzyo 1:8) Aboobo, mbwaanga walikupona alimwi unoopona lyoonse alyoonse, eeci citondezya bube bwakuba Singuzuzyoonse.

Nkaambo nzi makani aaya ncaakatazya kwaamvwisya? Nkaambo kakuti buumi bwesu bufwaafwi butupa kubona ciindi ikutali mbuli mbwacibona Jehova. Akaambo kakuti Leza walikupona lyoonse alyoonse, kulinguwe myaka iili 1000 ili mbuli buzuba bomwe. (2 Petulo 3:8) Mucikozyanyo: Sena nsozi, yalo iipona buyo mazuba aali 50, ilakonzya kumvwisya mbocili cilamfwu ciindi ncotupona, nkokuti myaka iili 70 naa 80? Peepe! Alimwi buya Bbaibbele lyaamba kuti tuli mbuli nsozi kuti twalyeezyanisya ku Mulengi wesu Mupati. Ayalo mizeezo yesu taikonzyi kweezyanisyigwa ayakwe. (Isaya 40:22; 55:8, 9) Aboobo tacigambyi kuti kuli zintu zimwi zijatikizya bube bwa Jehova nzyotutamvwisyi.

Nokuba kuti makani aakuti Leza walikupona alimwi unoopona lyoonse alyoonse alakatazya kwaamvwisya, makani aaya alamvwika. Ikuti kuli muntu wakamulenga Leza, nkokuti muntu ooyo ngo Mulengi. Pele, kweelana a Bbaibbele mbolipandulula, Jehova ngonguwe “wakalenga zyintu zyoonse.” (Ciyubunuzyo 4:11) Kuyungizya waawo, tulizyi kuti aciindi cimwi bubumbo tiibwakaliko. (Matalikilo 1:1 2) Ino bwakazwa kuli? Nkokuti kwakeelede kusaanguna kuba Sikubulenga. Mbubonya buyo Leza wakaliko kakutanaba zilenge zimwi zisumpukide mbuli mwanaakwe simuzyalwa aalikke alimwi abangelo. (Jobu 38:4, 7; Bakolose 1:15) Aboobo cilasalala kuti, Leza wakasaanguna kupona kali alikke. Tanaakali kukonzya kulengwa; taakwe cintu cakali kupona icakali kukonzya kumulenga.

Kubako kwesu alimwi akwabubumbo boonse, mbumboni bwakuti kuli Leza walikupona alimwi unoopona lyoonse alyoonse. Ooyo wakapa kuti bubumbo bwesu kabweenda, wakapanga milawo yakweendelezya bubumbo, nkokuti kweelede kuti wali kupona lyoonse. Walo alikke nguwakali kukonzya kupa buumi kuzintu zyoonse.—Jobu 33:4.