Nzila Zili Ciloba Zikonzya Kutugwasya Kuzwidilila Notubala Bbaibbele

“Ibbaibbele ndeliinda kuulwa kwiinda mabbuku aambi amwaka.”—TIME MAGAZINE.

“Zimwi ziindi ndilabala Bbaibbele, pele talindinoneezyi.”—KEITH, MWIIMBI UUDUMIDE WAKUCISI CA ENGLAND.

BANTU banji balilijisi Bbaibbele pele tabamvwisyi nobabala. Nokuba boobo, bamwi zilabakkomanisya nzyobabala mu Bbaibbele. Mucikozyanyo, ba Nancy bakaamba kuti: “Kuzwa nindakatalika kubala Bbaibbele akuzinzibala kuyeeya azyintu nzyondibala lyoonse mafwumo-fwumo, ndilimvwa kuti ndilakonzya kwaalanganya mapenzi aboola abuzuba. Kucita boobu candigwasya kulwana bulwazi bwamumizeezo kwiimpana anzila nzindakali kubelesya kwamyaka iili 35 yainda.”

Ikuti naa tamunalibala Bbaibbele, sena tamugambwi kuti bamwi lilabagwasya? Ikuti naa mwakatalika kale kubala Bbaibbele, ino ncinzi ncomukonzya kucita kutegwa mugwasyigwe? Amusole kubelesya nzila eezyi zili ciloba izili mucibalo eeci.

1—Amubale kamujisi makanze mabotu

▪ Mulakonzya kulibala Bbaibbele mbuli bbuku linoneezya kubala naa akaambo kakuti mweelede kulibala ndiza kubala kamuyeeya kuti mulajana busolozi munyika eeyi mbyaabi. Pele mulakonzya kugwasyigwa ikuti mulibala kutegwa mwiiye kasimpe kujatikizya Leza. Alimwi mulakonzya kulongezyegwa kuti naa muyanda kubona Bbaibbele mbolikonzya kumugwasya mubuumi.

Magwalo alatondezya mbociyandika kubala Bbaibbele katujisi makanze mabotu kwiinda mukukozyanisya Bbaibbele acimboni-mboni: “Ikuti na muntu ngusikuswiilila buyo, pele tali sikucita makani, ulikozyene amuntu uulilanga mucimboni kubusyu mbwaakalengwa abo, nkaambo  amana kulilanga, ulainka, elyo ulafwambaana kuluba mbwabede. Anukuti uusondela mumulao mulondosi wabulubusi, akukakatila kulinguwo, mbwaatali sikuswiilila amatwi buyo uuluba pele sikumana mulimo, ngonguwe uuti longezegwe mukucita kwakwe.”—Jakobo 1:23-25.

Muntu waambwa mucikozyanyo eeci wakalilanga mucimboni-mboni mbwaboneka kubusyu, pele tanaakabambulula aakali kuyandika. Ambweni wakalilanga buyo asyoonto alimwi ndiza tanaakali kuyanda kulibamba. Mbubwenya buyo, tatukonzyi kugwasyigwa ikuti naa katutalibali kabotu Bbaibbele naaba kutazyibelesya nzyotubala. Mukwiimpana, tulakonzya kukkomana ikuti katubala Bbaibbele katujisi makanze aakuba “sikucita” makani akupa kuti Leza katweendelezya muzyintu nzyotuyeeya anzyotucita.

2—Amusale busanduluzi buluzi

▪ Ambweni mulijisi ma Bbaibbele aaindene-indene mumwaambo wanu. Nokuba kuti busanduluzi bwa Jwi lya Leza buli boonse bulakonzya kumugwasya, busanduluzi bumwi bulakatazya kumvwa akaambo kakuti bakabelesya mwaambo wakaindi naa wabantu bayiide kapati. (Incito 4:13) Bumwi busanduluzi bulacinca ncolyaamba Bbaibbele akaambo kakuti buyeeme kapati azilengwa. Mucikozyanyo, bamwi bakaligusya zyina lya Leza, Jehova, akubikka mabala aabulemu mbuli “Leza” naa “Mwami.” Aboobo, mweelede kuyandaula Bbaibbele lyakasandululwa mumwaambo uutakatazyi kumvwa alimwi unoneezya kubala.

Mamiliyoni aabantu nyika yoonse bajana kuti Ibbaibbele lya New World Translation lililuzi, talikatazyi kumvwa alimwi lilanoneezya kubala. * Amumvwe ncaakacita umwi muntu uucembeede ukkala kucisi ca Bulgaria. Wakajanika kumiswaangano ya Bakamboni ba Jehova alimwi wakapegwa Bbaibbele lya New World Translation. Naakalibala Bbaibbele eeli wakaamba kuti: “Ndali kulibala Bbaibbele kwamyaka minji, pesi tandinabala litakatazyi kumvwa mbuli bwaleeli.”

3—Amupaile

▪ Mulakonzya kulimvwisya Bbaibbele kwiinda mukulomba lugwasyo kuli Sikwaanza, mbuli mbwaakacita sintembauzyo iwakaamba kuti: “Bbanuna meso aangu, mbone zintu zigambya zyamumulao wako.” (Intembauzyo 119:18) Lyoonse mwanoobala Magwalo, amupaile kuli Leza, kumulomba kuti amugwasye kumvwisya Jwi lyakwe. Alimwi mweelede kumulumba Leza akaambo ka Bbaibbele ndyaakatupa lyalo litugwasya kumuzyiba.—Intembauzyo 119:62.

Sena Leza ulaimvwa mipailo iili boobu? Amumvwe cakabacitikila basimbi bakubusi bobilo ibakkala ku Uruguay. Bakagambwa kubona ncolyaamba Bbaibbele kulugwalo lwa Daniele 2:44 alimwi bakapaila kuli Leza kuti abatumine muntu uukonzya kubagwasya kumvwisya ncolwaamba lugwalo oolu. Kabatanajala Bbaibbele basimbi aaba, kwakasika Bakamboni ba Jehova bobilo, mpoonya bakabala lugwalo ndulonya ndobakali kubala basimbi akubapandulwida kuti Bwami bwa Leza buyoogwisya mfwulumende zyabantu. * Basimbi bobilo aaba bakasyoma kuti Leza wakawiingula mupailo wabo.

4—Amubale Bbaibbele abuzuba

▪ Sikusimba mabbuku umwi wakaamba kuti, “bantu banji bakatalika kuula ma Bbaibbele” ciindi zigwebenga nizyakanyonyoona kucisi ca United States mu September 11 2001. Bantu banji Ijwi lya Leza balibala buyo nobajisi mapenzi. Pele Bbaibbele lilatukulwaizya kulibala abuzuba, nkaambo lyaamba kuti: “Eli ibbuku lyamulao talyeelede kutantamuka kumulomo ako, pe, uleelede kubika miyeeyo yako kulindilyo lyoonse buyo, isikati amasiku, kuti ubambe kabotu makani oonse aalembedwe mumo, nkaambo kucita obo nkokukonzya kubotya inzila yako akukuletela coolwe.”—Joshua 1:8.

Ibubotu bwakubala Bbaibbele abuzuba bulakonzya  kukozyanisyigwa amuntu iwakacisidwe bulwazi bwamoyo amane wakatalika kulya zyakulya zijisi busani. Sena ciyoomugwasya kulya zyakulya zijisi busani lilikke amvwa mucamba mwacisa? Peepe. Weelede kulya zyakulya zijisi busani abuzuba kutegwa kataciswi-ciswi. Mbubwenya buyo, kubala Bbaibbele abuzuba kuyoomugwasya ‘kubotya nzila yanu.’

5—Amubelesye nzila ziindene-indene

Kubala Bbaibbele kuzwa ku Matalikilo kusika ku Ciyubunuzyo kulakonzya kumugwasya, nokuba boobo, mulakonzya kubelesya nzila zimbi. Amulange-lange nzila eezyi.

Amubale makani aamba muntu uumwi wamu Bbaibbele. Amubale zyaandaano naa mabbuku aamu Bbaibbele aamba mukombi umwi wa Leza, mbuli:

• Josefa: Matalikilo 37-50.

• Rute: Rute 1-3.

• Jesu: Matayo 1-28; Marko 1-16; Luka 1-24; Johane 1-21. *

Amubale makani aamba kaambo kamwi. Amubale magwalo aamba kaambo aako. Mucikozyanyo, amuvwuntauzye makani aajatikizya mupailo, mwamana, mubale ncolyaamba Bbaibbele amupailo akubona mipailo iimwi iilembedwe mu Bbaibbele. *

Amubale cakupozya. Mulakonzya kugwasyigwa kwiinda mukubala Bbaibbele cakupozya. (Ciyubunuzyo 1:3) Alimwi mulakonzya kubala cakupozya antoomwe abamumukwasyi, kucincana kubala mincali naa kubapa cibeela ciiminina muntu umwi iwaambwa mucibalo eeco. Ibamwi bamvwa kabotu kuswiilila nolibalwa Bbaibbele muteepu. Bakaintu bamwi bakaamba kuti: “Cakali kundikatazya kutalika kubala Bbaibbele, aboobo ndakatalika kwiinda mukuswiilila nolibalwa Bbaibbele muteepu. Lino ndajana kuti Bbaibbele lilanoneezya kubala kwiinda kabbuku katwaano.”

6—Amuzinzibale kuyeeya

▪ Bukkale bwamazuba aano tabuzumizyi kuzinzibala kuyeeya. Pele, mbubwenya mbotweelede kutamfwuna cakulya kutegwa caunka mwida ciyake mubili, tweelede kuzinzibala kuyeeya zyintu nzyotubala mu Bbaibbele kutegwa tugwasyigwe. Tulacita oobu kwiinda mukuliyeezya nzyotubala akulibuzya mibuzyo mbuli yeeyi: ‘Ino ncinzi ncindaiya kujatikizya Jehova Leza? Ino eeci cindijatikizya buti? Ino inga ndacibelesya buti kugwasya bambi?’

Kuyeeya boobu kupa kuti makani aali mu Bbaibbele atunjile mumoyo akupa kuti tukkomane notubala Jwi lya Leza. Lugwalo lwa Intembauzyo 119:97 lwaamba kuti: “Nduuyandisya loko mulao wako! Nduuyeeya buzuba boonse.” Akaambo kakuzinzibala kuyeeya, sintembauzyo wakali kwaabikkila maano Magwalo ciindi coonse. Ikucita boobu cakamugwasya kuziyanda kapati nzyaakali kubala.

7—Amulombe lugwasyo kutegwa mumvwisye

▪ Leza ulizyi kuti tatukonzyi kumvwisya Jwi lyakwe kakunyina kugwasyigwa. Noliba Bbaibbele lilaamba kuti ‘lijisi makani amwi mayumu kumvwugwa.’ (2 Petro 3:16) Ibbuku lya Incito lyaamba mubelesi wamfwulumende waku Etiopiya wakagambwa anzyaakali kubala mu Bbaibbele. Leza wakatuma mubelesi wakwe kutegwa amugwasye, eeci cakapa kuti muna Etiopiya aunke ‘munzila yakwe uya bubotelwa.’—Incito 8:26-39.

Andinywe mulakonzya kugwasyigwa kuti mwalomba lugwasyo kutegwa mumvwisye nzyomubala mu Bbaibbele. Amwaambile Bakamboni ba Jehova bakkala kubusena nkomubede, naa mulembele kukkeyala iili apeeji 4 mumagazini eeyi kutegwa kamwiiya ciiyo ca Bbaibbele citabbadelelwi.

Bupanduluzi buyungizidwe