Ŵanthu wo atanjana atesesa kukambiskana m’nthowa zakupambanapambana nge kumbirana foni, kutumizirana mauthenga pamwenga kulemberana makalata. Mwaviyo, kuti tije pa ubwezi wakukho ndi Chiuta titenere kukambiskana nayu nyengu zosi. Kumbi tingachita wuli venivi?

Tingakambiskana ndi Yehova mwakuromba. Kweni kuromba kwaku Chiuta kungayanana cha ndi mo tikambiskiyana ndi munyidu. Tingaluwanga cha kuti asani tiromba, tikambiskana ndi Mulengi Wapachanya Limu m’chilengedu chosi. Pa chifukwa ichi, tirombengi mwaulemu. Kweni kuti Chiuta wamukengi marombu ngidu, tikhumbika kuchita so vinthu vinyaki. Tiyeni tiwonepu ŵaka vitatu.

Chakwamba, tirombengi kwaku Yehova Chiuta pe, m’malu mwakuromba kwaku Yesu, “ŵanthu atuŵa mtima,” pamwenga angoza. (Chituwa 20:4, 5) Bayibolo likamba mwakuvwika umampha kuti: “Mu kanthu kosi, mu rombu ndi mu niniziku pamoza ndi kuwonga, mapemphu nginu ngaziŵiki kwaku Chiuta.” (Ŵafilipi 4:6) Chachiŵi, tirombengi kuporote m’zina la Mwana waku Chiuta, Yesu Khristu. Yesu wangukamba kuti: “Kuti yumoza wangaza ku Dada cha, kwambura kuti watuziya mwaku ini.” (Yohane 14:6) Chachitatu, tirombengi mwakukolerana ndi khumbu laku Chiuta. Bayibolo likamba kuti: “Asani tipempha kanthu kwakuyana ndi khumbu laki, watuvwa ifwi.” a​—1 Yohane 5:14.

Ubwezi wa ŵanthu uswera cha kumala asani yumoza pe ndiyu watanja kukambiskana ndi munyaki. Mwakuyanana ŵaka, nasi tizomerezgengi kuti Chiuta wakambiskanengi nasi ndipu tivwengi vo watitikambiya. Kumbi mutiyiziŵa nthowa yo Chiuta wakambiskiyana nasi?

Mazuŵa nganu, Yehova Chiuta, wakambiskana nasi kuporote m’Mazu ngaki, Bayibolo. (2 Timote 3:16, 17) Nchifukwa wuli tikamba viyo? Tiyeruzgiyi kuti mubwezi winu wakulembiyani kalata. Ndipu asani mwamaliza kuŵerenga, mukambiya anyinu mwalikondwa kuti, “Mubwezi wangu wandilembe kalata ndipu ndaja nge ndakambiskana nayu masu ndi masu!” Kweni yapa mung’anamuwa kuti mwakambiskana nayu masu ndi masu cha. Mwakuyana ŵaka, asani muŵerenga Bayibolo, vija ngeti muzomerezga kuti Yehova wakambiskanengi namwi. Ndichu chifukwa chaki Gina, yo wazumbulika kukwamba kwa nkhani iyi wangukamba kuti, “Ndiwona kuti asani ndikhumba kuti Chiuta wandiwonengi kuti nde bwezi laki, nditenere kuŵerenga ‘kalata’ yo wakutilembe, Bayibolo.” Iyu wangukamba so kuti, “Kuŵerenga Bayibolo zuŵa lelosi kwandiwovya kuti ndije pa ubwezi wakukho ndi Chiuta.” Kumbi imwi, muzomerezga kuti zuŵa lelosi Yehova wakambiskanengi namwi mwa kuŵerenga Mazu ngaki Bayibolo zuŵa lelosi? Kuchita ivi kungakuwovyani kuti muje pa ubwezi wakukho ndi Chiuta.