Bayibolo likamba mwakuvwika umampha kuti Yesu wayuskanga nadi ŵanthu akufwa. Iyi ndi nthanu ŵaka cha kweni ndi vinthu vo vinguchitika nadi pa nyengu ndi malu ngakuziŵika umampha. Mwakuyeruzgiyapu, mu 31 C.E., nyengu yachihanya, wumba wa ŵanthu ungwenda ndi Yesu kutuwa ku Kapernaumu kuluta ku Naini. Ndipu ŵati afika angusaniya wumba unyaki so. Mwaviyo, mungagomezga kuti Yesu wanguyuska nadi munthu pa ulendu uwu chifukwa nkhani iyi yikulembeka m’Bayibolo, lo ndi Mazu Ngaku Chiuta, ndipuso wangumuyuska wumba wa ŵanthu uchiwona.​—Ŵerengani Luka 7:11-15.

Yesu wanguyuska so Lazaro pati pajumpha mazuŵa nganayi kutuliya po wangufwiya. Mutenere kugomezga vo Yesu wanguchita pa zuŵa ili chifukwa ŵanthu anandi anguwona vo vinguchitika.​—Ŵerengani Yohane 11:39-45.

Yesu wayuskanga ŵanthu akufwa chifukwa chakuti wenga walisungu. Iyu wakhumbanga so kuti ŵanthu aziŵi kuti Awiski wo akulenga chamoyu chechosi ndiwu akumupaska nthazi yakuthereske nyifwa.​—Ŵerengani Yohane 5:21, 28, 29.

Tigomezga malayizgu ngosi ngo Yesu wakukamba chifukwa chakuti wanguyuskapu ŵanthu akufwa. Iyu wazamuyuska so ŵanthu anandi kusazgapu ŵanthu ambula urunji wo akusambirapu cha vakukwaskana ndi Chiuta wauneneska. Yiwu azamupaskika mwaŵi wakusambira vakukwaskana ndi Yehova Chiuta kuti amuziŵi ndi kumwanja.​—Ŵerengani Machitidu 24:15.