Yesu wangukonkhoska kuti “a kamskambu kamana” azamupaskika malu mu Ufumu wakuchanya. (Luka 12:32) Kweni munthu yo wapaskika mwaŵi wenuwu wakhumbika kuwuwona mwakupepuka cha. Yesu wangulutirizga kukonkhoska kuti asani munthu we ndi mwaŵi wakuchilamuliya mu Ufumu wakuchanya, wakhumbika kuja ndi maŵanaŵanu ngakwenere.

Yesu wachikamba venivi, wachiskanga akusambira ŵaki kuti akhumbika kulutirizga kulindizga mpaka pa nyengu yo iyu waziyengi so. Iyu wanguti: “Vwalani ndipu nozgekani kweniso nyali zinu zimbulikengi. Ndipuso mujengi nge anthulumi wo alindizga mweneku wa nyumba kuti waweku ku zowala. Wachiweku wagong’osa pachisasa ndipu nyengu yeniyo ŵanthu wo atimujuliya. Mbakutumbikika akapolu wo mbuyawu wachiza watiŵasaniya ŵe masu.”—Luka 12:35-37.

Akusambira aku Yesu angusuzgika cha kuvwisa ntharika yo Yesu wangukamba. Akapolu wo akambika muntharika yeniyi ŵenga akunozgeka ndipu alindizganga kuza kwa mbuyawu. Yesu wangukonkhoska kuti: “Mbakutumbikika akapolu wo, chifukwa chinanga mweneku wa nyumba wangaza mu ulinda wachiŵi [kwambiya cha m’ma 9 mpaka 12 koloku usiku] pamwenga mu ulinda wachitatu [kwambiya 12 koloku usiku mpaka cha m’ma 3 koloku matandakucha], watiŵasaniya mbakunozgeka.”—Luka 12:38.

Ulongozgi wo Yesu wangukamba wakonkhoskanga ŵaka vo kapolu wakulimbikiya ntchitu pamwenga antchitu apanyumba atenere kuchita pe cha. Tikamba viyo chifukwa Yesu yo ndi Mwana wa munthu, wangujikonkhoska muntharika yeniyi. Iyu wangukambiya akusambira ŵaki kuti: “Yimwi namwi lutirizgani kuja akunozgeka, chifukwa Mwana wa munthu wazengi mu ora lo yimwi muleka kuŵanaŵanaku.” (Luka 12:40) Vo Yesu wangukamba vingulongo kuti nyengu yinyaki kunthazi iyu wazamukuza. Mwaviyo, iyu wakhumba kuti akusambira ŵaki ukongwa “a kamskambu kamana” ajengi akunozgeka.

Peturo wakhumbanga kuvwisa vo Yesu wang’anamuwanga. Mwaviyo, wangufumba kuti: “Ambuya kumbi ntharika iyi mukambiya isi pe pamwenga mukambiya so weyosi?” M’malu mwakumumuka ŵaka Peturo, Yesu wangugwiriskiya ntchitu ntharika. Iyu wanguti: “Kumbi ndiyani yo ndi mteŵeti wapanyumba wakugomezgeka kweniso wazeru, mweniyo mbuyaki wamuŵikengi kuti wawoneriyengi ateŵeti ŵaki wosi a panyumba, kuti waŵapaskengi chakurya chakukwana pa nyengu yakwenere? Ngwakutumbikika kapolu yo mbuyaki wachiza watimusaniya wachichita venivi. Nditikuneneskiyani kuti wazakumuŵika kuti wawoneriyengi vinthu vaki vosi.”—Luka 12:41-44.

“Mbuyawu” yo wakambika muntharika yakwamba, wamiya Yesu yo ndi Mwana wa munthu. “Mteŵeti wapanyumba wakugomezgeka” mbanthu wo ŵe mugulu la “kamskambu kamana” wo azamupaskika Ufumu. (Luka 12:32) Yapa, Yesu wang’anamuwanga kuti kagulu kanyaki ka ŵanthu wo ŵe mu kamskambu kamana azamupaskika ntchitu yakuwonere “ateŵeti ŵaki wosi a panyumba,” kuti waŵapaskengi “chakurya chakukwana pa nyengu yakwenere.” Mwaviyo, Peturo ndi akusambira anyaki wo Yesu waŵasambizanga kweniso kuŵawovya kuti aje pa ubwezi ndi Chiuta, angusimikiza kuti nyengu yinyaki kunthazi Mwana wa munthu wazengi. Pa nyengu yeniyi, pazamuja nthowa yapade yakuti akusambira aku Yesu wo adanika kuti “ateŵeti ŵaki wosi a panyumba” alondiyengi chakurya chauzimu.

Yesu wangukonkhoska chifukwa chinyaki cho akusambira ŵaki akhumbikiya kuja akunozgeka kweniso kuja ndi maŵanaŵanu ngakwenere. Iyu wanguti vingachitika kuti wakusambira munyaki wayambi kuchita mphwayi pakuteŵete Chiuta pamwenga so kwamba kususkana ndi abali ndipuso azichi. Yesu wangukamba kuti: “Kweni asani kapolu yo wangayamba kukamba mumtima mwaki kuti, ‘Ambuya aswera kuza,’ ndipu wangayamba kupuma akapolu anthulumi ndi anthukazi ndipuso kurya ndi kumwa kweniso kuloŵe, mbuya wa kapolu yo wazengi pa zuŵa lo watiliŵanaŵaniya cha kuti wangaza ndipuso pa ora lo watiliziŵa cha. Ndipu wazakumulanga ukongwa kweniso wazakumuŵika kuchigaŵa cha ŵanthu ambula kugomezgeka.”—Luka 12:45, 46.

Yesu wangukamba kuti wanguza “kuzibuska motu pacharu.” Ndipu ndivu wanguchita nadi. Iyu wangwambisa  nkhani zo zinguchitiska kuti ŵanthu asuskanengi ukongwa kweniso zo zinguchitiska kuti visambizu ndi midawuku yaboza ya visopa yiwoneke. Venivi vinguchitiska kuti chinanga mbanthu wo akhumbikanga kukoliyana ukongwa apatukani. Iyu wanguti: “Ada azamupatukana ndi mwana wawu munthulumi, mwana munthulumi wazamupatukana ndi awisi, ama azamupatukana ndi mwana wawu munthukazi, mwana munthukazi wazamupatukana ndi anyina, mpongozi wazamupatukana ndi mkumwana waki, mkumwana wazamupatukana ndi apongozi ŵaki.”—Luka 12:49, 53.

Yesu watenere kuti wachikamba mazu yanga wakambiyanga ukongwa akusambira ŵaki. Pavuli paki, Yesu wangung’anamukiya gulu la ŵanthu. Ŵanthu anandi pa gulu ili angukanisisa kuzomereza kuti Yesu ndi Mesiya chinanga kuti anguwona ukaboni wo walongonga venivi. Mwaviyo, wanguŵakambiya kuti: “Asani muwona mtambu ukwera kuzambwi, nyengu yeniyo mukamba kuti, ‘Kuŵengi chivuwa cha mphepu,’ ndipu chiŵaku nadi. Asani muwona mphepu yakutuliya kumwera mukamba kuti, ‘Kufundengi ukongwa,’ ndipu vichitika nadi. Akunyenga yimwi, muziŵa mo kucharu kuŵiyengi, kweni mutondeka kuziŵa kuti vo vichitika pa nyengu yinu, ving’anamuwanji.” (Luka 12:54-56) Viwoneke limu kuti ŵanthu ŵenaŵa angunozgeka cha.