Yesu wati waja mazuŵa ngaŵi ku Samariya, wanguwere kwawu. Chinanga kuti wangupharazga kwa mazuŵa nganandi ku Yudeya kuphara mo waŵanaŵaniyanga, iyu wanguwere ku Galileya ndi chilatu chakuti wakapumuwi cha. Kweni wangwamba kupharazga ukongwa muchigaŵa cho wangukuliya. Yesu wanguziŵa kuti ŵanthu akumulonde umampha cha kwawu. Ndichu chifukwa chaki wangukamba kuti: “Mchimi watumbikika cha kwawu.” (Yohane 4:44) M’malu mwakuti akusambira ŵaki alutirizgi kuja ndi Yesu, yiwu anguwere kwawu kuchija ndi mabanja ngawu kweniso kuti akalutirizgi ntchitu zo agwiranga kali.

Kumbi Yesu wangwamba kupharazga uthenga wuli? Iyu wapharazganga uthenga wakuti: “Ufumu waku Chiuta we pafupi. Lapani, ndipu jani ndi chivwanu mu uthenga wamampha.” (Mariko 1:15) Kumbi ŵanthu anguchitanji ŵati avwa uthenga wenuwu? Ŵanthu anandi a ku Galileya, angumulonde umampha Yesu ndipuso amupaskanga ulemu. Yiwu anguchita venivi chifukwa cha uthenga wo wapharazganga pe cha. Kweni anguchita viyo chifukwa anyaki mwa ŵanthu ŵenaŵa anguwona vakuziziswa vo Yesu wanguchita pa phwandu la Pasika ku Yerusalemu.—Yohane 2:23.

Kumbi Yesu wati wafika ku Galileya wangwambiya pani kupharazga? Iyu wangwambiya ku Kana, ko nyengu yinyaki wangusambusa maji kuja vinyu pa phwandu la zowala. Pa ulendu wachiŵi wenuwu we ku Kana, Yesu wanguvwa kuti mwana munyaki watama ukongwa mwakuti wenga pafupi kufwa. Mwenuyu wenga mwana wa mteŵeti wa panyumba ya fumu Herodi Antipasi, yo wangulamula kuti Yohane Mubatizi wadumuliki mutu. Mteŵeti mwenuyu wanguvwa kuti Yesu watuwaku ku Yudeya ndipu waluta ku Kana. Mwaviyo, wangusoka kutuwa kwawu ku Kaperenao kuti wakakumani ndi Yesu ku Kana. Mteŵeti wa pa nyumba ya fumu mwenuyu yo wenga ndi chitima ukongwa wangupempha Yesu kuti: “Ambuya, tiyeni mwana wangu wechendafwi.”—Yohane 4:49.

Mteŵeti waku Herodi watenere kuti wanguzizwa ukongwa ndi vo Yesu wangumuka. Yesu wangukamba kuti: “Lutanga, mwana waku ngwamoyu.” (Yohane 4:50) Mteŵeti waku Herodi wangugomezga vo Yesu wangukamba ndipu wanguwere kwawu. Wachiluta, wangukumana ndi akapolu ŵaki wo anguza kuzimukambiya uthenga wamampha wakuti mwana waki ngwamoyu. Pakukhumba kusimikiza vo Yesu wangukamba, iyu wanguŵafumba kuti, ‘Kumbi wachira nyengu wuli?’

Yiwu angumumuka kuti: “Zana, mu ora la 7 ndipu wanguleke kufunda liŵavu.”—Yohane 4:52.

Mteŵeti waku Herodi wanguziŵa kuti mwana waki wanguchira nyengu yeniyo Yesu wangukambiya kuti, “Mwana waku ngwamoyu.” Pavuli paki, mteŵeti mwenuyu yo wenga wakukhupuka ukongwa mpaka kuja ndi akapolu, limoza ndi ŵanthu a munyumba yaki, anguja akusambira aku Khristu.

Mwaviyo, Yesu wanguchita vakuziziswa viŵi ku Kana. Iyu wangusambusa maji kuja vinyu ndipuso wanguchizga mwana yo wenga pamtunda wa makilomita 26 kutuliya po iyu wenga. Iyu wanguchita vakuziziswa vinandi. Kweni kuchizgika kwa mwana uyu kwenga kwambula kuluwika kwa ŵanthu wo ajanga ku Galileya. Vo Yesu wanguchita, vingulongore limu kuti iyu wenga mchimi wakuzomerezeka ndi Chiuta. Kweni kumbi ŵanthu ‘angumutumbika wati wawere kwawu’?

Tiyeni tiwoni vo vinguchitika Yesu wati wawere kwawu ku Nazareti.