‘I he Taimi ‘Okú Ke Ongo‘i Ai ‘Oku ‘Ikai Te Ke Toe Fie Mo‘uí

‘I HE ta‘u taki taha, ‘oku laui mano ‘a e kakai ‘i he ‘Iunaite Seteté ‘ata‘atā pē ‘oku nau feinga ke to‘o ‘enau mo‘uí. ‘Oku ‘omai ‘i he Tohi Tapú ha ‘uhinga tefito ki he ‘uhinga ‘oku siva pehē ai ‘a e ‘amanaki ‘a e tokolahi. ‘Oku fakamatala ai ‘oku tau mo‘ui ‘i he “ngaahi taimi fakalilifu ‘a ia ‘e faingata‘a ke fekuki mo ia.” ‘Oku ongo‘i lahi ‘aupito ‘e he kakaí ‘a e ngaahi tenge ‘o e mo‘uí. (2 Tīmote 3:1; Koheleti 7:7) ‘I he taimi ‘oku lōmekina ai ha taha ‘e he ngaahi loto-mo‘ua ‘o e mo‘uí, te ne fakakaukau nai ki he taonakitá ko ha founga ia ke hao ai mei he mamahí. Ko e hā ‘e lava ke ke faí kapau kuo ‘i ai ha‘o ngaahi fakakaukau pehē?

‘Oku ‘Ikai ko Koe Toko Taha Pē!

Neongo ‘e hā ngali faingatāmaki ‘aupito nai ho tu‘ungá, manatu‘i ‘oku ‘ikai ko koe toko taha pē pea ko e me‘a fakamamahí ‘oku meimei ko e tokotaha kotoa pē ‘oku fehangahangai mo ha fa‘ahinga palopalema  he ‘ahó ni. ‘Oku pehē ‘e he Tohi Tapú: “Ko e fakatupú kotoa ‘oku nau hanganaki to‘e fakataha mo mamahi fakataha.” (Loma 8:22) Lolotonga ‘i ha vaha‘a taimi nounou ‘e hā ngali nai ko ho‘o palopalemá ‘e ‘ikai ‘aupito ke fakalelei‘i ia, ‘oku fa‘a hoko ‘o lelei ange ‘a e ngaahi me‘á ‘i he faai atu ‘a e taimí. Lolotonga iá, ko e hā ‘e lava ke tokoní?

Vahevahe ho‘o ngaahi ongo‘í ki ha kaungāme‘a matu‘otu‘a mo falala‘anga. ‘Oku pehē ‘e he Tohi Tapú: “Ko e kaume‘a ‘oku ne ‘ofa ‘i he taimi kotoa pe; pea ko hoto mo‘oni na‘e fanau‘i ma‘a ha faingata‘a.” (Palōveepi 17:17) Ko e tangata mā‘oni‘oni ko Siopé, ‘a ia ‘oku fakamatala‘i ‘i he Tohi Tapú, na‘á ne fakahaa‘i ‘ene ngaahi ongo‘í ki he ni‘ihi kehé lolotonga ‘a e vaha‘a taimi ‘o ‘ene faingata‘a‘ia lahí. ‘I he taimi na‘á ne ongo‘i ai ‘o hangē ko ia ko ‘ene lea ‘‘oku ou fiu ‘i he‘eku mo‘uí,’ na‘á ne pehē: “Te u laku atu ‘eku launga: Te u lea ‘i he mamahi hoku laumalie.” (Siope 10:1) Ko e talanoa ki he ni‘ihi kehé ‘e lava ke holo hifo ai ‘a e lahi ‘a ho‘o ngaahi ongo‘í, pea ‘e malava ke ne ‘oatu kiate koe ha fakakaukau fo‘ou ki he ngaahi palopalema ‘okú ke fehangahangai mo iá. *

Lilingi atu ho lotó ki he ‘Otuá ‘i he lotu. ‘Oku ma‘u ‘e he ni‘ihi ‘a e fakakaukau ko e lotú ko ha fakanonga fakae‘atamai pē ia, ka ‘oku lea‘aki ‘e he Tohi Tapú ha me‘a ia ‘oku kehe. ‘Oku ui ‘i he Saame 65:2 ‘a Sihova ko e ‘Otuá ko e tokotaha “tali lotu” ia, pea ‘i he 1 Pita 5:7 ‘oku pehē ai: “‘Okú ne tokanga mai kiate kimoutolu.” ‘Oku toutou fakamamafa‘i mai ‘e he Tohi Tapú ‘a e mahu‘inga ‘o e falala ki he ‘Otuá. Ko e fakatātaá:

“Falala ki he ‘Eiki ‘aki ‘a e kotoa ‘o ho loto, ‘o ‘ouae fāki ki ho poto o‘ou: Ke ke fakaongo kiate ia ‘i ho hala kotoa pe, pea ‘e fakatonutonu ‘e ia ho ngaahi ‘alunga.”—PALŌVEEPI 3:5, 6.

“Ko e holi ‘a e kakai ‘oku ‘apasia [kia Sihová] ‘oku ne fakaai; pea ‘oku ongo kiate ia ‘enau kaila, ‘o ne fakamo‘ui.”—SAAME 145:19.

“Ko e loto-falala eni ‘oku tau ma‘u kiate iá, ‘a ia, ‘ilonga ha me‘a ‘oku tau kole ‘o fakatatau ki hono finangaló, ‘okú ne fanongo mai kiate kitautolu.”—1 SIONE 5:14.

“‘Oku mama‘o ‘a Sihova mei he kau angahala: Ka ko e lotu ‘o e faitotonu ‘oku ne ongo‘i.”—PALŌVEEPI 15:29.

Kapau te ke tala ki he ‘Otuá ‘a e ngaahi faingata‘a ‘okú ke fehangahangai mo iá, te ne ‘omai ha tokoni.  ‘I he ‘uhinga lelei, ‘oku fakalototo‘a‘i koe ‘e he Tohi Tapú ke ke “falala kiate ia he taimi kotoa . . . mou lilingi homou loto ‘i hono ‘ao na.”—Saame 62:8.

‘I he Taimi ‘Oku Fiema‘u Ai ha Me‘a Lahi Angé

‘Oku hā mei he ngaahi fakatotoló ko e tokolahi taha ‘o e kakai ‘oku nau to‘o ‘enau mo‘uí kuo nau loto-mafasia nai ‘i ha vaha‘a taimi. * ‘Oku fakamamafa‘i ‘e he me‘á ni ‘a e mo‘oni‘i me‘a ko ia ‘e fiema‘u nai ha tokoni fakafaito‘o. ‘E ‘omai nai ‘e ha toketā ha faito‘o pe fokotu‘u mai ke fe‘unu‘aki ‘a e me‘a ‘oku kaí. ‘I he ngaahi tu‘unga ‘e ni‘ihi, ko ha polokalama fakamālohisino ko ha toe tokoni ola lelei ia ki he faito‘ó. Ko e tokoni fakafaito‘o fakapalōfesinalé kuo fakamo‘oni‘i ‘oku ‘aonga ia ki he tokolahi. *

‘Oku ‘i he Tohi Tapú ‘a e fakamatala lahi ‘a ia ‘e lava ke ne ‘oatu kiate koe ‘a e tokoni mo e ‘amanaki. Ko e fakatātaá, ‘i he Fakahā 21:4, ‘oku lau ai ‘a e Tohi Tapú ‘o fekau‘aki mo Sihova ko e ‘Otuá: “Te ne holoholo ‘a e lo‘imata kotoa pē mei honau matá, pea ‘e ‘ikai ke toe ‘i ai ha mate, pe ha mamahi pe ha tangi pe ha langa. Kuo mole atu ‘a e ngaahi me‘a mu‘á.” Ko ha tala‘ofa faka‘otua eni, pea ko e fakalaulauloto ki aí ‘oku malava ke ne ‘omai ai ‘a e fakafiemālie.

‘Oku vahevahe atu ‘e he Kau Fakamo‘oni ‘a Sihová ‘a e ‘amanaki makatu‘unga ko eni ‘i he Tohi Tapú ki he kakai ‘e laui miliona takatakai ‘i he māmaní. Ko hono olá, ‘oku ma‘u ai ‘e he tokolahi ‘a e ‘amanaki mo‘oni ‘i he ngaahi taimi fakamamahi ko ení. Ki ha fakamatala lahi ange, fetu‘utaki ki he Kau Fakamo‘oni ‘a Sihova ‘i ho feitu‘ú ‘aki ho‘o ‘a‘ahi ki he Fale Fakataha‘anga fakalotofonuá, pe tohi ki he tu‘asila fe‘ungamālie ‘oku hā ‘i he peesi 5 ‘o e makasini ko ení. ‘E lava ke ke vakai foki ki he‘emau Uepisaití ‘i he www.watchtower.org.

[Fakamatala ‘i lalo]

[Puha ‘i he peesi 28]

TOKONI MEI HE TOHI TAPÚ

● “‘Oua ‘e hoko ‘o loto-mo‘ua ‘i ha fa‘ahinga me‘a, ka ‘i he me‘a kotoa pē fakafou ‘i he lotu mo e hū tōtōaki fakataha mo e fakafeta‘i, mou ‘ai ke ‘ilo ai ho‘omou ngaahi kolé ‘e he ‘Otuá; pea ko e nonga ‘a e ‘Otuá ‘a ia ‘oku fakalaka atu ‘i he mahino kotoa pē te ne malu‘i homou lotó pea mo homou ngaahi mafai fakaefakakaukaú fakafou ‘ia Kalaisi Sīsū.”—Filipai 4:6, 7.

● “Na‘a ku ha‘ao ki he ‘Eiki, pea ne talia; pea ne hamusi au mei he‘eku ‘u ilifia.”—Saame 34:4.

● “He ko e loto lavea ‘oku ofi ki ai ‘a e ‘Eiki, pea ‘oku ne fakamo‘ui ‘akinautolu ‘oku laumalie mafesi.”—Saame 34:18.

● “He ko e lotomafesi ‘oku ne faito‘o, pea ‘oku ne ha‘iha‘i honau ngaahi kafo.” —Saame 147:3.

[Puha ‘i he peesi 29]

KAPAU KUÓ KE FAKAKAUKAU TAONAKITA . . . 

Vahevahe ho‘o ngaahi ongo‘í ki ha kaungāme‘a falala‘anga

Lilingi atu ho lotó ki he ‘Otuá ‘i he lotu

Kumi ki ha fale‘i fakafaito‘o

[Puha/Fakatātā ‘i he peesi 30]

KI HE NGAAHI KAUNGĀME‘Á MO E FĀMILÍ

Ko e ngaahi mēmipa ‘o e fāmilí mo e ngaahi kaungāme‘a ofí ‘oku fa‘a hoko ko e ‘uluaki fa‘ahinga ia ‘oku nau fakatokanga‘i ‘a e fakakaukau taonakita ‘a ha tokotaha loto-mamahi. Ko hono fai ha me‘á ‘e malava ai ke ne fakahaofi ‘a e mo‘ui ‘a e tokotaha ko iá! Hoko ko ha tokotaha fanongo kaungāongo‘i. Fakahaa‘i ‘okú ke ‘ilo‘i ‘a e tu‘unga mo‘oni ‘o e ngaahi faingata‘a ‘okú ne fehangahangai mo iá. ‘Oku pehē ‘e he Tohi Tapú: “Lea fakanonga ki he fa‘ahinga ‘oku loto-mafasiá.” (1 Tesalonaika 5:14) Faka‘ai‘ai ‘a e tokotaha loto-mamahí ke ne ma‘u ha tokoni, pea ‘o ka fiema‘u, hokohoko vakai‘i ke fakapapau‘i ‘oku fai ha fokotu‘utu‘u ki ha tokoni pehē.