Mhôônom ka “tahav mbu ka mbu wase or u fan er ishima i lu orgen ker yô, shin u gbidyen kwar fan er a lu we kwagh u a tser orgen la una tser u ve ma i lu u yô.” Dr. Rick Hanson, u a fe u sôron ior angev mbu ken ityou tsema tsema la kaa ér, “i mar se a mhôônom.”

NENGE: I gba se a mhôônom, man ka se uumace tseegh i gbe se a ieren ne ye. Akaa agen a i gbe la nga a ieren ne ga sha ci u nyi? Bibilo pase ér, Aôndo gba uumace sha ibeen na. (Genese 1:26) I gba se sha ibeen i Aôndo sha ci u se fatyô u eren kwagh sha inja i mlu na, nahan tesen aeren a na a dedoo la. Sha nahan yô, shighe u mhôônom ma mgbegha ior ve wase mbagenev yô, mba tesen mhôônom ma zungwen ma Orgbanakaa, Yehova Aôndo la.—Anzaakaa 14:31.

Aôndo ngu a mhôônom sha a vese shi ka una nenge sea yaan ican yô, i doo un ga. Sha kwagh u Mbaiserael mba sha ayange a tsuaa, mba ve washima a tom kpan u vihin tsung ken Igipiti shi ve ya ican anyom 40 ken taaikyôngo la yô, Bibilo kaa ér: “Sha ican ve i yan la cii, Un kpaa lu yan ican.” (Yesaia 63:9) Umbur wer Aôndo yange fa di a fa ican i ve lu yan la tsô ga. Ican ve la yange i nyoon Aôndo. “M fa atsan a ve la.” (Ekesodu 3:7) Aôndo kaa ér, “gadia u nan bende a ven yô, nan bende a hongorshe Na je.” (Sekaria 2:8) Shighe u mbagenev ka vea er se kwagh u vihin yô, Aôndo kpa ka i vihi un ken ishima a vese imôngo.

Bibilo na se vangertiôr ér aluer se nenge ser se gba kwagh ga, nahan se kuma u Aôndo una zungwe se mhôônom ga je kpa, “Aôndo hemba ishima yase man A fa akaa cii kpaa.” (1 Yohane 3:19, 20) Aôndo fa se je hemba er se fe ayol a ase la. A fa mbamlu asev man gbenda u se henen kwagh la, kua er ka i lu se ken ishima la kpaa. Ngu a mhôônom sha a vese.

Ruamabera na se vangertiôr ér

• “Wea yila, TER kpaa Una lumun; wea genger imo kpaa, Una kaa er: Mo ne.”—YESAIA 58:9.

• “Gadia M fa mbamhen mba M lu henen sha a ven ne, kape TER A kaa ne, ka mhen u bem, ka u bo ga, sha u nan ne ishimaverenkeghen i dedoo ken masetyô. Nahan né vaa a Mo, man né za, né za sônom man Mo kpaa Me ver ato her a ven.”—YEREMIA 29:11, 12.

• “Haa mliam am ken ishegh You; kera ka ken ruamabera Wou ma lu gaa?”—PASALMI 56:8.

Aluer se fa ser Aôndo ngu a mhôônom sha a vese yô, kwagh la una wase se u nôngon a mtavera? Nenge ase kwagh u er Maria ne:

“Yange wan wam u nomso u lu anyom 18 la, ya ican a angev mbu kyansa anyom ahar, maa kpe, kwagh ne nyoon mo tsung, nahan m nenge mer uma taver shi ngu a inja ga. Ishima yange i vihim a Yehova sha ci u a va bee un angev ga yum!

“Anyom ataratar nga kar yô, ijende yam igen ken tiônnongo i lun a dooshima man mhôônom kegh ato a mo er m lu pasen un er m nenge mer Yehova soom ga yô. Yange kegh ato a mo ahwa kpishi, a u nyôron mo sha zwa shio been kera yô, a ôrom avur a Bibilo a a kôrom ken ishima yô. Lu 1 Yohane 3:19, 20, ape i kaa ér: ‘Aôndo hemba ishima yase man A fa akaa cii kpaa’ la. Maa pase wener, Yehova fa ican yase.

“Er pase nahan kpa ishima pever mo shimi ga! Maa m ôr Pasalmi 94:19, ape i kaa ér: ‘Zum u mbamhen ve ngeem ken ishima yô, mbamsurshima Ou nam ishima i saan saan’ la. Nahan m nenge mer i nger avur la ka sha ci wam! Shighe kar yô, m fa mer Yehova ka a kav shi keghen ato a vese, nahan kera taver mo u pasen un ican yam ga.”

Ka sea fa ser Aôndo kav ican yase, nahan mhôônom kôr un a vese yô, i kundu se iyol. Kpa, hii nan ve ican i ngee yum nahana? Ka sha ci u Aôndo ngu tsahan se sha asorabo a ase? Aôndo una er kwagh sha u been a ican i yan cii keraa? Se time sha mbampin mban ken ngeren u a dondo ne.