Aluer ka Aôndo a ne ve se lu yan ican ga yô, ka nyi i ne ve ior kpishi ijen i ker ve tsung shi ican i lu zan hemen shi ityav mbi vihin tsung man angev mbu nan ior gban awan kua uaahe ve lu shin tar nee? Mkaanem ma Aôndo, Bibilo due a akaa a vesen atar a a ne ve uumace ve lu yan ican yô:

1. Msoo u Or Soon Iyol i Nan Tseegh la man Hua kua Ihyom. “Or ka nana lu a tahav sha orgen yô, nan eren nan ican.” (Orpasenkwagh 8:9) Ashighe kpishi ka i lu uumace mba lun vough ga man msoo u or soon iyol i nan tseegh la shin uumace mba wan tswam ka ve na ve, mbagenev ve nyôr ken ican i iyan ye.

2. Shighe man Aikyôr. Ashighe kpishi uumace ka ve nyôr ken ican i yan, sha ci u “shighe man aikyôr mba ve sha gbenda ve cii.” (Orpasenkwagh 9:11) Inja na yô, ior ka ve lu hen ijiir i vough ga man sha shighe u vough ga, ior ka ve er aikyôr shin ve ver ishima ga, gayô ve er kwagh a mshi sha mi ve aikyôr a er ye.

3. Tor u Bo Ngu Hemen. Bibilo pase kwagh u vesen u a ne ve uumace ve lu yan ican la wang. I kaa ér: “Tar cii ngu sha ikyev i Orbo.” (1 Yohane 5:19) “Orbo” la ka Satan Diabolo, or u ageegh u ken jijingi u sha hiihii la yô, lu ortyom u Aôndo, kpa va kera “tile sha mimi ga” yô. (Yohane 8:44) Mbatyomov mbagenev kpa mough kohol Satan ve hemba Aôndo ato sha ci u mbamtsera vev, maa ve hingir azôv. (Genese 6:1-5) Hii shighe u ve hembaato la je, Satan man azôv a na mba eren tahav man ifer shin tar ne tsung je. Hemban je yô, sha shighe wase ne. Hegen ne, ishima vihi Diabolo tsung, shi ngu “tsughun tar cii,” nahan ‘kwagh tser tar.’ (Mpase 12:9, 12) Sha mimi yô, Satan ngu tor u wan tswam. Ior ka vea yaan ican yô, i doo un tsung. Sha nahan yô, ka Satan a ne ve ior ve lu yan ican ye, ka Aôndo ga.

NENGE: Ka or u nan we ior ikyo ga shi nan lu a ishima i bo tseegh, nana na uumace mbaishôôv vea ya ican ye. Kpa Bibilo gema kaa ér: “Aôndo ka dooshima je.” (1 Yohane 4:8) Kwagh u Bibilo i ôr ne zua sha mlu u Aôndo vough, ér, “Aôndo Una er iferkwagh mayange ga, Uhembanagee kpaa Una er kpe ga.”—Yobu 34:10.

Nahan kpa, alaghga u pine ken ishima you wer, ‘Aôndo una de ér Satan a za hemen a hemen na u vihin tsung ne i kuma shighe nena?’ Er se vande nengen nahan, Aôndo kôr iferkwagh ihyom, shi ka sea yaan ican yô, i nyoon un tsung je. Kwagh ugen yô, Mkaanem ma Aôndo taver se ishima ér: “Gema nen ishima i nyian yen la cii, haa nen sha a Na, gadia ka Un A lu koson ne ye.” (1 Peteru 5:7) Se doo Aôndo ishima shi ngu a tahav mbu been a ican i yan man ijirôron i mimi ga cii kera, er ngeren u dondon ne una pase nahan. *