“M nôngo mer me ôr Bibilo, kpa i kehe gandem nahan ka m fatyô ga!”—Mkaanem ma Briana, ngu anyom 15.

 We kpa kape ka i lu u laa? Ngeren ne una wase u!

•  Er nan i doo u u ôr Bibilo?

•  Me ôr Bibilo nena?

•  Akaa a mbakwav wou ve ôr yô

 Ka wea hen sha kwagh u ôron Bibilo nahan iyol i kpe uwe? Aluer ka nahan kpa, se lan ga. Alaghga u nenge Bibilo wer ka takeda u lun a upeeji mbakiriki mba hemban dubu môm shi u lu a ufoto ga, shi u doo u er televishen shin uvidio nahan ga yô!

 Nahan kpa hen ase sha kwagh ne: Aluer u za asegh sha zege akwati u wan akaainjaa a mbayiase ker nahan, a sar u u fan kwagh u a lu ker gaa?

 Bibilo ngi er akwati u a lu a akaainjaa ker la nahan! Ngi a akaainjaa kpishi a aa fatyô u wasen we u

•   Tsuan akaa sha inja yô

•   Lun vea mbamaren ou doo doo yô

•   Zuan a azende a dedoo yô

•   Wan ishima shighe u ishima i lu zan we iyol sha akaa yô

 Kpa takeda u u tse kpishi ne nahan ua fatyô u wasen se nyian nena? Ka sha ci u “Ruamabera jimin cii ka Aôndo a ne i nger ye.” (2 Timoteu 3:16) Kwagh la tese ér kwaghwan u a lu ken Bibilo la due hen Or u a hembe fan kwagh sha won cii yô.

 Gbenda môm yô, ka u ôron Bibilo ken mhii zan zan mkur. Kwagh la una wase u u kaven loho u Bibilo jimin cii. Igbenda ngi kpishi i u fatyô u ôron Bibilo yô. Nenge ase igbenda ihiar ne:

•    U fatyô u ôron ityakeda i Bibilo i 66 la er i nger i sha adondo adondo la, hii ken Genese zan zan Mpase.

•    U fatyô u ôron Bibilo sha adondo adondo, er yange akaa er i nger ker Bibilo la.

 Kwagh u una fatyô u wasen we yô: Ngeren mba Takerada u Wasen We u Henen Mkaanem ma Aôndo mba ve lu a itinekwagh ér, “Akaa a Vesen a sha Kwagh u Uma u Yesu Shighe u Lu Shin Tar La,” tese akaa a vesen a yange er sha adondo adondo shighe u Yesu lu shin tar la.

 Gbenda u sha uhar u u fatyô u ôron Bibilo yô, ka u ôron ma kwagh u yange er i nger ken Bibilo u a zough sha zayol wou yô. Ikyav i tesen yô:

•   U soo wer ma u zough a azende a mimi? Ôr kwagh u Yonatan man Davidi. (1 Samuel, ityough 18-20) Maa hen sha aeren a dedoo a alaghga Davidi yange lu a mi ve Yonatan ya ijende a na yô.

•   U soo wer ma u zough a agee a u hendan a imeen yôô? Ôr kwagh u Yosev, nahan nenge er yange hendan a imeen yô. (Genese, ityough 39) Maa nenge ape Yosev yange zua a agee a hendan a imeen la.

•   U soo u fan er msen una fatyô u wasen we yôô? Ôr kwagh u Nehemia. (Nehemia, ityough 1 man 2) Ver ishima nenge er mbamsen mba Nehemia er la lu a tahav kpishi yô.

 Kwagh u una fatyô u wasen we yô: Shighe u u lu ôron Bibilo yô, nôngo tema hen ijiir i ayôôso a lu a danen we ga yô.

 Gbenda u sha utar u u fatyô u ôron Bibilo yô, bugh ijiir i u soo cii, gayô pasalmi, ôr her, maa hen sha gbenda u u dondo kwagh shon ken uma wou yô. U ôron u been yô, pine iyol you mbampin mban:

•    Er nan ve Yehova yange na i nger kwagh ne ken Bibilo?

•    Kwagh la tese u nyi sha kwagh u Yehova shin gbenda u a eren akaa laa?

•    Me dondo kwagh ne ken uma wam nena?

 Kwagh u una fatyô u wasen we yô: Er kwagh ne! Nger uwerayange u u soo wer u hii Bibilo you i ôron la shin inya.