Anumbe a eren aa fatyô u nan we msaanyol shin van we a zayol. Kpa ka iniumbe i u tsough, man gbenda u u eren iniumbe, kua shighe u ka u tôô u eren iniumbe la, u fatyô u zuan a msaanyol shin zayol ye.

•  Ka mbamtsera mba nyi ve lu ken anumbe?

•  Ka akaabo a nyi a lu ken anumbe?

•  Kwagh u mbakwav wou ve ôr yô

 Aluer u ngu eren anumbe yô, u lu gbong gbong. Bibilo lumun a kwagh ne, i kaa ér, ‘u karen iyol ér i taver la ngu a inja kpuaa.’ (1 Timoteu 4:8,) Gumor ugen iti na ér Ryan, a kaa ér “Ka wea eren anumbe u hemba lun tsevaa. Hemba kan a inja u eren anumbe, a u gbidyen gyeem i vidio ken iyou la ica je.”

 Ka wea eren anumbe u hemba fan u eren kwagh vea ior ken mzough, shi kôron iyol you tsaha. Bibilo tese ikyav igen sha kwagh u anumbegh, sha u wasen se u fan kwagh u injaa ugen. I̱ kaa ér: “Mbagban ayem ken iniumbe ka ve yevese cii, kpa ka môm tsô [ka] nan tôô iyua la ye.” Man shi i̱ kaa ér: “Hanma or u wan iyol sha iniumbe yô, ka nan kôr iyol i nan tsaha sha akaa cii.” (1 Mbakorinte 9:24, 25) Sha kpôô yô, ka i gba u or a kôr iyol i nan tsaha shi nana lu ken mzough vea mbagenev keng ve nana er ma iniumbe, er atindi a iniumbe shon a tese la ye. Gumkwase ugen iti na ér Abigail, un kpa a nenge nahan. A kaa ér, “Er m eren anumbe yô, kwagh la wasem m fa u eren kwagh vea ior ken ijouave shi lamen a ve kpaa.”

 Ka wea eren anumbe u seer zuan a azende. Iniumbe ka i zua ior kposo kposo ve hingir kangenaa. Gumor ugen iti na ér Jordan, a kaa ér, “Hanma iniumbe cii ka i nôngon u eren i inja er ka gesa u gban nahan, kpa aluer u ngu eren ma iniumbe di tsô wer i saan we iyol yô, u kav er anumbe a eren i lu gbenda u vesen u zuan a azende yô.”

 Iniumbe i u eren la. Bibilo kaa ér: “[Yehova] ngu karen orperapera kua iferor kpaa; or u ipila i doo nan la yô, A kôr nan ihyom.”—Pasalmi 11:5.

 Anumbe agen ka i lu a ipilagh shin tswam kpôô kpôô. U tesen ikyav yô, gumkwase ugen iti na ér Lauren, a kaa ér: “Kwagh u vesen ken iniumbe i keren iju yô, ka u gbidyen orgen la. Er se lu Mbakristu yô, se mba palegh num, nahan ityôkyaa i se de ser mbagenev ve gbidye iyol se nenge i saan se iyol jim yô ka nyi?”

 Kwagh u henen sha mi: U de ishima you kighir we u ngu eren shin nengen anumbe a pilagh, henen wer aa na u er ipila cuku tsô kpaa gaa? Aluer ka nahan yô, umbur wer Pasalmi 11:5 kaa ér, Yehova kôr or u ‘ipila i doo nan’ la ihyom, ka or u nan eren ipila la tseegh ga.

 Gbenda u u eren anumbe la. Bibilo kaa ér: “De eren nen kwagh sha u wan ayol a en ikyo tseegh shin sha u keren icivir i gbilinigh kpaa ga, kpa hide nen [a] ayol a en ijime; hanma or nana̱ nengen ér orgen hemba nan.”—Mbafilipi 2:3.

 Ka mimi, hanma iniumbe i kweior môm u lu eren vea kweior ugen yô, gesa ka a wa lun ker. Kpa aluer u ngu eren iniumbe la wer saa u hemba keng keng yô, a kera saan we iyol ga. Gumor ugen iti na ér Brian, a kaa ér, “Ieren i gban gesa la ia fatyô u yan tor ken a we fele. Nahan, er u lu seer fan iniumbe la, a gba u u nôngo u seer hiden a iyol ijime tsung.

 Kwagh u henen sha mi: Gumor ugen iti na ér Chris, a kaa ér, “Se mba gbidyen bol hanma kasua, shi ior ka ve nôngo u vihin iyol kpaa.” Nahan pine ase iyol you wer, ‘Ka akaa a nyi nahan a na or a fatyô u vihin iyol ken bolo? Me eren anumbe nan ve me vihi iyol ga?’

 Shighe u ka u tôô u eren anumbe la. Bibilo kaa ér: “Fa akaa a a hembe lun a inja yô.”—Mbafilipi 1:10.

 Tsua akaa a a hembe lun we a inja yô. Akaa a ken jijingi a lu u kwagh u hiihii. Anumbe kpishi ka a tôô ahwa imôngo, ka wea eren a, shin wea nengen a nenge a tseegh kpaa. Gumkwase ugen iti na ér Daria, a kaa ér, “Ngôm yange a er ayôôso a mo sha kwagh u shighe u yange m tôô u nengen anumbe sha televishen la, er ka shighe u mo ma m er akaa a a hembe lun a inja yô.”

 Kwagh u henen sha mi: Mbamaren ou ka vea waan we kwagh sha akaa a a hembe doon we la nahan, u kegh atô kpa? Gumkwase ugen iti na ér Trina, a kaa ér: “Mo man anmgbianev av yange se de u eren akaa a hange hange, se yem nengen anumbe, nahan ngô wase a umbur se ér ‘ka u a kimbi mbaanumbegh mbara inyaregh, sea nenge iniumbe ve shin sea nenge ga kpaa. Shi a pine ér: ‘Kpa ne yô, ka an nan kimbin ne?’ Yange a soo u kaan ér: Kwagh u mbaanumbegh mbara ve eren la ka tom u ve zuan a inyaregh sha mi yô. Kpa se, aluer se mba wan ikyo sha ityom i hen ya kua ityom yase igen ga yô, kper ken hemen se fatyô u nengen sha ayol a ase ga. Jighilii yô, mama yange a kaan a vese ér anumbe a nengen, shin anumbe a eren a de lu kwagh u hiihii ken uma wase ga.”