ረቛሒ 3

 መማሰዊ ኹን

መጽሓፍ ቅዱስ እንታይ ይምህር፧ “ብዅሉ ኣመስግኑ።”—1 ተሰሎንቄ 5:18።

በዳሂ ዚገብሮ እንታይ እዩ፧ ብዕቡያትን ብዘየማስዉን ሰባት ኢና ተኸቢብና ዘለና፣ እዚ ባህርያት እዚ እውን ኪለግበና ይኽእል እዩ። (2 ጢሞቴዎስ 3:1, 2) ብዘይካዚ እውን፡ ኣብቲ ዕረፍቲ ዘይብሉ ህይወትና፡ ዝያዳ ንጥፈታት ክንውስኽ ከም ዘሎና ይስምዓና ይኸውን። ጸገማት ስለ ዚኸብደና ወይ ኣብ ጥቕሚ ርእስና ስለ ዘተኰርና፡ ንዘሎና ወይ ንዚግበረልና ነገራት ንምምሳው ግዜ ኣይህልወናን ይኸውን።

እንታይ ክትገብር ትኽእል፧ ነቲ ዘሎካ ጽቡቕ ነገራት ኣስተንትነሉ። ሓቂ እዩ፡ ጸገማት ኪኸብደካ ይኽእል እዩ። እንተዀነ ግን፡ ንጉስ ዳዊት ዝሓደጎ ኣብነት እሞ ርአ። ፈተናታት ምስ ኣጋጠሞ፡ እተደቝሰን ልቡ ዝሰምበደን ኰይኑ ተሰሚዕዎ ነይሩ እዩ። ኰይኑ ግን፡ “ኵሉ ተግባርካ ኤስተንትን፡ ግብሪ ኣእዳውካ እሐስብ አሎኹ” ኢሉ ናብ ኣምላኽ ጸለየ። (መዝሙር 143:3-5) ፈተናታት እኳ እንተ ኣጋጠሞ፡ መማሰውን ዕጉብን እዩ ነይሩ።

ብዛዕባ እቲ ሰባት ዝገበሩልካ ነገራት ሕሰብ፣ ንጻዕርታቶም ድማ ኣማስወሉ። ኣብዚ መዳይ እዚ፡ የሱስ ጕሉሕ ኣብነት ሓዲጉ እዩ። ንኣብነት፡ ሓንቲ ማርያም እትበሃል ሰበይቲ፡ ክቡር ዝዋግኡ ቕብኢ ኣብ ርእሱን ኣብ እግሩን ምስ ኣፍሰሰትሉ፡ ገሊኦም ሰባት፡ “ንምንታይ እዚ ጥፍኣት ቅዱይ ቅብኢ ዀነ፧” ኢሎም ነቐፉ። a እቶም ነቐፍቲ፡ እቲ ቕብኢ ተሸይጡ፡ ንድኻታት እንተ ዚወሃብ ከም ዚሓይሽ ተሰሚዕዎም ነበረ። የሱስ ግን፡ “ስለምንታይ ተጕህይዋ አሎኹም፧ ሕደግዋ” ኢሉ መለሰሎም። ኣስዕብ ኣቢሉ እውን፡ “ዚከአላ ገበረት” በሎም። (ማርቆስ 14:3-8፣ ዮሃንስ 12:3) የሱስ ኣብቲ ማርያም ዘይገበረቶ ኣብ ክንዲ ዘተኵር፡ ነቲ ዝገበረቶ ኣማሰወሉ።

ገሊኦም ሰባት ንስድራ ቤቶም ወይ ንፈተውቶም ምስ ሰኣንዎም እዮም ዜማስዉሎም። ብዛዕባ እቲ ሕጂ ረኺብካዮ ዘለኻ ነገራት ብምስትንታን፡ ካብ ከምዚ ዝኣመሰለ ጌጋ ኸተምልጥ ትኽእል ኢኻ። እሞኸ እተመስግነሉ ነገራት ስለምንታይ ዘይትጽብጽብ፧

“ጽቡቕ ውህበት” ካብ ኣምላኽ ስለ ዝዀነ፡ ንዕኡ ብጸሎት ከነመስግኖ ኣሎና። (ያእቆብ 1:17) ኣዘውቲርና ኸምኡ ንገብር እንተ ዄንና፡ መማሰውትን ዕጉባትን ክንከውን ንኽእል ኢና።—ፊልጲ 4:6, 7።

[እግረ-ጽሑፍ]

[ኣብ ገጽ 6 ዘሎ ስእሊ]

ነቲ እተገብረልካ ተማስወሉ ዲኻ፧