Bainhira hakarak koñese ema ida, pergunta primeiru neʼebé Ita husu mak “Ó-nia naran saida?” Se Ita husu pergunta neʼe ba Maromak, nia sei hatán saida?

“Haʼu mak Jeová. Neʼe mak haʼu-nia naran.”​—Isaias 42:8.

Naran neʼe importante ba Maromak. La iha ema ida mak fó naran ba Maromak. Nia hili rasik ninia naran. Jeová hatete: “Neʼe mak haʼu-nia naran ba nafatin. Liuhusi naran neʼe mak ema sei hanoin-hetan haʼu husi jerasaun ba jerasaun.” (Éxodo 3:15) Iha Bíblia, Maromak nia naran mosu dala barak liu fali ninia títulu sira hanesan Maromak neʼebé Kbiit Boot Liu Hotu, Aman, Naʼi ka Maromak, no mosu dala barak liu fali naran sira seluk hanesan Abraão, Moisés, David, ka Jesus. No Jeová hakarak ema hotu hatene kona-ba ninia naran. Bíblia hatete: “Halo ema hotu hatene katak Ita neʼebé naran Jeová, Ita mesak deʼit mak Maromak neʼebé Aas Liu Hotu iha mundu tomak.”​—Salmo 83:18.

Naran neʼe importante ba Jesus. Iha orasaun Ami Aman, Jesus hanorin ninia dixípulu sira atu harohan ba Maromak: “Halo Ita-nia naran sai santu.” (Mateus 6:9) Jesus rasik halo orasaun ba Maromak: “Aman, fó glória ba Ita-nia naran.” (João 12:28) Ba Jesus, fó glória ba Maromak nia naran mak importante liu, tan neʼe mak nia hatete iha orasaun: “Haʼu fó sai tiha ona Ita-nia naran ba sira no sei kontinua fó sai naran neʼe.”​—João 17:26.

Naran neʼe importante ba Maromak nia povu. Maromak nia povu iha tempu uluk komprende katak sira-nia protesaun no salvasaun liga metin ho Maromak nia naran neʼebé úniku. “Jeová nia naran mak hanesan uma aas neʼebé seguru. Ema laran-loos halai bá neʼebá no hetan protesaun.” (Provérbios 18:10) “Ema hotu neʼebé bolu Jeová  nia naran sei hetan salvasaun.” (Joel 2:32) Bíblia hatudu katak Maromak nia naran sei halo diferensa entre ema neʼebé serbí nia no la serbí nia. “Simeão konta ona buat hotu kona-ba oinsá ba dala primeiru Maromak tau atensaun ba nasaun seluk, hodi hili povu ida husi sira-nia leet atu lori ninia naran.”​—Apóstolu 15:14; Miqueias 4:5.

Naran neʼe hatudu sai Maromak nia identidade. Matenek-naʼin barak konkorda katak naran Jeová signifika “Nia mak halo”. Maromak Jeová esplika signifikadu husi ninia naran bainhira nia koʼalia ho Moisés: “Haʼu Sei Sai Buat Neʼebé Haʼu Hakarak.” (Éxodo 3:14) Ninia naran hatudu sai buat hotu neʼebé nia halo nuʼudar kriadór. Laʼós neʼe deʼit, ninia naran mós hatudu sai ninia kbiit atu halo ninia an no mós ninia kriasaun sai buat naran deʼit atu kumpre ninia hakarak. Ninia títulu sira hatudu sai ninia pozisaun, autoridade ka forsa, maibé só ninia naran Jeová, mak reprezenta ninia identidade, no hatudu sai buat hotu kona-ba nia no buat neʼebé nia bele halo.

Naran neʼe hatudu katak nia hanoin ita. Signifikadu husi ninia naran hatudu ho klaru katak nia laran-metin ba ninia kriasaun, inklui ita ema. Tuir loloos, hodi fó sai ninia naran ba Ita, hatudu katak nia hakarak Ita atu koñese nia. Nia fó sai uluk ninia naran antes ita rasik iha hanoin atu husu kona-ba neʼe. Klaru katak Maromak lakohi ita atu hanoin katak nia mak espíritu neʼebé dook tebes husi ema no ita labele iha relasaun diʼak ho nia, maibé nia hakarak ita atu haree nia nuʼudar Maromak neʼebé iha duni no ita bele hakbesik ba nia.​—Salmo 73:28.

Hodi uza Maromak nia naran, hatudu katak ita interese ba nia. Hanoin toʼok ai-knanoik neʼe, karik iha ema ida neʼebé Ita hakarak habelun, no Ita husu nia atu bolu Ita ho Ita-nia naran rasik. Maibé, oinsá se ema neʼe lakohi halo hanesan neʼe? Karik Ita sei hanoin katak loloos ema neʼe lakohi atu sai besik ho Ita. Nuneʼe mós ho Maromak. Jeová fó-hatene ninia naran ba ema, no nia anima ita atu uza naran neʼe. Kuandu ita uza ninia naran, ita hatudu ba Jeová katak ita hakarak atu hakbesik ba nia. Nia rasik mós haree bainhira ema “hanoin kleʼan kona-ba [ka “hafolin”, nota-rodapé] ninia naran”.​—Malaquias 3:16.

Aprende kona-ba Maromak nia naran mak hakat importante primeiru atu koñese didiʼak nia. Maibé ida-neʼe deʼit la toʼo. Ita presiza kontinua buka-hatene ninia hahalok sira. Ita presiza aprende Maromak nia hahalok mak hanesan saida.