Salmo 73:1-28
Asaf+ nia knananuk.
73 Maromak diʼak tebes ba Izraél, ba sira neʼebé laran-moos.+
2 Kona-ba haʼu, haʼu-nia ain besik atu laʼo sala dalan;Haʼu-nia hakat sira besik atu sidi.+
3 Tanba haʼu sai laran-moras ba ema neʼebé foti an*Bainhira haʼu haree ema aat moris ho dame.+
4 Tanba sira la sente terus bainhira sira mate;Sira isin-diʼak nafatin.*+
5 Sira la hasoru problema hanesan ema seluk,+Sira la hetan susar hanesan ema seluk.+
6 Tan neʼe, hahalok loko an sai hanesan korrente neʼebé hafurak sira-nia kakorok;+Violénsia taka sira hanesan unuk.
7 Sira-nia moris diʼak halo sira-nia matan boot;Sira hetan susesu liu fali buat neʼebé sira hanoin iha laran.
8 Sira goza ema no koʼalia buat aat.+
Ho foti an sira ameasa atu hanehan ema seluk.+
9 Sira gaba an tanba hanoin katak sira aas hanesan lalehan,No sira laʼo bá-mai iha mundu tomak, no sira-nia nanál habelar liafuan hotu neʼebé sira gosta.
10 Entaun Maromak nia povu bá tuir sira,No hemu sira-nia bee neʼebé barak.
11 Sira dehan: “Oinsá mak Maromak hatene?+
Maromak neʼebé Aas Liu Hotu iha duni koñesimentu ka lae?”
12 Sin, sira mak ema aat neʼebé sempre moris diʼak.+
Sira kontinua aumenta sira-nia rikusoin.+
13 Haʼu hatudu laran-moos nafatinNo haʼu fase liman hodi hatudu katak haʼu la iha sala,+ maibé loloos neʼe saugati deʼit.
14 No haʼu hetan susar loron tomak;+Dadeer-dadeer nia korrije haʼu.+
15 Maibé se karik haʼu koʼalia sai buat sira-neʼe,Haʼu sai ona traidór ba Ita-nia povu.*
16 Bainhira haʼu koko atu komprende ida-neʼe,Neʼe halo haʼu neon-susar tebes
17 Toʼo haʼu tama ba Maromak nia fatin sagradu neʼebé kmanek,Mak haʼu foin komprende sira-nia futuru.
18 Loloos Ita tau duni sira iha rai neʼebé namdoras.+
Ita halo sira monu no rahun.+
19 Derrepente deʼit sira lakon tiha!+
Sira-nia rohan toʼo mai ho terus neʼebé mosu derrepente deʼit!
20 Hanesan ema ida hadeer no haluha ninia mehi, oh Jeová,Kuandu Ita hamriik, Ita sei halakon* sira-nia ilas.
21 Maibé uluk haʼu sente laran-triste loos,+No iha haʼu-nia fuan-laran* haʼu sente moras tebes.
22 Haʼu la iha neon no la iha kbiit atu komprende;Iha Ita-nia oin, haʼu hanesan animál neʼebé la iha neon.
23 Maibé agora haʼu kontinua hamutuk ho Ita;Ita kaer metin haʼu-nia liman-loos.+
24 Ita dirije haʼu ho Ita-nia konsellu,+No depois neʼe, Ita sei lori haʼu ba glória.+
25 Sé tan mak apoia haʼu husi lalehan?
No haʼu lakohi buat seluk tan iha rai, só Ita deʼit.+
26 Haʼu-nia isin no haʼu-nia laran bele sai fraku,Maibé Maromak hametin haʼu-nia laran; nia mak haʼu-nia fatuk boot no haʼu-nia parte ba nafatin.+
27 Tuir loloos, ema neʼebé hadook an husi Ita sei lakon.
Ita sei halakon* ema hotu neʼebé la hatudu laran-metin hodi* husik hela Ita.+
28 Maibé kona-ba haʼu, atu hakbesik ba Maromak mak diʼak mai haʼu.+
Haʼu halo ona Jeová, Naʼi Ukun-Naʼin Boot Liu, nuʼudar haʼu-nia fatin protesaun,Atu fó sai Ita-nia hahalok sira hotu.+
Nota-rodapé
^ Ka “gaba an”.
^ Ka “Sira kabun-teek”.
^ Orj., “Ita-nia oan-mane sira-nia jerasaun”.
^ Orj., “hakribi”.
^ Orj., “rins”.
^ Orj., “halo nonook”.
^ Ka “neʼebé la iha morál no”.