JULAI 10, 2023
URUSI

Dada Watatu Wahukumiwa Jijini Komsomolsk-on-Amur

CHEZA

Machi 23, 2023, Mahakama ya Wilaya ya Centralniy iliyo Komsomolsk-on-Amur iliwahukumu Dada Tatyana Bondarenko, Dada Yelena Nesterova, na Dada Tatyana Svoboda kifungo cha nje cha miaka mitano kila mmoja. Hawahitaji kwenda gerezani wakati huu.

Maelezo Mafupi Kuwahusu

Tatyana Bondarenko

Alizaliwa: 1960 (Komsomolsk-on-Amur, Eneo la Khabarovsk)

Maisha Yake: Alifanya kazi ya kuendesha mtambo wa kusaga nafaka na baadaye alifanya kazi za kusafisha nyumba za watu

Alifunga ndoa na Vladimir mwaka wa 1992. Wana watoto watatu

Alianza kujifunza Biblia baada ya kuelezwa kuhusu kusudi la Mungu kwa ajili ya wanadamu na ahadi yake ya kuleta dunia paradiso. Alibatizwa mwaka wa 2005

Maelezo ya Kibinafsi

Yehova amekusaidiaje katika kipindi hiki kigumu?

Mume wangu si Shahidi wa Yehova na alikuwa hospitalini nyumba yetu ilipofanyiwa msako. Alijaribu kunipigia baadaye siku hiyo ili kuniambia kwamba madaktari walikuwa wamemruhusu kuja nyumbani lakini hakunipata kwa sababu maofisa wa polisi walikuwa wamechukua simu yangu. Msako ulidumu kwa muda mrefu kwa hiyo ilikuwa jioni nilipopata simu mpya na kumpigia ili kumjulisha mambo yaliyotokea. Hali hiyo ilitupatia wasiwasi mwingi. Lakini nilikumbuka kumwomba Yehova utulivu naye alijibu sala yangu. Mimi na mume wangu tulipofika nyumbani usiku huo, alikuwa mwenye fadhili sana na hata alinisaidia kupanga nyumba yetu ambayo ilikuwa imevurugwa wakati wa msako. Hilo lilinisaidia kumtegemea zaidi Yehova.

Yelena Nesterova

Alizaliwa: 1967 (Komsomolsk-on-Amur)

Maisha Yake: Alifanya kazi ya uhasibu

Alikuwa na mabinti wawili lakini mmoja wao alikufa mwaka wa 1998

Aliwafahamu Mashahidi wa Yehova kwa mara ya kwanza alipopata huduma kutoka kwa wakili ambaye ni Shahidi. Alivutiwa na unyoofu wao na jinsi walivyotumia Biblia kujibu maswali yake. Alibatizwa mwaka wa 1997

Maelezo ya Kibinafsi

Umejifunza nini kupitia hali hii ngumu?

Nimekuja kujionea kwamba ni muhimu sana kuwa watiifu kama tu tunavyohimizwa. Muda mfupi tu baada ya kufunguliwa mashtaka ya uhalifu, ndugu mmoja alipendekeza nianze kuandika maelezo ya mwisho nitakayowasilisha mbele ya mahakama. Kwa kuwa nilijua maelezo ya mwisho yangetolewa baada ya kesi kusikilizwa, nilijiambia, ‘Ni mapema sana.’ Hata hivyo, nilisali kuhusu jambo hilo kisha nikaamua kuandika mambo niliyotaka kusema. Kipindi hicho cha kesi kilipita haraka hivi kwamba nisingekuwa nimejiandaa mapema nisingeweza kutoa ushahidi mzuri mahakamani. Kwa hiyo, kutii hata ingawa sikuwa nimeelewa kikamili sababu zilizohusika kulikuwa na matokeo mazuri sana.

Tunasali kwamba Yehova aendelee kuwabariki na kuwaimarisha dada zetu wanapodumisha uaminifu chini ya majaribu.—Ruthu 2:12.

Mfuatano wa Matukio

Septemba 21, 2021

Kesi ya uhalifu yafunguliwa dhidi ya Tatyana Svoboda
Oktoba 18, 2021

Maofisa wa polisi waanza pia kuwapeleleza Tatyana Bondarenko na Yelena Nesterova
Oktoba 20, 2021

Nyumba zao zafanyiwa msako
Agosti 28, 2022

Mashtaka yafunguliwa
Desemba 28, 2022

Kesi ya uhalifu yaanza
Machi 23, 2023

Walihukumiwa kifungo cha nje cha miaka mitano kila mmoja

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI