Kolobetso ke Eng?
Karabo ea Bibele
Kolobetso ke ha motho a qoelisoa ka metsing ’me ka mor’a moo a ntšoa. * Sena se hlalosa lebaka leo ka lona Jesu a ileng a kolobetsoa nokeng. (Matheu 3:13, 16) Ka tsela e tšoanang, leqhalaha la Moethiopia le ile la kopa ho kolobetsoa ha ba fihla “moo ho nang le metsi.”—Liketso 8:36-40.
Kolobetso e bolela’ng?
Bibele e bapisa kolobetso le lepato. (Baroma 6:4; Bakolose 2:12) Kolobetso ea metsing e tšoantšetsa hore motho o shoele bophelong ba hae ba nakong e fetileng ’me o qala bophelo bo bocha e le Mokreste ea inehetseng ho Molimo. Kolobetso le mehato eo motho a e nkang hore a qetelle a kolobelitsoe, ke tokisetso eo Molimo a e entseng hore a be le letsoalo le hloekileng le tumelo sehlabelong sa Jesu Kreste. (1 Petrose 3:21) Kahoo, Jesu o ile a ruta barutuoa ba hae hore ba lokela ho kolobetsoa.—Matheu 28:19, 20.
Na metsi a kolobetso a hlatsoa libe?
Che. Bibele e re ke mali a Jesu fela a ka hlatsoang libe. (Baroma 5:8, 9; 1 Johanne 1:7) E le hore motho a fumane molemo sehlabelong sa Jesu, o lokela ho bontša tumelo ho eena, a fetole tsela eo a phelang ka eona ’me a phele ho latela lithuto tsa Jesu, a be a kolobetsoe.—Liketso 2:38; 3:19.
Tlhatsuo ke eng?
Lentsoe “tlhatsuo” ha le eo ka Bibeleng. Tlhatsuo ke tšebeletso eo likereke li e etsang ea ho kolobetsa masea (ka ho ba fafatsa kapa ho ba tšela ka metsi hloohong) le ho ba reha mabitso.
Na Bibele e ruta hore masea a kolobetsoe?
Che, ha ho joalo. Ho kolobetsoa batho ba holileng ka ho lekaneng ho utloisisa le ho lumela “litaba tse molemo tsa ’Muso oa Molimo.” (Liketso 8:12) E amana le ho utloa Lentsoe la Molimo, ho le amohela le ho bakela liphoso, e leng ntho eo lesea le ke keng la e etsa.—Liketso 2:22, 38, 41.
Ho ekelletsa moo, Bibele e bontša hore Molimo o nka bana banyenyane ba Bakreste, ba hloekile ka pel’a mahlo a hae ka lebaka la botšepehi ba batsoali ba bona. (1 Bakorinthe 7:14) Haeba kolobetso ea masea e ne e nepahetse, bana bao ba ne ba ke ke ba hloka motho ea neng a ka ba emela. *
Maikutlo a fosahetseng ka kolobetso ea Bakreste
Seo e seng ’nete: Ho fafatsa kapa ho tšela motho ka metsi ho nkela ho qoelisa motho ka metsing sebaka.
’Nete: Hohle moo ho buuoang ka kolobetso ka Bibeleng e ee be e le ha motho a qoelisoa ka metsing. Ka mohlala, ha morutuoa Filipi a kolobetsa monna oa Moethiopia, ka bobeli ba ile ba “theohela ka metsing.” Ka mor’a moo, ba “nyolohetse ka ntle ho metsi.”—Liketso 8:36-39. *
Seo e seng ’nete: Bibele e fana ka maikutlo a hore masea a ile a kolobetsoa ha malapa a fapaneng a ne a kolobetsoa. Ka mohlala, e re ka molebeli oa teronko: “Kaofela, eena le ba ntlo ea hae ba kolobetsoa.”—Liketso 16:31-34.
’Nete: Tlaleho e buang ka molebeli oa teronko e bontša hore bohle ba ileng ba kolobetsoa ba ne ba utloisisa “lentsoe la Jehova” le hore ba ile ba “thaba haholo.” (Liketso 16:32, 34) Sena se etsa hore re fihlele qeto ea hore masea a neng a le ka tlung ea molebeli oa teronko a ne a ke ke a kolobetsoa hobane a ne a ke ke a utloisisa Lentsoe la Molimo.
Seo e seng ’nete: Jesu o ile a ruta ka kolobetso ea masea ha a ne a re ’Muso oa Molimo ke oa bana.—Matheu 19:13-15; Mareka 10:13-16.
’Nete: Jesu o ne a sa bue ka kolobetso ha a ne a bua mantsoe ao. Ho e-na le hoo, o ne a bontša hore bohle ba tla tšoaneleha ho kena ’Musong oa Molimo ba lokela ho ba joalo ka bana, ba ikokobetse le ho mamela.—Matheu 18:4; Luka 18:16, 17.
^ ser. 1 Lentsoe la Segerike le fetoletsoeng e le “kolobetso” le hlaha lentsoe le bolelang ho “qoelisoa.” Sheba Theological Dictionary of the New Testament, Volume I, leqephe 529.
^ ser. 6 Ho ea ka The International Standard Bible Encyclopedia, “ha ho na moo Testamenteng e Ncha ho buuoang ka kolobetso ea masea.” E boetse e bontša hore tloaelo ena e tsoa “tabeng e fetelelitsoeng ha ho ne ho hatisoa bohlokoa ba kolobetso,” e leng hore kolobetso ka boeona e hlatsoa libe.—Volume 1, leqephe 416-417.
^ ser. 8 Tlas’a sehlooho sa “Kolobetso (ka hare ho Bibele),” New Catholic Encyclopedia e re: “Ho hlakile hore kolobetso ea mehleng ea pele e ne e etsoa ka hore motho a qoelisoe.”—Volume 2, leqephe la 59.
Mohlomong u ka Rata le
LIPOTSO TSA BIBELE LIA ARAJOA
Na Malumeli ’Ohle aa Tšoana? Na Kaofela ke Litsela Tse Lebang ho Molimo?
Bibele e fana ka lintlha tse peli e le karabo.
ESSENTIAL BIBLE TEACHINGS
Na Molimo o Amohela Malumeli ’Ohle?
Batho ba bangata ba lumela hore ha ho tsotellehe hore na motho o khetha bolumeli bofe.
BACHA BAA BOTSA
Na ke Lokela ho Kolobetsoa?—Karolo ea 1: Ho Kolobetsoa ho Bolela’ng?
Haeba u nahana ka ho kolobetsoa, u lokela ho utloisisa pele hore na ho bolela’ng.