Ka la 24 February 2022 masole a Russia a ile a hlasela naha ya Ukraine e leng se ileng sa baka mathata a entseng hore batho ba bangata ba be kotsing mme ba leke ho baleha naheng eo kapele. a

 “Dibomo di ne di phatloha. Ho ne ho tshosa hoo re sa kgoneng le ho hlalosa. Re ile ra utlwa hore ho na le diterene tse balehisang batho, ka hoo re ile ra etsa qeto ya hore re tsamaye. Re ile ra siya ntho e nngwe le e nngwe hobane motho ka mong o ne a lokela ho nka mokotla o monyenyane. Re ile ra nka ditokomane, meriana, metsi le dijo tse bobebe. Re ile ra siya dintho tse ding tsohle ra ya seteisheneng sa terene ha dibomo di ntse di phatloha.”​—Nataliia ya dulang Kharkiv, Ukraine.

 “Re ne re nahana hore ho ke ke ha eba le ntwa ho fihlela e eba teng. Ke ile ka utlwa dibomo di phatloha karolong e nngwe ya motse mme difensetere di sisinyeha. Ke ile ka etsa qeto ya hore ke tsamaye mme ka nka feela dintho tseo ke neng ke di hloka. Ke ile ka tloha lapeng ka hora ya borobedi hoseng mme ka palama terene e yang Lviv yaba ke palama bese e yang Poland.”​—Nadija ya dulang Kharkiv, Ukraine.

Sehloohong sena

•  Ke eng e bakileng bothata boo?

•  Ke eng e ka thusang baphaphathehi hore ba be le tshepo?

•  Na Bibele e ka thusa baphaphathehi mehleng ee?

 Ke eng e bakileng bothata boo?

 Bothata ba baphaphathehi ba Ukraine bo qadile ha masole a Russia a hlasela naha eo. Le ha ho le jwalo, Bibele e bontsha mabaka a mang a bohlokwa a entseng hore ho be le bothata bona:

•   Mebuso lefatsheng lohle e hlolehile ho fa batho dintho tseo ba di hlokang. Hangata mebuso e sebedisa matla a yona ho hatella batho.​—Moeklesia 4:1; 8:9.

•   Satane Diabolose e leng “mmusi wa lefatshe” lena o susumetsa batho hore ba etse dintho tse kgopo hoo Bibeleng e reng “lefatshe lohle le rapaletse matleng a ya kgopo.”​—Johanne 14:30; 1 Johanne 5:19.

•   Ntle le mathata a mangata ao batho ba bileng le ona ka dilemo tse ngata, hona jwale re phela nakong eo Bibele e reng ka yona: “Matsatsing a ho qetela ho tla ba le dinako tse mahlonoko.” (2 Timothea 3:1) Bibele e boetse e re matsatsi ao a ne a tla bonahala ka dintwa, dikoduwa tsa tlhaho, kgaello ya dijo le mafu a sewa e leng dintho tse ka etsang hore batho ba balehe malapeng a bona.​—Luka 21:10, 11.

 Ke eng e ka thusang baphaphathehi hore ba be le tshepo?

 Bibele e bontsha hore Mmopi wa rona e leng Jehova b Modimo o rata le ho qenehela baphaphathehi le batho ba ileng ba tlameha ho tloha malapeng a bona. (Deuteronoma 10:18) O tshepisa hore o tla fedisa mathata a baphaphathehi ka mmuso wa hae o lehodimong o bitswang Mmuso wa Modimo, o tla nkela mebuso ya batho sebaka. (Daniele 2:44; Matheu 6:10) Jehova o tla sebedisa Mmuso wa hae ho fedisa Satane Diabolose. (Baroma 16:20) Mmuso oo o tla busa lefatshe lohle mme o fedise dikarohano tse bakilweng ke meedi ya dinaha. Batho bohle e tla ba lelapa le le leng. Ha ho sa tla ba le motho ya tla lokela hore a tlohe lelapeng la hae hobane Bibele e tshepisa hore motho “e mong le e mong o tla dula tlasa sefate sa hae sa morara le tlasa sefate sa hae sa feiga, ho ke ke ha eba le ya etsang hore ba thothomele; ka ha molomo wa Jehova wa mabotho o boletse.”​—Mikea 4:4.

 Ke Mmuso wa Modimo feela o ka rarollang bothata ba hore ho be le baphaphathehi. Jehova o tla sebedisa Mmuso wa hae ho fedisa mathata a qobellang batho hore e be baphaphathehi. Nahana ka mehlala ena:

•   Dintwa. “[Jehova] o fedisa dintwa.” (Pesaleme ya 46:9) Bala sehlooho se reng “Khotso e Tla Tla Joang Lefatšeng?” e le hore o bone hore na Modimo o tla fedisa dintwa jwang.

•   Pefo le ho hatellwa. “[Jehova] o tla lopolla meya ya bona kgatellong le pefong.” (Pesaleme ya 72:14) Bala sehlooho se reng “Re ka Kgona ho Hlola Lehloyo” e le hore o bone hore na batho ba ka fetola tsela e fosahetseng eo ba neng ba ikutlwa ka yona ka nako e telele jwang.

•   Tshotleho. “[Jehova] o tla lopolla ya futsanehileng ya hweletsang ho kopa thuso.” (Pesaleme ya 72:12) Bala sehlooho se reng “Na Maemo a Moruo a Kgotsofatsang Batho Bohle a Tla ke a be Teng?” ho bona ka moo Modimo a tla fedisa dintho tse etsang hore batho ba sotlehe.

•   Kgaello ya dijo. “Ho tla ba le dijothollo tse ngata lefatsheng.” (Pesaleme ya 72:16) Bala sehlooho se reng “Lefatshe le se Nang Tlala?” ho bona hore na Modimo o tla etsa bonnete ba hore ha ho na motho ya tla hloka dijo jwang.

 Na Bibele e ka thusa baphaphathehi mehleng ee?

 Ho jwalo. Bibele e ka thusa baphaphathehi ka mathata ao ba nang le ona hona jwale le ho ba fa tshepo ka bokamoso.

 Molaomotheo wa Bibele: “Le se ke la tshwenyeha ka letho, empa nthong e nngwe le e nngwe ka thapelo le thapedi ha mmoho le diteboho dikopo tsa lona tse matla di ke di tsebiswe Modimo; mme kgotso ya Modimo e fetang monahano wohle e tla lebela dipelo tsa lona le matla a lona a kelello.”​—Bafilipi 4:6, 7.

 Tlhaloso: Kopa Modimo a o fe kgotso ya kelello boemong bofe kapa bofe bo ka o hlahelang. Sheba sehlooho se reng “Bafilipi 4:6, 7​—‘Le se ke la Tshwenyeha ka Letho.’”