Di gannet ke dinonyana tse kgolo tsa lewatle tse itahlelang ka lewatleng ka lebelo le ka etsang dikhilomithara tse 190 ka hora. Ha gannet e kena ka metsing, e ka sebedisa lebelo le fetang matla a kgohedi ka makgetlo a 20. Di gannet di kgona jwang ho qwela ka tsela e hlollang hakaana le ho etsa seo ka makgetlo a mangata?

Nahana ka sena: Pele gannet e kena ka metsing, e otlollela mapheo a yona ka mora mmele wa yona mme e etsa sebopeho se tshwanang le letshwao la arrow. E boetse e etsa lera le sireletsang mahlo a yona mme e eketsa di organ tse molaleng wa yona le tse sefubeng tse sebetsang jwalo ka mekotlana ya moya e le ho itshireletsa ha e kena ka sekgahla ka metsing.

Ha gannet e kena ka metsing, molomo, hlooho le molala wa yona di etsa sebopeho se tshwanang le sa cone. Sebopeho sena se etsa hore matla ao gannet e a sebedisang ho kena ka metsing, a se ke a roba molala wa yona. Ka potlako feela gannet e tsepamisa mahlo a yona e le hore e bone ka tlasa metsi.

Gannet e ka kgona ho kena ka metsing ho isa botebong bo bokae? Sekgahla seo nonyana ena e kenang ka sona ka metsing, se ka etsa hore e kene ho isa botebong bo ka bang dimithara tse 11, empa e ka kgona ho kenella botebong bo fetang boo ka hore e phuphutse mapheo a yona le ho raharaha maoto a yona a nang le tepo. Ha e le hantle, ho ile ha fumanwa hore di gannet di kgona ho qwela ka lewatleng ho isa botebong bo fetang dimithara tse 25. Ha e se e qetile ho qwela, e phahamela ka hodima metsi e sa sebedise matla mme e se e ikemiseditse ho fofa hape.

Shebella di gannet ha di qwela

Bafuputsi ba entse diroboto tse tshwanang le di gannet tse ka thusang ho ntsha le ho pholosa dintho tse wetseng ka metsing. Ho ne ho lebelletswe hore diroboto tsena di fofe, di qwele ka metsing mme di boele di fofe hape. Le ha ho le jwalo, ha ba ntse ba etsa diteko tsa ho bona ho re na diroboto tsena di sebetsa hantle, roboto e nngwe e ile ka robeha ka makgetlo a mangata ka lebaka la ho kena ka sekgahla ka metsing. Sena se ile sa etsa hore bafuputsi ba bue mantswe a bontshang hore roboto ya bona “e ne e se na matla a ho qwela ha e bapiswa le gannet.”

O nahanang ka see? Na bokgoni ba gannet ba ho qwela bo itlhahetse feela? Kapa na bo entswe?