Tihlabelelo 22:1-31
Sicondziso lesiya kumcondzisi: Kufanele ihlatjelwe ngendlela letsi: “Inyamatane Lensikati Yentsatsakusa.”* Ingoma yaDavide.
22 Nkulunkulu wami, Nkulunkulu wami, ungishiyeleni?+
Kungani ungeti utengisita?
Kungani ungangiva nangikhaliswa buhlungu?+
2 Awu Nkulunkulu wami, ngihlale ngikubita busuku nemini;+Kodvwa wena awungiphendvuli.
3 Wena ungcwele,+Onkhe ema-Israyeli ayakudvumisa.
4 Bobabe betfu bebetsembele kuwe;+Bakwetsemba, futsi wachubeka ubakhulula.+
5 Bakhala kuwe, wena wabakhulula;Betsembela kuwe, futsi abazange bajabhe.*+
6 Kodvwa bantfu bangihleka bulima* futsi bayangenyanya,Kube shengatsi ngisibungu nje hhayi umuntfu.+
7 Bonkhe labangibonako bayangiphukuta;+Bayangiswacela, banikine tinhloko ngekungedzelela batsi:+
8 “Abebeke litsemba lakhe kuJehova. Ngako akamsindzise!
Akamsindzise ngobe uligugu kakhulu kuye!”+
9 Nguwe lowangikhipha esiswini samake,+Futsi wena wangenta ngativa ngivikelekile ngesikhatsi ngisamunya.
10 Kusukela ngatalwa nganiketwa wena kutsi unginakekele;*Kusukela ngisesiswini samake, wena bewusolo unguNkulunkulu wami.
11 Ungabi khashane nami, ngobe inhlupheko isedvute nami+Futsi kute lomunye longangisita.+
12 Ngivinjetelwe tinkunzana letinyenti;+Tinkunzi letinemandla taseBhashani tingitungeletile.+
13 Tivula imilomo yato tifuna kungihlasela,+Kuhle kwelibhubesi lelibhodlako futsi lelidzabudzabula inyamatane ibe ticucu.+
14 Emandla ami atfululeke shengatsi ngemanti;Onkhe ematsambo ami akhumukile.
Inhlitiyo yami seyifanana nemtfwebeba;*+Iyancibilika ngekhatsi kimi.+
15 Sengiphelelwe ngemandla, ngifanana nelucetu lwesitja selubumba;+Lulwimi lwami lunamatsele elwangeni lwami;+Futsi ungifake emgodzini kuze ngifele khona.+
16 Titsa tami tingivimbetele njengetinja;+Bantfu labenta lokubi bangitungeletile.+
Badla tandla netinyawo tami kube shengatsi tidliwa libhubesi.+
17 Onkhe ematsambo ami sekayabalwa.+
Titsa tami tiyangibuka futsi tingihlahlele emehlo.
18 Tehlukaniselana timphahla tami,Futsi tenta inkatho ngengubo yami.+
19 Awu Jehova, ungabi khashane nami.+
Wena ungemandla ami; sheshisa utengisita.+
20 Ngisindzise enkembeni,Sindzisa kuphila kwami lokuligugu* etidladleni* tetinja;+
21 Ngikhulule emlonyeni welibhubesi+ nasetimphondvweni tetinkhomo tesiganga;Ngiphendvule futsi ungisindzise.
22 Libito lakho ngitalimemetela kubomnaketfu;+Ngikudvumise emkhatsini welibandla.+
23 Nine lenesaba Jehova, mdvumiseni!
Mkhatimuliseni, nonkhe nine leniyintalelwane* yaJakobe!+
Mhlonipheni, nonkhe nine leniyintalelwane* ya-Israyeli.
24 Ngobe akentanga shengatsi akakuboni kuhlupheka kwalocindzetelekile;+Akamfihlelanga buso bakhe.+
Ngesikhatsi akhalela lusito kuye, yena wamuva.+
25 Ngitakudvumisa ebandleni lelikhulu;+Tifungo tami ngitatifeza embikwalabo labakwesabako.
26 Labatfobekile batawudla besutse;+Labo labafuna Jehova batamdvumisa.+
Shengatsi ningaphila* kuze kube phakadze.
27 Bonkhe bantfu labavela emikhawulweni yemhlaba batawukhumbula Jehova futsi bagucukele kuye.
Yonkhe imindeni yetive itawukhotsama embikwakhe.+
28 Ngobe nguJehova iNkhosi;+Nguye lobusa tive.
29 Bonkhe bantfu labacebile* labasemhlabeni batawudla futsi bakhotsame bamkhonte;Bonkhe labo labatawufa batawuguca embikwakhe;Kute ngisho namunye kubo longasindzisa kuphila kwakhe.
30 Intalelwane* yabo itamkhonta;Situkulwane lesitako sitawutjelwa ngaJehova.
31 Bantfu batawufika futsi balandzise ngekulunga kwakhe.
Batawutjela labatawutalwa ngaloko lakwentile.
Imibhalo lengentansi
^ Kungenteka lena yindlela yekuhlabela ingoma.
^ Nobe “bahlazeke.”
^ Nobe “bayangiphukuta.”
^ NgesiHebheru kutsi, “ngalahlelwa kuwe.”
^ Kungenteka loku yintfo lesheshe incibilike leyakhiwa tinyosi leyenta kutsi luju lungonakali.
^ NgesiHebheru kutsi, “lokukuphela kwako,” lokusho umphefumulo wakhe nobe kuphila kwakhe.
^ NgesiHebheru kutsi, “etandleni.”
^ NgesiHebheru kutsi, “leniyinhlanyelo.”
^ NgesiHebheru kutsi, “leniyinhlanyelo.”
^ NgesiHebheru kutsi, “tinhlitiyo tenu tingaphila.”
^ NgesiHebheru kutsi, “labakhuluphele.”
^ NgesiHebheru kutsi, “Inhlanyelo.”