Nangabe kuhlupheka akubangelwa nguNkulunkulu, pho kungani kunendlala, buphuya, timphi, tifo letingelapheki kanye netinhlekelele temvelo? LiVi laNkulunkulu liBhayibheli, likhuluma ngetintfo letintsatfu letibangela kutsi bantfu bahlupheke:

1. Umona, Bukhali kanye Nenzondo. “Umuntfu usuke atihlisibete etikwalabanye kantsi utilimata yena.” (Umshumayeli 8:9) Bantfu bachubeka bahlupheka ngenca yekutsi baphatfwa kabi ngulabanye labanesono, labaticabangela bona nobe labanelunya.

2. Sikhatsi Kanye Netintfo Letenteka Singakatilindzeli. Bantfu bahlupheke ngenca yekutsi “sikhatsi nematfuba kubehlela bonkhe.” (Umshumayeli 9: 11) Loku kusho kutsi bantfu bangaba sendzaweni lekabi ngesikhatsi lesikabi, bese batfola ingoti nobe mhlawumbe bantfu abanaki nobe benta emaphutsa.

3. Umbusi Lomubi Wemhlaba. LiBhayibheli likhuluma ngaloyo lobangela kuhlupheka kwebantfu kusukela ekucaleni. Litsi: “Lonkhe live lisemandleni alomubi.” (1 Johane 5:19) Lomuntfu ‘lomubi’ nguSathane Develi, sidalwa semoya lesinamandla lebesiyingilosi yaNkulunkulu ‘lesingazange sihlale ecinisweni.’ (Johane 8:44) Letinye tingilosi tabambisana naSathane kute tivukele Nkulunkulu ngenca yetifiso tato tebugovu, lokwatenta taba ngemadimoni. (Genesisi 6:1-5) Kusukela ngalesikhatsi tivukela, Sathane nemadimoni bebasolo basebentisa emandla abo kanye nelunya kute bacedze inhlalakahle yebantfu emhlabeni. Loku sekwenteka ngelizinga lelikhulu lamuhla. Nyalo Develi utfukutsele kakhulu futsi udukisa “umhlaba wonkhe,” lokwenta kutsi kube ‘nebumaye emhlabeni.’ (Sembulo 12:9, 12) Sathane ungumbusi lomubi lonebudlova. Uyajabula nakabona bantfu bahlupheka. Akusuye Nkulunkulu lobangela kuhlupheka, kodvwa nguSathane.

CABANGA NGALOKU: Ngumuntfu lonenhlitiyo lembi, nalowenta tintfo letimbi longabangela kutsi bantfu labangenacala bahlupheke. Ngalokwehlukile kuloku, liBhayibheli litsi: “Nkulunkulu ulutsandvo.” (1 Johane 4:8) Ngekuvumelana nalobuntfu bakhe, liBhayibheli litsi: “Akube khashane naNkulunkulu kuba ngumenti walokubi, kwenta bubi akube khashane naSomandla.”​—Jobe 34:10.

Kungenteka uyatibuta, ‘Kutawuze kube ngunini solo Nkulunkulu Somandla avumela Sathane kutsi achubeke angumbusi lomubi?’ Njengobe sesibonile, Nkulunkulu ukutonda ngenhlitiyo yakhe yonkhe kungalungi futsi uva buhlungu kakhulu nakasibona sihlupheka. Ngetulu kwaloko, liVi lakhe liyasikhutsata: “Phonsani konkhe kukhatsateka kwenu kuye, ngobe uyanikhatsalela.” (1 Phetro 5:7) Nkulunkulu uyasitsandza futsi unemandla ekucedza konkhe kuhlupheka kanye nekungalungi, njengobe sihloko lesilandzelako sitawube sicoca ngaloko. *