Sipas disa përllogaritjeve, në mbarë botën ka një milion e gjysmë detarë. Si arrijnë Dëshmitarët e Jehovait t’ua japin mesazhin e Biblës sa më shumë detarëve, meqenëse ata udhëtojnë vazhdimisht nga njëri port në tjetrin? Kur një anije ankorohet në port, Dëshmitarë të përgatitur tregohen të gatshëm të hipin në anije e t’u ofrojnë përgjegjësve dhe ekuipazhit kurse biblike falas dhe literaturë në gjuhën që dëshirojnë.

Ç’rezultate ka sjellë kjo nismë? Stefano, një Dëshmitar vullnetar në portin e Vankuverit, Kanada, shpjegon: «Disa mendojnë se detarët janë burra të vrazhdë e të pandjeshëm. Ndonëse disa mund të jenë të tillë, pjesa më e madhe janë të përulur dhe kanë dëshirë të zjarrtë të mësojnë.» Stefano shton: «Shumë prej tyre besojnë te Perëndia dhe duan të kenë bekimin e tij, prandaj shpeshherë na mirëpresin ngrohtësisht.» Nga shtatori i 2015-s deri në gusht të 2016-s, vetëm në Vankuver, Dëshmitarët e Jehovait u ftuan në bordet e anijeve mbi 1.600 herë. Detarët morën mijëra botime në shumë gjuhë dhe më tepër se 1.100 prej tyre nisën të studionin Biblën.

Ngaqë Dëshmitarë predikojnë kudo në portet përreth botës, detarët që duan të flasin sërish për Biblën, kërkojnë t’i vizitojnë në portin e radhës. Për shembull, në maj të 2016-s, Dëshmitarët e Jehovait në Vankuver takuan Uarliton, kryekuzhinier në një anije mallrash. Ata i treguan videon Pse ta studiosh Biblën? dhe nisën një studim biblik me broshurën Një lajm i mirë nga Perëndia. Uarlito u kënaq nga kjo vizitë dhe donte ta vazhdonte studimin e Biblës, por destinacioni i radhës ishte porti i largët i Paranaguas në Brazil.

Mbi një muaj më vonë, kur anija më në fund u ankorua në Paranagua, Uarlito nuk u besonte syve kur dy Dëshmitarë brazilianë hipën në shkallët e anijes dhe e kërkuan me emër. Ata thanë se bashkëbesimtarët në Vankuver u kishin dërguar kërkesën e tij për ta vizituar. Uarlito u entuziazmua kur takoi Dëshmitarët brazilianë dhe i falënderoi nga zemra që morën masa për ta takuar. Me kënaqësi pranoi të vazhdonte studimin e Biblës me Dëshmitarët në portin e radhës.