Mwari Ane Mazita Mangani?

PLAY

Mhinduro yeBhaibheri

Mwari angori nezita rimwe chete. MuchiHebheru rinonyorwa kuti יהוה uye muchiShona rinonzi “Jehovha.” a Achishandisa muprofita wake Isaya, Mwari akati: “Ndini Jehovha. Ndiro zita rangu.” (Isaya 42:8) Zita iri rinowanika ka7 000 muzvinyorwa zveBhaibheri zvekare. Rinowanika kakawanda kupfuura mamwe mazita ese ekuremekedza aMwari uye kupfuura chero zita raani zvake anotaurwa muBhaibheri. b

Mwari ane mamwe mazita here?

Kunyange zvazvo Bhaibheri richiti Mwari ane zita rimwe chete, rinoshandisawo mamwe mazita akawanda pakumuremekedza uye pakutsanangura zvaari. Mamwe emazita iwayo anotevera netsanangudzo zvinoratidza chimwe chinhu nezvaJehovha kana kuti zvaari.

Zita rekuremekedza	Parinowanika	Zvarinoreva
Allah	(Harisi muBhaibheri)	Zita rechiArabic rekuti “Allah” harisi zita chairo asi nderekuremekedza rinoreva kuti “Mwari.” Shanduro dzemaBhaibheri echiArabic neemimwewo mitauro dzinoshandisa “Allah” panzvimbo perekuti “Mwari.”
Wemasimbaose	Genesisi 17:1	Hapana ane simba rakaenzana nerake. Zita rechiHebheru rekuti ʼEl Shad·daiʹ, kureva kuti “Mwari Wemasimbaose,” rinowanika muBhaibheri ka7.
Arufa naOmega	Zvakazarurwa 1:8; 21:6; 22:13	“Wekutanga newekupedzisira,“ kana kuti “mavambo nemagumo,“ kureva kuti hapana kumbova nemumwe Mwari Wemasimbaose kunze kwaJehovha uye hakuzombovi nemumwe kunze kwake. (Isaya 43:10) Arufa ibhii rekutanga paarufabheti yechiGiriki uye Omega ibhii rekupedzisira.
Wemazuva Mazhinji	Dhanieri 7:9, 13, 22	Haana mavambo; akagara aripo pasati patombova naani zvake kana kuti chero chii zvacho.—Pisarema 90:2.
Musiki	Isaya 40:28	Ndiye akaita kuti zvinhu zvese zvivepo.
Baba	Mateu 6:9	Ndiye anopa upenyu.
Mwari	Genesisi 1:1	Ane simba guru uye ndiye anofanira kunamatwa. Shoko rechiHebheru rekuti ʼElo·himʹ riri muuwandu, kuratidza ukuru hwaJehovha, chiremerera uye kunaka kwake.
Mwari wavanamwari	Dheuteronomi 10:17	Ndiye Mwari mukuru, akasiyana “navanamwari vasina zvavanobatsira” vanonamatwa nevamwe.—Isaya 2:8.
Murayiridzi Mukuru	Isaya 30:20, 21	Anotidzidzisa kuti tibatsirwe uye anotitungamirira.—Isaya 48:17, 18.
Muiti Mukuru	Pisarema 149:2	Ndiye akaita kuti zvinhu zvese zvivepo.—Zvakazarurwa 4:11.
Mwari anofara	1 Timoti 1:11	Anogara achifara.—Pisarema 104:31.
Munzwi wemunyengetero	Pisarema 65:2	Anonzwa munyengetero wemunhu mumwe nemumwe anonyengetera kwaari aine kutenda.
Ndiri Iye Wandiri	Eksodho 3:14, Bhaibheri Rine Apokirifa	Anova chero zvaanoda kuti azadzise chinangwa chake. Chirevo ichocho chinoshandurwawo kuti “Ndichava Wandichava” kana kuti “Ndichava Zvandinenge Ndasarudza.” (Bhaibheri Dzvene; Bhaibheri—Shanduro yeNyika Itsva) Mashoko iwayo anotibatsira kuti tinzwisise zvinorehwa nezita raMwari rekuti Jehovha, rinozotaurwa muvhesi inotevera.—Eksodho 3:15.
Godo	Joshua 24:19, Bhaibheri Dzvene	Anoda kunamatwa iye ega. Shoko iri rakashandurwawo kuti “anoda kuzvipira kwakazara.”Bhaibheri—Shanduro yeNyika Itsva.
Mambo asingagumi	Zvakazarurwa 15:3	Kutonga kwake hakuna mavambo kana magumo.
Ishe	Pisarema 135:5	Muridzi kana kuti Tenzi; muchiHebheru ʼA·dhohnʹ kana kuti ʼAdho·nimʹ.
Tenzi wehondo	Isaya 1:9, Bhaibheri Rine Apokirifa	Mutungamiriri wemauto engirozi kana kuti “Jehovha wemauto.”—VaRoma 9:29
Wekumusorosoro	Pisarema 47:2	Ane nzvimbo yepamusorosoro.
Mutsvenetsvene	Zvirevo 9:10	Mutsvene (akachena patsika) kupfuura chero munhu upi zvake.
Muumbi	Isaya 64:8	Ane simba pamusoro pemunhu mumwe nemumwe uye pemarudzi, sezvakangoita muumbi ane simba pamusoro peivhu raanoshandisa pakuumba.—VaRoma 9:20, 21.
Mudzikinuri	Isaya 41:14	Anodzikinura kana kuti anotenga vanhu kubva muchivi nerufu achishandisa chibayiro cherudzikinuro chaJesu Kristu.—Johani 3:16.
Dombo	Pisarema 18:2, 46	Ndiye nzvimbo yakachengeteka yekutizira uye ndiye muponesi.
Muponesi	Isaya 45:21	Anonunura kubva pazvinhu zvinokuvadza kana kuparadza.
Mufudzi	Pisarema 23:1	Ane hanya nevanamati vake.
Changamire Ishe	Genesisi 15:2	Ane simba guru; muchiHebheru ʼAdho·naiʹ.
Mukurusa	Dhanieri 7:18, 27	Changamire mukurusa

Mazita enzvimbo ari muMagwaro echiHebheru

MuBhaibheri mune mamwe mazita enzvimbo ane zita raMwari, asi hazvirevi kuti ndemamwe mazita aMwari.

Zita renzvimbo	Parinowanika	Zvarinoreva
Jehovha-jire	Genesisi 22:13, 14	“Jehovha achapa zvinenge zvichidiwa”
Jehovha-nisi	Eksodho 17:15	“Jehovha ndiye Mureza wangu.” Jehovha ndiMwari anodzivirira uye anobatsira vanhu vake.—Eksodho 17:13-16.
Jehovha-sharomu	Vatongi 6:23, 24	“Jehovha Rugare.”

Nei tichifanira kuziva uye kushandisa zita raMwari?

Mwari anoona zita rake rekuti Jehovha serinokosha nekuti akaita kuti rinyorwe kane zviuru muBhaibheri.—Maraki 1:11.
Mwanakomana waMwari Jesu, akasimbisa asimbisazve kukosha kwezita raMwari. Semuenzaniso, akanyengetera kuna Jehovha achiti: “Zita renyu ngaritsveneswe.”—Mateu 6:9; Johani 17:6.
Vaya vanosvika pakuziva zita raMwari vorishandisa, vanenge vachitora matanho ekutanga pakuumba ushamwari naJehovha. (Pisarema 9:10; Maraki 3:16) Ushamwari ihwohwo hunoita kuti vabatsirwe nevimbiso iyi yaMwari yekuti: “Nekuti anondida, ndichamununura. Ndichamudzivirira nekuti anoziva zita rangu.“—Pisarema 91:14.
Bhaibheri rinoti: “Variko vanonzi ‘vanamwari,’ kungava kudenga kana panyika, sezvo kuine ‘vanamwari’ vakawanda uye‘madzishe’ akawanda.” (1 VaKorinde 8:5, 6) Asi rinonyatsotaura nezvaMwari mumwe chete wechokwadi nezita rake rekuti Jehovha.—Pisarema 83:18.

a Dzimwe nyanzvi dzechiHebheru dzinofarira kushevedza Mwari nezita rekuti “Yahweh”.

b Zita raMwari rakapfupikiswa kuti “Jah,” rinowanika kanenge ka50 muBhaibheri, kusanganisira kushandiswa kwarinoitwa mushoko rekuti “Hareruya,” izvo zvinoreva kuti “Rumbidzai Jah.”—Zvakazarurwa 19:1; Bhaibheri Dzvene.